19
1 'N Pilaatɩ yiɛ 'slʋja 'dɩ 'nyɛ nɩɩ,
wa nɩ 'libhï Zezwii 'wʋ,
wa 'kɔ 'sɛlɩ.
2 'Slʋjaa 'libhoo 'wʋʋ,
'n wa yiɛ ‑dɛglaglipë lɩbhä,
'n wa yonyɩɛ 'wlu zʋ.
'N wa yoo ‑bäna 'käda 'mö päla,
a 'zɩzla.
3 Wa 'zoo sa'a 'wëë,
'n wa 'dioo 'yila 'klʋ,
'n wa nʋä:
«Zwiiföwaa a 'bhlɩlowlii,
‑na nyɛmʋ nɩ zumanɩ!»
'N wa ‑dɩnɔɔ 'yukwïla 'mö kɛ.
4 'N Pilaatɩ yi'ɛɛ ‑mä 'ligbë 'mö 'wlʋ,
'n ɔ yiɛ Zwiiföwaa 'dɩ 'nyɛ,
ɔ lɛ naa:
«Nɩkpɛɛ a ‑laaa,
mä'ä n 'kanyɔɔ 'pɩwʋ ‑lɛ.
A 'kä sɛ yɩbhlɩmanɩ nɩɩ,
'kïbhë a ‑maa 'kɔɔ gbʋ köbhaa,
n 'nɔnyɩɛ 'mö ghlɩ.»
5 'N wa ‑nyɛ Zezwii yiɛ zɛmö 'wlʋ,
‑dɛglaglipëa wa 'zo a‑a 'wluu,
a ‑wʋ ‑mä,
‑bänazla 'kädaa,
ɔ ‑soa 'mö,
'n wa ‑nyɔɔ yiɛ ‑lɛ 'pɩwʋ 'dio.
Wa ghlɛɛ ‑lɛ,
Pilaatɩ lɛ naa:
«Nɩkpɛɛ mɔɔ da'a.»
6 ‑Maa Lagɔbʋbɔwaa a 'kifiea wa ‑nyɛ 'wa ‑kʋkʋwaa 'sɔ,
wa 'yoo 'ylɩmöö,
'n wa yiɛ tenyii 'mö 'kpa,
wa lɛ:
«‑Alee,
kʋnɔɔ su 'klʋ ɔ 'kä 'ku aa,
ɔ 'kä 'ku aa!»
Pilaatɩ lɛ naa:
«A nɩ 'libho anyɩgäsɛ 'wʋ,
a 'kɔ su 'klʋ kʋnɩ,
‑maa ‑amö na a,
'kïbhë a ‑maa 'kää 'nglɩ ‑kä n 'kɔ su 'klʋ kunɩɩ,
n 'naa 'wʋ yɩlɩ.»
7 Ɔ gbää sa'aa,
Zwiiföwaa lɛ naa:
«‑A kä ‑a'a gbö.
‑A'a gbö 'la a dɔ'wʋ,
nɩkpɛ nɩ,
'ku ɔ kää ɔ 'kä 'ku.
Ɛ'ɛ ‑bhö nyɩasɛ,
‑maa ɔ lɛ Lagɔ a 'Yu ɔ glɩnɩɛ.»
8 Wa gbää sa'aa,
'n nganɔ yiɛ tenyii Pilaatɩ köbhä,
9 'n ɔ ‑nyɛ Zezwii yi'ɛɛ ‑mä 'ligbë 'mö plɛ,
'n ɔ yoo nimï 'yɩbhä,
ɔ lɛ naa:
«'Lɩlɩlɩ a dɔ'wʋ,
dɛ ‑n 'bhöönɩ bhä a'bhë 'nɩ?»
‑Maa ɔ 'yɩbhɔɔ sa'a nimï,
Zezwii 'nɔɔ ngli pälɩ.
10 'N Pilaatɩ yo'ɛɛ nimï 'yɩbhä,
ɔ lɛ naa:
«‑Amö ‑n ‑gɔ bhä 'wʋ ‑a?
‑Nn bhä sɛ ‑yi nɩɩ,
‑amöö 'kämanɩɛ,
n bhɛnɩ n ‑kamö 'yi 'tatinɩ,
n bhɛnɩ'ɛ n 'kä gbä ‑wa ‑kamö su 'klʋ kʋnɩ ‑a?»
11 Zezwii lɛ naa:
«'N ɛ 'nɩ ‑bhö nɩɩ Lagɔ mɔɔ ngulu 'wʋ a za‑a,
‑na'a ‑zɩbʋ 'mö,
‑nn‑ä bhɛnɩ ‑n 'kä ‑mä na ‑gömö ‑na'a 'kämanɔɔ 'yli 'wälanɩ.
‑Sɩbhä a za nɩkpɛ ‑ɔ plɩnɩɩɛ ‑nmö kä'möö,
'ɔ nyinylolii a gbʋʋ 'tɛɛ 'mö wʋ zi ‑na ‑nʋʋ 'wʋ.»
12 Zezwii gbää sa'aa,
'n Pilaatɩ yiɛ ‑li 'mö yɛla ɔ 'kɔ a 'yi 'tatinɩ.
'N Zwiiföwaa yi'ɛɛ 'mö 'kpa,
wa lɛ naa:
«Nɩkpɛ a ‑mɔɔ laa ɔnyɩ 'bhlɩlowlii,
Sezaa a ‑gblɩnyɔ ɔ glɩnɩɛ.
Zaa,
n‑n ‑kɔɔ ‑naa 'yi 'tatinɩɩ,
‑nn‑ä Sezaa nimï ‑wʋ.»
13 Wa nʋä sa'aa,
'n Pilaatɩ ‑nyɛ Zezwii yi'ɛɛ ‑mä 'libgë 'mö 'wlʋ,
'n ɔ ‑nyɔɔ yiɛ ‑lɛ 'pɩwʋ 'dio.
Pilaatɩ 'a ‑zijlituklikpëa,
'n wa ‑nyaa yiɛ yi.
Dɛ ‑bhlʋ dɛ wa 'zʋä sɛ'ɛ kpɩ glu 'tɩɩ,
dɛ wa laa Ebleegbʋ 'mö Gabataa,
'n wa yeaa ‑lɛ 'zʋ,
'n Pilaatɩ yiɛ sɛ glɩ,
ɔ kä ‑zijlea 'wlu ‑dɩ.
14 ‑Lɛ a zlɩ 'la 'mö,
Galɛ'möwlʋfɛtɩɩ a ‑lii a 'wlugïganɩzlɩɩ mɛɛ,
ylʋʋ lɛ 'kä 'du 'mö ghlɛ a sɛ,
'n Pilaatɩ yuëë 'dɩ 'nyɛ,
ɔ lɛ naa:
«'A 'bhlɩlowlii mɔɔ dɛ'ɛ.»
15 ‑Maa ɔ gbää sa'aa,
wa 'wuë 'n wa yi'ɛɛ 'mö 'kpa,
wa lɛ:
«Ɔ nɩ 'ku aa,
ɔ nɩ 'ku aa,
kʋnɔɔ su 'klʋ ɔ 'kä 'ku aa!»
Pilaatɩ lɛ naa:
«'A 'bhlɩlowlii 'mö a gbä bhä n nɩ kʋnɩ su 'klʋ ɔ 'kä 'ku ‑a?»
Ɔ gbää sa'aa,
Lagɔbʋbɔwaa a 'kifiea,
wa lɛ naa:
«'N ɛ 'nɩ ‑bhö Sezaa a 'yize mɔɔ,
‑aa mä'ä käböbhlɩlowli ‑kä.»
16 Wa gbää sa'aa,
'n ɔ yia'aa Zezwii 'slʋjaa yowʋ 'nyɛ wa 'kɔ su 'klʋ kʋnɩ.
'N slʋjaa yiɛ Zezwii 'wʋ 'libhï.
Wa yɛ Zezwii su 'klʋ kʋnɩ
17 Wa ‑nyɔɔ ‑wʋä ‑mä glɔ 'mö 'wlʋ dɔ'wʋʋ,
suu wa 'kɔɔ 'klʋ kʋnɩɩ,
ɔ'bhë ɔ ‑suu 'n wa ‑nyɔɔ yiɛ ‑mä 'wlʋ.
Dɛ ‑bhlʋ,
dɛ wa laa Ebleegbʋ 'mö Gogotaa ‑yɩ sɛɛ zɛmö nɩɩ 'wutɔkʋʋ,
'n wa yiɛ ‑lɛ mö.
18 Da'a ‑lɛ wa kʋnɩɛ Zezwii su 'klʋ.
Wa kʋnɩmö'ɛ nɩkpa ‑mumuë 'sɔ 'wa swii 'klʋ.
‑Mɔ ‑wʋ mä'ä ɔ luukɛ 'wʋ,
‑mɔ ‑wʋ mä'ä ɔ kɔpɛ 'wʋ.
19 ‑Maa suu wa kʋnɔɔ 'klʋʋ,
‑lɛ wʋ ghäyɩdaa,
Pilaatɩ lɛ wa nɩ 'cɛlɩ wɛlɩkïbhë ‑bhlʋ wa 'ka ‑lɛ mɩanɩ.
'N wa yeaa ‑lɛ mɩanɩ.
Sɛ'ɛ a nʋä nɩɩ:
Nazalɛɛtɩ a Zezwii,
Zwiiföwaa a 'bhlɩlowli.
20 Dɛ wa kʋnɩɛ Zezwii su 'klʋʋ,
‑lɛ glɔ yɔwʋ ma‑a,
kïbhëa Pilaatɩ mɩanɩɛ ‑lɛ 'ɔ su 'klʋʋ,
a cɛlɩnɩ Ebleegbʋ 'mö,
a cɛlɩnɩ Latɛɛgbʋa 'mö,
'n a cɛlɩnɩ'ɛɛ Glɛkögbʋ 'mö zaa,
Zwiiföwa a ‑bɛ zɛla 'mö.
21 'N 'wa Lagɔbʋbɔwaa a 'kifiea yiɛ Pilaatɩ ‑mä ghlɩ,
wa lɛ naa:
«Sɛ ‑n 'cɛlɩɛ da'a ‑lɛ nɩkpɛ 'la a suu 'klʋʋ,
‑sɩbhä 'nɩɛ nɛnɩ,
‑maa sɛ'ɛ ‑n 'kä a‑a nɩɩ,
nɩkpɛ nɩ,
ɔ lɛ mɔɔ glɩnɩɛ Zwiiföwaa a 'bhlɩlowli.»
22 ‑Maa Pilaatɩ lɛ naa:
«'Saa n yɛɛ da'a 'cɛlɩ 'wëë,
n kʋ 'cɛlɩ 'wë.»
23 'Slʋjaa kʋnɩɛ Zezwii su 'klʋ 'wëë,
'n wa yiɛ 'ɔ 'möpälalii 'wʋ 'libhï,
'n wa yiɛ 'ki ‑mʋäna 'mö 'ylimö dlinɩ,
‑mɔ ‑bhlʋ 'ɔ dɛ,
‑mɔ ‑bhlʋ 'ɔ dɛ.
'Ɔ ‑bäna ‑vʋkwaa ‑aaa 'ylimögönadɛ ‑kä,
‑a ‑wʋä ‑bhlokoo,
'n wa yea'ɛɛ 'wʋ 'libhïmö.
24 Wa 'libhëaa 'wʋʋ,
wa lɛ naa:
«A‑a nɩ ta 'mö ghlɛghlɛnɩ,
‑maa a‑a nɩ 'pa ‑nɩgbɩ 'wʋ,
‑ɔnyɩɩ ‑nɛ ‑kä lii,
ɔ 'ka 'wʋ 'libhï.»
Sa'a ‑sɩbhä 'kïbhë ‑bhlʋ,
‑a cɛlɩɛ a‑a ‑mä Lagɔbɔgʋʋ 'mö 'wlʋnɩɛ 'yli.
'Kïbhë 'la,
sɛ'ɛ a nʋä nɩɩ:
Wa yɛ 'na 'möpälalii 'ylimö dlinɩ.
'Na ‑bäna ‑vʋkwa a'bhë,
wa ka ‑nɩgbɩ 'wʋ 'pä.b
25 ‑Maa suu wa kʋnɩɛ Zezwii 'klʋʋ,
‑lɛ wʋ yɔwʋ,
ɔ ‑da mɔ,
ɔ ‑da a ‑daayu mɔ,
nɩkpɛ ‑bhlʋ wa laa Klʋpasɩ,
ɔ 'lɛnglɛ Malii mɔ,
'n Madalaa a 'yikwlii Malii,
ngwlɩ 'la ‑mʋäna ‑kpɔ mʋa 'nɩgböä ‑lɛ.
26 ‑Lɛ Zezwii a ‑da yɔwʋ,
'ɔ ‑gänɩnyɔɔ ‑ɔ ‑glɔɔ tenyii dlɩ 'wʋʋ,
ɔ 'nɩgbömö ‑lɛ.
'N ɔ yiɛ ɔ ‑da 'dɩ 'nyɛ nɩɩ:
«‑Bhɩa,
‑na'a yuu mɔɔ da'a.»
27 'N ɔ yiɛ 'ɔ ‑gänɩnyɔ 'la 'dɩ 'nyɛmö,
ɔ lɛ naa:
«‑Na ‑da mɔɔ da'a.»
'Bhöönɩa'a ‑lɛ,
mɔɔ ‑sua'aa Zezwii a ‑da.
Zezwii a nyɛmʋ yɛ bhɩɛ
28 Yɩ 'plɩɛ sa'a 'wëë,
Zezwii ‑yi sɛ nɩɩ,
libhoo Lagɔ 'nyɔ a‑a,
ɔ kʋ zɛmö bhɩɛ,
'n ɔ yiɛ gbʋ ‑dɩ,
ɔ lɛ:
«'Nyutʋ lɩbhaa.c
» Ɔ gbää sa'aa,
wɛlɩkïbhë ‑bhlʋ ‑a cɛlɩ a‑a 'kɩ ɔ dɛ ‑mä Lagɔbɔgʋʋ 'möö,
ma‑a 'wlʋnɩɛ da'a 'yli.
29 ‑Maa ‑laki ‑bhlʋ ‑wʋ ‑lɛ,
ɛ kä nʋ 'mö,
kälɩ wʋ kälɩɛ.
'N 'slʋjeyi yiɛ ‑yʋkʋdudukwë 'wʋ 'libhï,
'n ɔ yeaa su ‑bhlʋ wa laa yizɔɔpöd a klɩɩ 'yli gwanɩ,
'n ɔ yeaa ‑mä nʋ 'la 'mä 'ngwa 'n ɔ yeaa Zezwii nuë 'wʋ zʋ.
30 Zezwii 'nɩmää nʋ 'la 'wëë,
ɔ lɛ naa:
«Yɩ 'wuë yɛ 'klʋ yie.»
Ɔ gbää sa'a 'wëë,
'n 'ɔ 'wukpëlea yiɛ kpëghlele bhli,
'n 'ɔ nyɛmʋʋ yiɛ bhɩɛ.
'Slʋjeyi yɛ Zezwii a ‑gäzɛɛ 'li 'mö tlʋ
31 ‑Lɛ a zlɩ 'la,
Zwiiföwaa 'a ‑gwlɛnɩzlɩ a ‑lii a 'wlugïganɩzlɩɩ mɛɛ.
Zaa,
Zwiiföwaa 'nɩɛ 'yɩbhä nɩɩ,
‑gäzɛ nɩ ‑wʋ su 'klʋ.
Ɛ'ɛ ‑bhö nyɩasɛ,
‑maa ‑lɛ a ‑gwlɛnɩzlɩ 'la,
'fɛtɩ 'kädɛ a zlɩ 'mö ɛ bhliɛ.
Nza wa ghlɩɛ ‑mä Pilaatɩ,
nɩkpaa wa kʋnɩ a‑a swi 'klʋʋ,
'slʋjaa 'kä wa bhɩɩ 'kätɛ,
wa 'käa ‑pa 'ku,
nzɩɩ wa 'käa wa ‑gäzɩɩ ‑lɛ swi 'klʋ ‑sɛ.
32 'N 'slʋjaa yiɛ yi.
Wa yiɛ,
nɩkpaa 'sɔ ‑kpɔ ‑wa ‑kʋnɩmö a‑a ‑lɛ Zezwii yɔwʋ 'wa swii 'klʋʋ,
'n wa yiɛ bhʋlʋbhlʋ wa bhɩɩ 'kätɛ.
33 ‑Maa wa 'kää Zezwii 'wʋ ghlɛɛ,
wa lɛ zʋ a sɛ'ɛ,
ɔ ku‑u,
‑sɩbhä a za,
wa 'nɔa'a bhɩ 'kätɛ.
34 ‑Maa 'slʋjeyi ‑bhlʋ ɔbhlɩ,
mɔɔ 'libhïä 'ɔ lii 'wʋ,
'n ɔ yiɛ Zezwii 'a gbäközɛmö 'fïta.
Ɔ 'fïtaa ‑lɛ,
'n dlu ‑nyɛ 'nyu 'sɔ yiɛ ‑lɛ ghlɛnɩ.
35 ‑Ɔ bhïlaa wɛlɩ nɩ 'dɛɛ,
ɔ 'yɩ yɩ da.
Zaa,
‑tiawɛlɩɛ,
ɔ'bhë ɔ ‑yi sɛɛ nɩɩ gbëaa ɔ bhïlaa.
A 'kɩa abhlɩ dlɩ 'wʋ ‑kämö a za nza ɔ bhïliiɛ.
36 ‑Li 'la 'wuë,
kïbhïï ‑yɩ cɛlɩ a‑a ‑mä Lagɔbɔgʋʋ 'möö,
yɩ 'kä 'yli 'wlʋnɩ a za,
nza yɩ 'plɩɛ ‑sɩbhä 'wʋ.
Sɛ'ɛ tɛkäkïbhëa nʋä nɩɩ:
Wa 'naa 'kä ɔ 'kwëyi ‑bhlʋ a'bhë 'kätɛ.e
37 Sɛ'ɛ 'sɔnaa nʋä nɩɩ:
Nɩkpɛɛ wa 'fïta a‑a,
wa yo zɩla'a 'ylɩmö.f
Wa yɛ Zezwii a ‑gäzɛɛ zizaa
38 Yɩ 'plɩɛ sa'a 'wëë,
'n nɩkpɛ ‑bhlʋ yiɛ Pilaatɩ ‑mä ghlɩ.
Glɔ ‑bhlʋ wa laa Alimatee,
‑mä a nɩkpɛɛ.
'Mö wa laa Zɩzɛɛfʋ,
Zezwii 'mö ɔ ‑gänɩmöä.
‑Maa Zwiiföwaa 'mö ɔ guä zaa,
'wi 'mö ɔ ‑gänɔɔ.
Nɩkpɛ 'la,
mɔɔ ghlɩɛ ‑mä Pilaatɩ,
'n ɔ yoo Zezwii a ‑gäzɛ 'yɩbhänɩ ɔ 'kɛ zizaa mö.
'N Pilaatɩ yiɛ 'wʋ nglu,
'n Zɩzɛɛfʋ yiɛ ‑gäzɛɛ ‑lɛ suu 'klʋ ‑sɛɛ mö.
39 Ɔ ‑nyɛ nɩkpɛ ‑mɔmɔɔ 'sɔ 'n wa yiɛ mö.
Nikodɛɛmö,
nɩkpɛ 'la ‑ɔ mö'ɛ 'ylɩ ‑bhlʋ 'mö sabʋsɛ Zezwii nimï 'yɩbhää,g
mɔɔ.
Nikodɛɛmö,
gwäzɩ wa lɔɔ ‑gäzɩ yɔwʋ wa laa miilɩ,
yɩ ‑nyɛ ‑mimii wa laa alowɛsɩ 'sɔ,
yɩ 'dʋadʋanɩ,
yɩ kä 'kwili a glʋ ‑bhlʋ 'kwili kʋgbä a sɛ,
ɔ ‑swii 'n ɔ yiɛ yi.
40 Ɔ ‑nyɛ Zɩzɛɛfʋ 'sɔ 'n wa yiɛ Zezwii a ‑gäzɛɛ 'wʋ 'libhï,
'n wa yiɛ gwäzɩ 'la ‑yɩ pää nglɛ a nglɛ ‑gäzɛɛ yɔwʋ 'lɔ,
'n wa yee loku bibe 'tɩɩ.
Zwiiföwaa ‑kä 'kwädlɩ 'wa ‑gäzɩɩ zizaa yi a sɛ wa 'zʋ a‑a,
'n wa yiɛ ‑sɩbhä zʋ.
41 ‑Maa dɛ wa kʋnɩɛ da'a Zezwii su 'klʋʋ,
‑lɛ a yɔwʋ,
'lagblɛ ‑bhlʋ ‑wʋ a ‑lɛ.
‑Mä ɛ 'mö,
lesikpë ‑bhlʋ ‑wʋ ‑mä.
Lesikpë 'la 'mö,
wa'aa ‑bhlɛ tɛkäsɛ ‑mä nɩkpɛ zizaa.h
42 ‑Maa Zwiiföwaa a ‑gwlɛnɩzlɩɩ yɛ 'dio 'wë,
'n lesikpë 'la 'nɩɛ'ɛ dɛ 'bhʋɔ zaa,
‑mä wa zizaa Zezwii.