Lwiikö 1

Zezwii Kliisɩ 'a 'Mänatɩtɩɩ

Lwiikö

'cɛlɩɛ

'Saa kää 'nglɩ 'n Lwiikö yiɛ 'bɔgʋ nɩ 'cɛlɩɩ

1‑3 ‑Atʋ Teofilɩ ‑ayo!

Zezwii 'a wɛlɩɩ ‑yɩ 'plɩ a‑a mä'ä ‑aa jijo'wʋ 'wʋʋ,

sɛ yɩ 'plɩplɩnɩɛ 'möö,

nɩkpa a ‑bɛ yɛ a yɩ 'bɔgʋ'mözʋzwɛɛ zɛmö bhɩɛ.

Wa 'kɩɛ 'cɛlɩɛ yii,

nɩkpaa ‑wa 'yɩɛ Zezwii 'a wɛlɩɩ a tɛɛnɩda 'n sɛ yɩ 'plɩplɩnɩɛ 'mö,

‑wa 'yɩɛ ‑sɩbhä 'ylɩmöö,

Lagɔ 'nyɛɛ 'dɩ nɩɩ wa nɩ nyɩanyii,

mʋa 'nyʋää 'dɩ 'n wa yiɛ ‑sɩbhä 'cɛlɩ.

‑Amö na a 'yɛ,

dɛɛ wɛlɩ 'la tɛɛnɩɛ,

'n sɛ yɩ 'plɩplɩnɩɛ 'möö,

‑sɩbhä n 'yɩbhɩɛ nimï 'n n yiɛ yɩ 'wuë ‑sɩbhä yɩbhlɩnɩ 'tɩɩ.

Zaa,

‑Atʋ Teofilɩ,

yɩ nɛnɩ na dɔ'wʋ,

n 'kɩ 'bɔgʋ 'mö 'zʋmö,

n ‑kamu 'wʋ 'pä.

4 Nyɩasɛ n ‑nɩmöä dɛ'ɛ 'wʋ 'cɛlɩ,

‑maa Zezwii 'a wɛlɩɩ wa 'cɩamöä,

n yɩbhä ‑n 'kä sɛ yɩbhlɩmanɩ nɩɩ,

‑tiawɛlɩɛ.

Lagɔzuzukwë yɛ Zakalii 'dɩ kwä

5 'Tɛnyɩ 'mö 'bhlɩlowlii wa la a‑a Eloodɩ 'kämanɩ a‑a Zwidee‑bhölɩɩ ‑gömöö,

nɩkpɛ ‑bhlʋ mɔɔ ‑wʋ a‑a ‑lɛ,

'mö wa laa Zakalii.

Zwiiföwaa a Lagɔbʋbɔnyɔ ‑bhlʋ ɔ glɩnɩɛ.

Lagɔbʋbɔnyɔɔ wa laa Abia,

'ɔ ‑zɩkpaa 'mö ‑mä ɔ ‑wʋmö a‑a.

'Ɔ nglɔɔ a nglɩɛ Elizabɛtɩ.

Lagɔbʋbɔnyɔ 'kɔdɔɔ Aghlɔɔ,

'ɔ ngëyii 'mö a nglʋyuu ɔ glɩnɩɛ.

6 Zakalii ‑nyɛ Elizabɛtɩ 'sɔ,

'wa nɛmönɛmösaa dlɩ yɔwʋ a nɛnɩɛ Lagɔ.

'Ɔ Gböö ‑nyɛ 'ɔ wɛlɩɩ 'wuë 'sɔ,

'mö wa zʋä 'klʋkpamö 'tɩɩ.

7 ‑Maa Elizabɛtɩ 'nɩ gwälɩ a,

zaa wa'aa 'yu ghlɩ 'n wa yiɛ gɔ.

8 Zwiiföwaa 'a Lagɔbʋbɔwaa,

'wʋplɩsɛ wa nʋä 'wa libhoo zaa,

'ylɩ ‑bhlʋ 'mö,

'n Zakalii 'a ‑zɩkpaa 'a 'tɛnyɩ yiɛ ghlɛ.

9 Lagɔbʋbɔwaa a dɔ'wʋ,

wa ‑kä wa 'kä libhii dlinɩɩ,

‑nɩgbɩ wa pää.

‑Lɛ a zlɩ 'la 'mö,

'n ‑nɩgbɩyii yiɛ Zakalii 'wʋ bhli,

ɔ 'kä ‑mä Lagɔbʋbɔbudu 'mö plɛ,

ɔ 'kä Lagɔ 'wlɩ bʋbɔnɩ.

10 'Tɛnyɩɩ 'mö ɔ ‑wʋä wlɩɩ sia dɔ'wʋʋ,

nɩkpaa 'wuë wa ‑wʋ ‑lɛ 'pɩwʋ,

wa bhibhe Lagɔ.

11 Zakalii ‑wʋ Lagɔ bʋbɔ dɔ'wʋ,

'n Lagɔzuzukwë ‑bhlʋ yiɛ 'yli 'wlʋ.

A 'nɩgbö ‑lɛ 'tebhlea wa sianɩɛ wlɩɩ 'klʋ a luukɛ 'wʋ.

12 Zakalii 'yɩɛ Lagɔzuzukwëa 'ylɩmöö,

zuzuu 'bhooo ‑gömö 'n nganɔ yoo köbhä.

13 ‑Maa Lagɔzuzukwëa lɛ naa:

«Zakalii,

tɩ ‑gu,

‑maa Lagɔ yɛ ‑na'a bhibhewɛlɩɩ 'nʋ.

‑Na 'lɛnglɛ Elizabɛtɩ yi nɩkplokwë 'plɩ,

ɔ yi nyɩbhɛlʋyu gwälɩ,

ɔ ‑kɔɔ gwälɩɩ,

'pɔ Zaa.

14 Yu 'la a za,

'mäna 'käda ‑yimö 'wlu 'mänanɩ.

'Ɔ gwälɩgwlɛɛ yi nɩkpa a ‑bɛ 'mäna 'wʋ ‑bhö.

15 Ɛ'ɛ ‑bhö nyɩasɛ,

‑maa nɩkpɛ 'kɔdɔ ɔ 'kää glɩnɩ Lagɔ a 'yila 'klʋ a dɔ'wʋ.

Ɔ'ɔɔ ɔ 'kä duvɛɛ 'nɩmä,

ɔ'ɔɔ ɔ 'kä yɔwʋkanɩnʋ 'nɩmä.

Ɔ ‑wʋ ‑bhlɛ ‑mä ɔ ‑da a 'mlɩ,

'n 'Wugɔmʋʋ 'Wlɩlɩ 'kɔɔ ‑gömö yi.

16 Ɔ yi 'nglɩ ‑kä,

Yizlaɛlɩ 'a ngëyii 'mö a ‑nʋä a ‑bɛ,

wa yi wa ‑lowli Lagɔ yɩbhlɩnɩ.

17 Lagɔ a bhla'mö a 'möbhïlanɩnyɔɔ Elii a saa,

ɔ yi ‑sɩbhä Lagɔ 'a 'Wugɔmʋʋ a 'mötɛɛnɔɔ ghlɩ,

ɔ 'kä Lagɔ a ‑gbäglɛlɛ nʋ.

Ɔ yi 'nglɩ ‑kä,

dɩbawaa ‑nyɛ yʋëa 'sɔ yi wamanɩ.

Ɔ yi'ɛ 'nglɩ ‑kä

nɩkpaa ‑waa 'zʋ a‑a Lagɔ 'klʋkpamöö,

wa yi 'saa nɛnɩɛ Lagɔ dlɩ yɔwʋ nʋ.

Sa'a ɔ 'kää nɩkpaa 'mö zlɔmanɩ,

wa 'kä wa ‑lowli Lagɔ 'a yiyizlɩɩ ‑kʋnɩ.»

18 Lagɔzuzukwëa 'nyɛɛ sa'a Zakalii 'dɩɩ,

ɔ lɛ naa:

«N ‑nyɛ na 'lɛnglɛ 'sɔ ‑a yɛ yɩ gɔ 'wë nɩɩ,

sɛ n 'kɩ bhä dlɩ 'wʋ ‑kä nɩɩ,

‑n bhïlaa da'a ‑tiawɛlɩɛ 'nɩ?»

19 A lɛ naa:

«‑Amö Gablie,

‑amöö ‑wʋä 'kwädlɩ ‑lɛ Lagɔ a 'yila 'klʋ 'n n ‑wɔɔɔ 'ylii,

‑amöä dɛ'ɛ.

Lagɔ mɔɔ tieaaa,

n ‑kamö 'Mänatɩtɩ nɩ 'nyɛ.

20 Wɛlɩ nɩ n nyɩamöä dɛ'ɛɛ,

dɛɛ Lagɔ ‑dɩniɛ,

yɩ yi ‑lɛ 'yli 'wlʋnɩ klɩpaa.

‑Maa ‑n 'niɛ dlɩ 'wʋ ‑kä zaa,

tɛɛnɩ dɛ'ɛ,

‑n ‑kä ‑n 'kä gbʋ ‑dɩɩ,

wɛlɩ 'naa ‑kamö 'wʋ yi,

‑këë,

'n yɩ 'kää 'yli 'wlʋnɩ.»

21 ‑Lɛ a 'tɛnyɩ 'la 'wuë 'mö,

nɩkpaa a ‑bʋbʋʋ ‑wa ‑wʋä ‑lɛ 'pɩwʋʋ,

'n wa 'yɩbhäyɩbhänɩɛ nimï nɩɩ:

«'Ɔ!

Zaa,

sɛ yɩ ‑wʋ ɔ 'mö 'n ɔ yɛ bhä sa'a ‑mä gwälɛ 'nɩ?»

22 Ɔ 'wlʋä ‑mä,

ɔ ‑kä ɔ 'kä bhïlaa,

wɛlɩ 'nɩ yo 'wʋ,

‑maa yɛka a 'yize ɔ yɛkaa.

Wa lɛ naa:

«‑Aaaaa,

‑zɛgaa ‑lu ɔ 'yɩɛ ‑mä 'ylɩmö.»

23 Zakalii 'a libhoo a ylɩɩ bhɩɛ 'wëë,

'n ɔ yiɛ 'ligbë 'mö mö.

24 'Ylɩya 'plɩɛ,

'n ɔ 'lɛnglɛ Elizabɛtɩ yiɛ nɩkplokwë 'plɩ.

Ɔ 'plɩɛ nɩkplokwë 'laa,

zizo ɔ zizoo.

Ɔ ziza‑a ‑këë 'n 'cwɩ ngbï yiɛ 'plɩ.

Ɔ lɛ naa:

25 «Lagɔ yɛa'a ‑sɩkaa na ngäzɩdlɩ 'pä ɔ ‑kaa zʋ 'klʋ 'mö ‑sɛ.»

Lagɔzuzukwë yɛ Malii 'dɩ kwä

26‑27 ‑Lɛ a 'tɛnyɩ 'la 'mö,

bhlɩɩ wa laa Galilee,

‑mä a glɔ ‑bhlʋ wa laa Nazalɛɛtɩ,

‑mä 'dumöwʋyu ‑bhlʋ ‑wʋä,

'mö wa laa Malii.

'Ɔ bhibhewli a nglɩɛ Zɩzɛɛfʋ.

'Bhlɩlowli Daviidɩ a ngëyi 'mö a nɩkpɛɛ.

Elizabɛtɩ a nɩkplokwëa a cʋʋ a gbʋplʋnʋʋ 'mö,

'n Lagɔ yiɛ 'ɔ zuzukwëa Gablie Malii 'wʋ tie,

'n a yoo 'dɩ kwä.

28 A plɛɛ ‑mä 'ɔ mä'aa,

a lɛ naa:

«‑Ayo Malii,

‑nmö pa‑a 'nyu tenyii,

Lagɔ ‑wʋmö nimï.»

29 A gbää sa'aa,

'n Malii dlɩ yoo 'yli klɛ,

'n ɔ yɩbhää ɔnyɩ nimï nɩɩ:

«Wɛlɩɩ a bhïlaa da'aa,

yɩ zɛmö bhä 'nɩ?»

30 Lagɔzuzukwëa lɛ naa:

«Malii,

tɩ ‑gu

‑maa ‑nmö Lagɔ ‑sɛɛ ‑lɛ ɔ ‑kamö tenyii 'nyu 'pä,

31 ‑n yi nɩkplokwë 'plɩ,

‑n yi nyɩbhɛlʋyu gwälɩ,

‑n ‑kɔɔ gwälɩɩ,

'pɔ Zezwii.

32 'Kɔdɔ ɔ 'kää glɩnɩ,

Lagɔtapɛ a 'yu wa 'kɔɔ la.

Ɔ dɩba a dɩba Daviidɩ 'a 'kämanɔɔ,

'mö ‑Alowli Lagɔ 'kɔɔ yowʋ 'nyɛ.

33 Ɔ yi Zakɔɔbö 'a ngëyii ‑gömö 'kämanɩ 'kwädlɩkwädlɩnɩ.

'Ɔ 'kämanɔɔ 'naa 'kä 'bhlenɩdɛ ‑kä.»

34 Lagɔzuzukwëa gbää sa'aa,

'n Malii yeaa nimï 'yɩbhä nɩɩ:

«Sɛɛ ‑mi'la 'kä bhä 'mö 'plɩmöplɩmö 'n n 'kä bhä nɩkplokwë 'plɩ 'nɩ,

n'n‑ä'ɛ ‑bhlɛ tɛkäsɛ nyɩbhɛlʋ a dɛ ghlɛnɩɩ?»

35 A lɛ naa:

«'Wugɔmʋʋ 'Wlɩlɩ mɔɔ ‑kamöä ‑gömö yi,

Lagɔtapɛ 'a 'mötɛɛnɔɔ,

mʋʋ ‑kamöä zɩzɛ 'mö 'pänɩ.

Yuu ‑n 'kää gwälɩɩ,

yɩ za wa 'kɔɔ Lagɔ a 'Yu la,

Lagɔ a 'yize a ‑nɔ.

36 Yɩɛ,

‑na ‑da a ‑daayu Elizabɛtɩ,

ɔ yɛ abhlɩ gɔ,

'n nɩkpaa 'wuë lɛ ‑ɔɔgwälɩnglɔ ɔ glɩnɩ a,

‑maa sɛ'ɛ n nyɩamöä 'dɩ nɩɩ,

ɔ ‑gä nɩkplokwë.

'Ɔ nɩkplokwëa a 'cʋ a gbʋplʋnʋ ‑a ‑wʋä dɛ'ɛ 'mö,

nyɩbhɛlʋyu ɔ 'kä'ɛɛ ɔbhlɩ gwälɩ.

37 Ɛ'ɛ ‑bhö nyɩasɛ,

‑maa ‑lu a ‑muu 'kää Lagɔ kɛ'mö 'tɛɛnɩ,

wʋ'ʋä ‑bhölɩ.»

38 A gbää sa'aa,

Malii lɛ naa:

«Lagɔ a 'yliwʋnglɔ n glɩnɩɛ.

Zaa,

sɛ ‑n gaaa da'aa,

‑sɩbhä nɩ 'wlʋnɩ na dɛ 'yli.»

'N Lagɔzuzukwëa yoo yɔwʋ 'bhöö.

Malii yɛ Elizabɛtɩ 'ylɩmöä mö

39‑40 ‑Lɛ 'nɩɛ 'mö gwälɛ,

'n Malii yiɛ 'wʋ ‑sɔ cuu,

‑mä Zwidee‑bhölɩɩ 'mö a glɔ ‑bhlʋ ‑wʋ ‑wʋä ‑mä ‑gägö jijo'wʋ,

mää Elizabɛtɩ glɩɛ 'n ɔ yiɛ ‑mä mö.

Malii ghlɛɛ glɔɔ,

'n ɔ yiɛ ‑mä Zakalii a 'ligbë 'mö plɛ,

'n ɔ yiɛ Elizabɛtɩ bhälɩ.

41 Elizabɛtɩ 'nʋä Malii 'a bhälɩwɛlɩɩ cuu,

'n yuu yoo 'mlɩ 'clinɩ,

'n 'Wugɔmʋʋ 'Wlɩlɩ yiɛ Elizabɛtɩ ‑gömö bhlinɩ.

42 'N ɔ yiɛ wɛlɩ ghäyɩ 'pä,

ɔ lɛ naa:

«‑Mä nglwɩɩ 'wuë gla'mö a dɔ'wʋ,

‑n pa‑a tenyii 'nyu,

yuu ‑n 'kää gwälɩ,

ɔ pa‑a 'nyu.

43 'Saa n glɩnɩ bhä na a zaa,

'n na ‑lowli a ‑da yii bhä 'ylɩmöä?

44 Yɩɛ,

n 'nʋä ‑na'a bhälɩwɛlɩɩ cuu,

'na yuu ‑ɔ ‑wʋä ‑mä na 'mlɩɩ,

'mäna a za,

'n ɔ yiɛ 'cli.

45 Malii,

‑nmöö kɩɛ dlɩ 'wʋ nɩɩ,

sɛɛ ‑Alowli Lagɔ nyɩamöä 'dɩ,

‑sɩbhä yi 'yli 'wlʋnɩɩ,

‑na'a ‑jɔlʋ.»

Malii yɛ Lagɔ bhlɩnɩ

46 Elizabɛtɩ 'nyɔɔ ‑sɩbhä 'dɩɩ,

Malii lɛ naa:

«N 'ghlimanɩ na ‑lowli Lagɔ a 'nglɩ.

47 'Na dlɩɩ 'wuë 'mäna a 'yize na Puënyɔ Lagɔ a za.

48 Ɛ'ɛ ‑bhö nyɩasɛ,

‑maa ‑amö ɔ 'yliwʋnglɔ ‑ɔɔɔ dɛsɛ ‑kä ‑amö ɔ yɩlɩɛ 'klʋ.

Tɛɛnɩa'a dɛ'ɛ,

'pɩwʋ a nɩkpaa 'wuë,

‑jɔlʋnglɔ wa ‑kaaa la.

49 Ɛ'ɛ ‑bhö nyɩasɛ,

‑maa Lagɔ ‑ɔ 'tɛɛ 'mö,

ɔ ‑kaa ‑li a ‑li 'kädɩ 'wlu nʋ.

'Ɔ nglɩɩ,

'ghïli yɩ 'ghïliɛ.

50 ‑Wa zoo 'klʋkpamöö,

ɔ yi 'kwädlɩkwädlɩnɩ wa ngäzɩdlɩ 'pä.

51 'Ɔ 'kämanɔɔ 'mö,

‑li 'kädɩ ɔ nʋä.

Bhabhawaa,

'mö ɔ klɛnɩɛ ‑kplikpli 'yli.

52 'Kämanɩwa 'kädɩɩ,

'mö ɔ lɛmöä dʋdʋ 'wʋ,

'n ɔ libhïä ‑waaa dɛsɛ ‑kä 'wlu.

53 Ngäzɩwaa,

'mö ɔ nyɛɛ ‑li a ‑li a 'kɔkɔmlɛ,

‑maa ‑wa wʋlʋä,

bɔ wa bɔɔ.

54‑55 Sɛ ɔ 'nyɛ a‑a ‑aa dɩbawa 'dɩ nɩɩ,

ɔ yi 'kwädlɩ wa ngäzɩdlɩ 'pä a dɛ,

ɔ dlɩ pö ‑lɛ 'yize,

nza ɔ 'pää Yizlaɛlɩ 'a ngëyii ‑ɛ ‑wɔɔ 'yli a ngäzɩdlɩ.

Wɛlɩɩ ɔ 'nyɛ a‑a ‑aa dɩba Ablaamö ‑nyɛ ɔ 'yuë a 'yuë 'sɔɔ,

sa'a ‑sɩbhä yɩ 'wlʋnɩɛ 'yli.»

56 Malii sɛ ‑lɛ Elizabɛtɩ yɔwʋ 'cwɩ ta a sɛ,

'n ɔ yiɛ ‑mä 'ɔ mä'a 'wlu sɩbhä.

Sɛ'ɛ wa gwälɩɛ Zaa Batisɩ

(Matie 1.18‑25)

57 Elizabɛtɩ 'a 'wlusɛtɛnyɩɩ ghlɛɛ,

'n ɔ yiɛ nyɩbhɛlʋyu gwälɩ.

58 'Ɔ 'ligbëa yɔwʋ a ‑nʋa ‑nyɛ 'ɔ waa 'sɔ,

wa 'nʋä sɛɛ Lagɔ 'pää da'a tenyii ɔ ngäzɩdlɩɩ,

wa ‑nyɔɔ 'sɔ,

'n wa yiɛ 'mäna 'käda nʋ.

59 'Dimasi ‑bhlʋ 'plɩɛ,

'n yuu a 'wʋdɩtɛnyɩ yiɛ ghlɛ,

'n wa yiɛ 'wlu 'yɩbhä.

Wa lɛ wa 'kɔ ɔ dɩba Zakalii zienɩ.

60 ‑Maa ɔ ‑da lɛ naa:

«N'nn,

ɔ nglɩɛ Zaa.»

61 Wa lɛ naa:

«‑Na nyɔ 'nɩɛ Zaa pa‑a.»

62 'N wa yiɛ yuu a dɩba yɛkayɛkʋ 'mö nimï 'yɩbhänɩ nɩɩ:

«Nglɩ ‑mi yuu 'kä bhä pa‑a?»

63 'N Zakalii yiɛ 'klʋcɛlɩnɩlu 'yɩbhä,

'n ɔ yiɛ ‑lɛ 'cɛlɩ nɩɩ:

«Yuu a nglɩɛ Zaa.»

Ɔ 'celiɛ,

wa 'wuë 'n yɩ yuëë ngli yɩa.

64 ‑Gba ‑bhʋlʋ ‑kpɔ 'mö 'n Zakalii 'a mɩɔɔ yiɛ do,

'n ɔ yiɛ Lagɔ a 'nglɩ 'ghlimanɩ.

65 ‑Wa ‑wʋä ‑lɛ 'wa 'ligbëa ‑kʋkʋyɔwʋ 'wuë,

'n zuzu yuëë ‑gömö 'bhöö.

‑Mä Zwidee‑bhölɩɩ a pɩɔ ‑wʋ ‑wʋä ‑mä ‑gägö 'wlu a ‑gwlɩɩ 'wuë 'möö,

'n tɩtɩɩ yiɛ ‑mä mlɩmanɩ.

66 Nɩkpaa 'wuë wa 'nwiɛ,

'n wa 'päniɛ dlɩ kɛ,

'n wa 'yɩbhäyɩbhänɩɛ nimï nɩɩ:

«Zaa,

yu ‑mɔ'la,

'saa ɔ 'kä bhä 'zʋ 'nɩ?»

Nyɩasɛ wa'aa ‑sɩbhä nʋ,

‑maa ‑Alowli Lagɔ a'bhë,

'ɔ 'mötɛɛnɔɔ mʋʋ ‑wʋä yu 'la ‑gömö.

Zakalii yɛ Lagɔ bhlɩnɩ

67 Yuu a dɩba Zakalii 'n 'Wugɔmʋʋ 'Wlɩlɩ yoo ‑gömö bhlinɩ,

'n ɔ yoo 'mö bhïlanɩ,

ɔ lɛ naa:

68 «‑Abhʋa Yizlaɛlɩ a ‑nʋa,

‑aa ‑lowli Lagɔ a 'nglɩ nɩ 'ghlimanɩ,

sɛ ɔ 'pää ‑aa ngäzɩdlɩ,

'n ɔ ‑yinyɩɛ galɛ 'mö ‑sɛ a za.

69 Ɔ ‑wʋ mä'ä ‑aa jijo'wʋ Puënyɔ ‑ɔ 'tɛɛ 'mö 'yli 'wälanɩ dɔ'wʋ.

‑Aa dɩba Daviidɩ,

Lagɔ a 'yliwʋnyɔ,

ɔ ngëyi 'mö ‑mä ɔ 'bhöönɩɛ.

70 Lagɔ 'a bhla'mö a 'möbhïlanɩwaa,

wɛlɩɩ ɔ bhïlanuë a‑a 'möö,

mɩɩ 'wlʋnɩɛ da'a 'yli.

71 Puënyɔ 'la,

ɔ ‑yinyɩ ‑a'a tʋgwɩwaa ‑nyɛ ‑a'a ‑gblɩwaa 'wuë 'sɔ ngli ‑sɛ.

72 Sa'a ‑sɩbhä ɔ 'kää ‑aa dɩbawa a dɩbawa a ngäzɩdlɩ 'pä.

Ɛ'ɛ ‑bhö nyɩasɛ,

‑maa sɛ ɔ ‑nyʋä 'sɔ wa mɛnɩ a‑a a dɛ,

ɔ dlɩ pö ‑lɛ 'yize.

73 Sɛ'ɛ ɔ zligonɩ a‑a ‑aa dɩba Ablaamö kɛ nɩɩ,

74 ‑abhʋa ɔ 'yuë a 'yuë,

ɔ ‑yinyɩ ‑a'a ‑gblɩwaa ‑gömö ‑sɛ,

wa nganɔ 'naa ‑kanyɩa'a 'lɩbhä,

zaa ‑a yo 'kwädlɩ bʋbɔ 'tɩɩ,

75 ‑a yi ‑lɛ ɔ 'yila 'klʋ a dɔ'wʋ 'wlɩlɩ ‑wʋ,

'saa nɛnɔɔ dlɩ yɔwʋ ‑a yu nʋ,

‑a yi ‑sɩbhä ‑lɛ ɔ 'yila 'klʋ nɛmö ‑a'a zɩkpaa 'wuë 'mö.

76 ‑Nmö ‑naa na 'yu,

Lagɔtapɛ a 'möbhïlanɩnyɔ ‑n 'kää glɩnɩ.

‑Nmöö 'kää ‑Alowli 'yuku ‑gänɩ ‑n 'kä 'ɔ 'yioo ‑sɛ,

77 ‑n 'kä ɔ ‑nʋa 'dɩ 'nyɛ nɩɩ,

ɔ yuë puë,

ɔ yuë 'wa 'nyinylolii a gbʋʋ ‑gömö ‑sɛ.

78 Ɛ'ɛ ‑bhö nyɩasɛ,

‑maa Lagɔ,

dlɩzɛmö ɔ nɛnɩɛ tenyii 'n ɔ kää ngäzɩdlɩ.

Sɛɛ 'zɔkpɔylʋväla wlʋ'ɛ gluu,

Puënyɔɔ ‑ɔ 'bhöönɩɛ ‑mä ɔ dlɩ 'mö,

‑sɩbhä ɔ ‑kanyɩɛ jijo'wʋ 'wlʋ.

79 Nɩkpaa guylukwëa 'kämanɩɛ ‑gömö,

‑wa guä 'kwädlɩnɩ 'kwiee,

ɔ 'kʋä 'wʋ ngäla.

‑A 'wuë,

ɔ ‑kanyɩ 'tɩɩglɩglɛ a 'yioo sʋlʋnɩ.»

80 Sa'a ‑sɩbhä Zakalii 'ghlimanɩɛ Lagɔ a 'nglɩ.

‑Maa yuu ɔbhlɩ,

ɔ 'ghlimanɩ 'yize,

'n ɔ 'nɛmanɩɛ tenyii.

Ɔ 'ghlimanɩɛ ‑mä 'muse 'klʋ,

‑mä ɔ möä glɩnɩɛ.

Ɔ ‑wʋ ‑mä ‑këë,

'n ɔ yia'aa Yizlaɛlɩ a ‑nʋa jijo'wʋ nimï yi.