Matie 1

Zezwii Kliisɩ 'a 'Mänatɩtɩɩ

Matie

'cɛlɩɛ

Zezwii Kliisɩ a dɩba a dɩbawa 'a nglɩɩ

(Lwiikö 3.23‑38)

Zezwii Kliisɩ,

Ablaamö ‑nyɛ Daviidɩ 'sɔ,

'wa ngëyii 'mö ‑mä ɔ 'bhöönɩɛ.

Ɔ dɩba a dɩbawa 'wuë,

'wa nglɩɩ miɛ dɛ'ɛ.

2 Ablaamö mɔɔ gwälɩɛ Yizaakö,

Yizaakö mɔɔ gwälɩɛ Zakɔɔbö,

Zakɔɔbö mɔɔ gwälɩɛ Zwidaa ‑nyɛ ɔ ‑daayuë 'sɔ.

3 Zwidaa ‑nyɛ ɔ 'lɛnglɛ Tamaa 'sɔ,

mʋa gwälɩɛ Falɛɛsɩ ‑nyɛ Zalaa 'sɔ.

Falɛɛsɩ mɔɔ gwälɩɛ Ɛzlɔɔmö,

Ezlɔɔmö mɔɔ gwälɩɛ Aghlamö,

4 Aghlamö mɔɔ gwälɩɛ Aminadaabö,

Aminadaabö mɔɔ gwälɩɛ Naasɔɔ,

Naasɔɔ mɔɔ gwälɩɛ Salɩmɔɔ,

5 Salɩmɔɔ ‑nyɛ ɔ 'lɛnglɛ Ghlaabö 'sɔ mʋa gwälɩɛ Boozɩ,

Boozɩ ‑nyɛ ɔ 'lɛnglɛ Ghlitɩ 'sɔ mʋa gwälɩɛ Obɛɛdɩ,

Obɛɛdɩ mɔɔ gwälɩɛ Yizayii.

6 Yizayii mɔɔ gwälɩɛ 'bhlɩlowli Daviidɩ.

Daviidɩ ‑nyɛ nglɔɔ ɔ ‑sɛɛ Wilii yɔwʋ 'sɔ

mʋa gwälɩɛ Salomɔɔ.

7 Salomɔɔ mɔɔ gwälɩɛ Ghlobʋamö,

Ghlobʋamö mɔɔ gwälɩɛ Abia,

Abia mɔɔ gwälɩɛ Azaa.

8 Azaa mɔɔ gwälɩɛ Zʋzafaatɩ,

Zozafaatɩ mɔɔ gwälɩɛ Zolaamö,

Zolaamö mɔɔ gwälɩɛ Oziasɩ.

9 Oziasɩ mɔɔ gwälɩɛ Zʋataamö,

Zʋataamö mɔɔ gwälɩɛ Akaazɩ,

Akaazɩ mɔɔ gwälɩɛ Ezekiasɩ,

10 Ezekiasɩ mɔɔ gwälɩɛ Manasee,

Manasee mɔɔ gwälɩɛ Amɔɔ,

Amɔɔ mɔɔ gwälɩɛ Zoziasɩ.

11 Dɛ wa gwanɩ a‑a Yizlaɛlɩ 'a ngëyii 'mö a ‑nʋa swɩ nimï 'n wa yuëë ‑mä Babilɔɔnɩ‑bhölɩɩ 'mö kwää,

‑lɛ a 'tɛnyɩ 'la 'mö,

‑lɛ Zoziasɩ gwälɩnɩɛ Zekoniasɩ ‑nyɛ ɔ ‑daayuë 'sɔ.

12 Yizlaɛlɩ 'a ngëyii ‑wʋ ‑bhlɛ ‑mä Babilɔɔnɩ‑bhölɩɩ 'mö

'n Zekoniasɩ yiɛ Salatiɛlɩ gwälɩ.

Salatiɛlɩ mɔɔ gwälɩɛ Zolobabɛɛlɩ.

13 Zolobabɛɛlɩ mɔɔ gwälɩɛ Abiudɩ,

Abiudɩ mɔɔ gwälɩɛ Eliakiimö,

Eliakiimö mɔɔ gwälɩɛ Azɔɔ.

14 Azɔɔ mɔɔ gwälɩɛ Sadɔɔkö,

Sadɔɔkö mɔɔ gwälɩɛ Akiimö.

Akiimö mɔɔ gwälɩɛ Eliudɩ.

15 Eliudɩ mɔɔ gwälɩɛ Eleazaa,

Eleazaa mɔɔ gwälɩɛ Mataa,

Mataa mɔɔ gwälɩɛ Zakɔɔbö.

16 Zakɔɔbö mɔɔ gwälɩɛ Zezwii Kliisɩ

a ‑da Malii a 'luwlii Zɩzɛɛfʋ.

17 Zaa,

yɩ 'wuë 'mö a dɔ'wʋ,

tɛɛnɩ ‑mä Ablaamö a 'tɛnyɩ 'mö ‑këë ‑n 'kä Daviidɩ a 'tɛnyɩ 'mö ghlɛ,

ngäya kʋgbä ‑mʋäna mɩɩ ‑wʋä ‑lɛ jijo'wʋ.

Tɛɛnɩ ‑mä Daviidɩ a 'tɛnyɩ 'mö ‑këë,

'tɛnyɩɩ wa kwää Yizlaɛlɩ 'a ngëyii 'mö a ‑nʋa ‑mä Babilɔɔnɩ‑bhölɩ 'mö,

‑n 'kä ‑lɛ ghlɛ,

ngäya kʋgbä ‑mʋäna mɩɩ ‑wʋä ‑lɛ.

Tɛɛnɩ'ɛ ‑lɛ a 'tɛnyɩ 'la 'mö ‑këë ‑n 'kä Kliisɩ a gwälɩtɛnyɩ 'mö ghlɛ,

ngäya kʋgbä ‑mʋäna mɩɩ ‑wʋ'ɛɛ ‑lɛ.

Wa yɛ Zezwii Kliisɩ gwälɩ

(Lwiikö 2.1‑7)

18 Sɛ wa gwälɩɛ Zezwii Kliisɩ ‑sɩbhä ma‑a dɛ'ɛ.

Ɔ ‑da Malii,

Zɩzɛɛfʋ a bhibhenglɔ ɔ glɩnɩ a‑a.

‑Maa wa'aa ‑bhlɛ yɔwʋ 'diodionɩ 'n 'Wugɔmʋʋ 'Wlɩlɩ 'a 'mötɛɛnɔɔ yiɛ Malii ‑gömö yi,

'n ɔ yiɛ nɩkplokwë 'plɩ.

19 Zɩzɛɛfʋ,

Lagɔ a 'yila 'klʋ a dɔ'wʋ,

nɩkpɛ a ‑mɔ zlɔnɩ 'mö,

'mö ɔ glɩnɩɛ.

Zaa,

ɔ 'yɩbhä ɔ ‑nyɛ Malii 'sɔ wa 'kä 'wi 'mö 'ylimö ‑sɛnɩ,

ɔ tɔa nɩkpabhë a 'yila 'klʋ zʋ 'lɩbhanɩ.

20 Ɔ ‑wʋ sa'a dlɩ 'pä dɔ'wʋ,

'n Lagɔzuzukwë ‑bhlʋ yoo 'yɛla 'mö 'ylimö ghlɛ 'n a yoo 'dɩ 'nyɛ,

a lɛ naa:

«Daviidɩ a 'yu a 'yu Zɩzɛɛfʋ,

‑n 'kä Malii kwä a dɔ'wʋ,

tɩ ‑gu,

‑maa nɩkplokwë 'la ɔ ‑gää,

'Wugɔmʋʋ 'Wlɩlɩ 'a 'mötɛɛnɔɔ mʋʋ yoo ‑gömö 'n ɔ yeaa 'plɩ.

21 Nyɩbhɛlʋyuu ɔ 'kää gwälɩɩ,

'pɔ Zezwii.

Ɛ'ɛ ‑bhö nyɩasɛ,

‑maa mɔɔ 'kää 'ɔ ngëyii 'mö a ‑nʋa puë,

miɛ nɩɩ,

mɔɔ 'kʋää 'wa 'nyinylolii a gbʋʋ ‑gömö ‑sɛ.»

22 Wɛlɩ 'la 'wuë,

'fʋ yɩ'ɩɛ ‑sɩbhä 'wʋ 'plɩ,

‑maa wɛlɩɩ ‑Alowli Lagɔ bhïlanɩ a‑a ɔ 'möbhïlanɩnyɔ Ezayii 'möö,

yɩ 'kä 'yli 'wlʋnɩ a za,

nza yɩ 'plɩɛ ‑sɩbhä 'wʋ.

23 Sɛ'ɛ Ezayii gbä a‑a nɩɩ:

'Dumöwʋyu a ‑mɔ ‑ɔɔɔ ‑bhlɛ tɛkäsɛ nyɩbhɛlʋ yɩbhlɩnɩɩ,

ɔ yi nɩkplokwë 'plɩ,

ɔ yi nyɩbhɛlʋyu gwälɩ.

Yu 'la,

'mö wa 'kää Emanwiɛlɩ 'pä.^a

Nglɩ 'la,

mɩɩ sɛɛ zɛmö nɩɩ:

«Lagɔ ‑wʋnyɩ jijo'wʋ.»

24 Zɩzɛɛfʋ gɔlɔɔ,

sɛɛ Lagɔzuzukwëa nyɔɔ 'yɛla 'mö 'dɩɩ,

‑sɩbhä ɔ 'zʋä 'klʋkpamö 'n ɔ yiɛ Malii kwä.

25 ‑Maa ɔ ‑nyɔɔ 'nɩɛ ‑lɛ ‑wʋ,

‑këë 'n Malii yiɛ 'ɔ tɛkäyuu gwälɩ.

'N Zɩzɛɛfʋ yoo Zezwii 'pä.