Lwiikö 2

Sɛ'ɛ wa gwälɩɛ Zezwii

(Matie 1.18‑25)

‑Lɛ a 'tɛnyɩ 'la 'mö,

'bhlɩlowli 'kɔdɔɔ Ogwiisɩ lɛ wa nɩ zɛlɩ nɩkpaa 'wuë,

wa kʋä 'bɔgʋ 'mö 'zʋ.

2 'Tɛnyɩ 'mö Kilinwiisɩ glɩnɩ a‑a bhlɩɩ wa laa Silii a ‑gɔmla 'kɔdɔɔ,

‑lɛ wa nʋnɩɛ libho 'la,

‑maa 'wʋ tɛkä wa nuä da'a.

3 Zaa,

'n nɩkpaa 'wuë yiɛ ‑mä wa 'bhili mö wa 'kʋä 'bɔgʋ 'mö zʋ.

4 Zɩzɛɛfʋ ɔbhlɩ,

‑mä Galilee‑bhölɩɩ 'mö a ‑glɔɔ wa laa Nazalɛɛtɩ,

'n ɔ yiɛ ‑mä 'bhöö,

‑mä Zwidee‑bhölɩɩ 'mö a ‑glɔɔ wa laa Betelɛɛmö,

‑mä 'bhlɩlowli Daviidɩ a 'bhele,

'n ɔ yiɛ ‑mä mö.

Zɩzɛɛfʋ a'bhë,

Daviidɩ a 'yu a 'yu ɔ glɩnɩɛ.

5 Nza ɔ möä ‑mä,

ɔ ‑nyɛ ɔ bhibhenglɔ Malii 'sɔ,

wa 'kʋä 'bɔgʋ 'mö 'zʋmö.

'Tɛnyɩ 'la 'mö,

Malii ‑wʋ sasɛ.

6 Wa ‑wʋ ‑mä Betelɛɛmö,

'n Malii a 'wlusɛtɛnyɩɩ yiɛ ghlɛ.

7 'N ɔ yiɛ 'ɔ tɛkäyuu gwälɩ,

nyɩbhɛlʋyuä.

'N ɔ yoo ‑yʋkwie yɔwʋ 'pä,

'n ɔ yoo ‑mä nɩma a 'mölinɩkäkaa 'mö sɛ 'pïla.

Ɛ'ɛ ‑bhö nyɩasɛ,

‑maa ‑mä lowluwaa a 'mögʋʋkïbhëa 'mö,

wa'aa ‑mä 'bhle ghlɩ.

Lagɔzuzukwë yɛ wïlaa a 'ylizʋnɩwaa 'dɩ 'kwä

8‑9 Betelɛɛmö a ‑kʋkʋyɔwʋ a 'lagbïlea 'mö,

wïla a 'ylizʋnɩwa ‑wʋ a ‑mä.

Swe yluä,

'n wa ‑nyɛ 'wa wïlaa yiɛ ‑mä gʋʋ.

Wa ‑wii ‑kʋ dɔ'wʋ,

'n Lagɔzuzukwë ‑bhlʋ yuëë ‑mä ghlɩ.

'N Lagɔ 'a 'ghïlinɔɔ yuëë 'wʋ ngäla.

'N nganɔ yuëë tenyii 'lɩbhä.

10 ‑Maa Lagɔzuzukwëa lɛ naa:

«Nganɔ nɩ tanyɩ 'lɩbhä,

‑maa 'Mänatɩtɩ a ‑mii 'kää 'a bhlɩɩ 'wuë 'mäna 'mö päla tenyii,

'mö n ‑laanyɩɛ.

11 Miɛ nɩɩ,

sabɔɔ nɩ,

‑mä 'bhlɩlowli Daviidɩ a 'bhele Betelɛɛmö,

wa kanyɩ ‑mä Puënyɔ 'wʋ gwälɩ,

Kliisɩ,

‑Alowli,

mɔɔ.

12 ‑Maa a ‑kä ‑mä möö,

'saa a 'kɔɔ 'mö yɩbhlɩnɩɩ,

muä nɩɩ:

A yi dɛ ‑bhlʋ 'yu 'pʋpɔ 'ylɩmö.

Ɔ pa‑a ‑yʋkwie yɔwʋ.

Mää nɩmaa linɩɛ,

ɔ pö ‑mä,

mɔɔ.»

13 Cuu,

'n Lagɔzuzuku ‑mimii a 'kɔkɔmlɛ yi'ɛɛ tɛkänaa ‑gömö yinɩ,

yɩ 'wuë,

'n yɩ yiɛ 'lʋ 'wʋ ‑dɩ.

Yɩ lɛ naa:

14 «Lagɔtapɛ a 'nglɩ nɩ 'ghlimanɩ.

Mä'ä dʋdʋ 'wʋ a nɩkpaa 'wuë,

sɛ ɔ ‑wʋää a za,

'pʋpʋɛ nɩ ghölʋä 'wʋ.»

Wïlaa a 'ylizʋnɩwaa yɛ ‑mä Betelɛɛmö mö

15 'N Lagɔzuzukuu yuëë yɔwʋ 'bhöö,

'n yɩ yiɛ ‑mä Lagɔ yɔwʋ mö.

'N wïlaa a 'ylizʋnɩwaa yiɛ 'dɩ 'nyɛnyɛnɩ nɩɩ:

«Yɩ ‑kä sa'a 'mö ‑wʋʋ,

a‑a 'kä ‑mä Betelɛɛmö mö,

'saa 'plɩɛ ‑mä 'wʋ,

wɛlɩɩ ‑Alowli Lagɔ 'bhöönyɩɛ da'a 'nyɛɛ,

‑a 'kɩ 'ylɩmö.»

16 'N wa yiɛ ‑sɩkaa ‑sɩkaa 'wʋ ‑sɔ,

wa 'kä ‑mä mö.

Wa möä,

'n wa yiɛ ‑lɛ Malii ‑nyɛ Zɩzɛɛfʋ 'sɔ ghlɩnɩ.

'Yu 'pʋpɔɔ pö ‑mä nɩma a 'mölinɩkäka 'mö.

17 Wa 'yɩɛ yuu 'ylɩmöö,

wɛlɩɩ Lagɔzuzukwëa 'nyʋä a‑a ɔ dɛɛ,

'n wa yiɛ yɩ 'tɩtɩ ‑sɛ.

18 ‑Maa nɩkpaa 'wuë,

‑wa ‑wʋä ‑lɛ,

wa 'nʋä wïlaa a 'ylizʋnɩwaa a tɩtɩ 'laa,

zuzu yɩ ‑sʋää ‑gömö.

19 ‑Maa Malii ɔbhlɩ,

wɛlɩ 'la,

dlɩ zɛmö ɔ 'zwiɛ 'n ɔ 'päniɛ dlɩ kɛ.

20 'N wïlaa a 'ylizʋnɩwaa yiɛ 'wlu sɩbhä.

Wa ‑wʋ Lagɔ a 'nglɩ 'ghlimanɩ dɔ'wʋ,

'saa 'wuë wa 'yɩɛ 'ylɩmö a za.

Ɛ'ɛ ‑bhö nyɩasɛ,

‑maa sɛɛ Lagɔzuzukwëa 'nyʋä a‑a 'dɩɩ,

‑sɩbhä yɩ 'plɩɛ 'wʋ 'tɩɩ.

Wa yɛ Malii 'a yuu 'nglɩ 'pä

21 'Dimasi ‑bhlʋ 'plɩɛ,

'n yuu a 'wʋdɩtɛnyɩ yiɛ ghlɛ.

Dɛɛ Malii 'nɩ a‑a ‑bhlɛ nɩkplokwëa 'plɩ a nglɩɩ,

Lagɔzuzukwëa gbä a‑a wa nɩ 'pä yuu,

'n wa yonyɩɛ 'pä.

Yɩ nglɩɛ Zezwii.

Wa yɛ Zezwii ‑mä Lagɔbudu 'kɔdɔɔ 'mö tulaa

22 ‑Mi'la 'plɩɛ 'wëë,

wa ‑kä 'yu gwälɩ a sɛɛ Moyizɩ 'a Gböö gbää wa nɩ 'zʋ,

wa 'käa 'wlɩlɩ plɛ Lagɔ 'yila 'klʋ a dɔ'wʋʋ,

'n Zɩzɛɛfʋ ‑nyɛ Malii 'sɔ 'a 'tɛnyɩ yiɛ ghlɛ,

wa 'kä ‑sɩbhä 'zʋ.

'N wa ‑nyɛ yuu yiɛ ‑mä Zeluzalɛɛmö mö wa 'kɔ Lagɔ yowʋ 'nyɛ,

ɔ 'kä ɔ 'yize a ‑nɔ glɩnɩ.

23 Ɛ'ɛ ‑bhö nyɩasɛ,

‑maa sɛ'ɛ yɩ cɛlɩ ‑mä Lagɔ 'a Gböö a 'bɔgʋʋ 'mö nɩɩ:

Tɛkänyɩbhɛlʋyuëa 'wuë,

wa nɩ 'nyʋä Lagɔ yowʋ wa 'kä ɔ 'yize a ‑nʋä glɩnɩ.^a

24 'N sɛɛ Lagɔ 'a Gböö gbä'ɛɛ wa nɩ bʋbɔnɩ ‑kpakwie 'sɔ 'n ɛ ‑kä'ɛ ‑kpakwieyuë 'sɔɔ,

wa 'kä ‑sɩbhä zʋ nza wa möä ‑mä.

Simeɔɔ yɛ Zezwii a 'pʋpɔ 'ylɩmö

25 ‑Lɛ a 'tɛnyɩ 'la 'mö,

‑mä Zeluzalɛɛmö,

nɩkpɛ ‑bhlʋ ‑wʋ a ‑mä,

ɔ nglɩɛ Simeɔɔ.

Nɩkpɛ 'la,

Lagɔ 'mö ɔ zʋä 'klʋkpamö 'tɩɩ 'n ɔ ‑kʋnɩɛ Kliisɩ,

Puënyɔɔ Lagɔ ‑sɛɛ ‑lɛ,

‑ɔ 'kää Yizlaɛlɩ a ngëyi puëë.

'Wugɔmʋʋ 'Wlɩlɩ ‑wʋ Simeɔɔ ‑gömö.

26 Mɔɔ 'nyɔ a‑a 'dɩ nɩɩ,

ɔ 'naa 'kää ‑bhlɛ 'ku,

'n ɔ 'nɩɛ Puënyɔɔ ‑Alowli Lagɔ ‑sɛɛ ‑lɛ 'ylɩmö 'wëë.

27 ‑Maa 'tɛnyɩ 'mö Zezwii a ‑lowluwa ‑nyɔɔ lɛ 'kää ‑mä Lagɔbudu 'Kɔdʋʋ 'mö mö,

sɛɛ Lagɔ 'a Gböö gbää wa nɩ 'zʋ ɔ dɛ wa 'kä ‑sɩbhä 'zʋʋ,

'n 'Wugɔmʋʋ 'Wlɩlɩ yiɛ Simeɔɔ 'dɩ 'nyɛɛ nɩɩ,

ɔ nɩ mö ‑mä Lagɔbudu 'Kɔdʋʋ 'mö.

'N ɔ yiɛ ‑mä mö.

28 Ɔ 'yɩɛ yuu 'ylɩmöö,

'n ɔ yoo 'wʋ 'libhï,

'n ɔ yiɛ Lagɔ a 'nglɩ 'ghlimanɩ,

ɔ lɛ naa:

29 «‑Atʋ Lagɔ,

‑amö ‑na 'yliwʋnyɔ

‑na'a sɛ ‑n nyɩaa a‑a 'dɩɩ,

‑sɩbhä yɛa'a 'yli 'wlʋnɩ.

'Na dlɩ yɛa'a 'mö yi 'tɩɩ,

‑n ‑kaa kie yii,

yɩ nɛnɩ.

30‑31 Ɛ'ɛ ‑bhö nyɩasɛ,

‑maa Puënyɔɔ ‑n tiee 'bhlɩbhëa 'wuë 'wʋʋ,

'na yilaa 'sɔ ‑kpɔ kɔ 'ylɩmö.

32 Mɔɔ 'kää 'bhlɩbhë ‑gömö a nɩkpaa 'wuë 'wʋ ngäla nzɩɩ wa ‑kamö yɩbhlɩnɩ.

Ɔ yi 'nglɩ kä,

Yizlaɛlɩ 'a ngëyii ‑n ‑sɛɛ ‑lɛ 'mö a ‑nʋa,

wa yi 'nglɩ mö.»

33 Simeɔɔ bhïlaa ‑sɩbhä yuu a dɛɛ,

yuu a dɩba ‑nyɛ ɔ ‑da 'sɔ,

zuzu yɩ ‑sʋää ‑gömö tenyii.

34 'N Simeɔɔ yuëë 'nyu 'pä,

'n ɔ yiɛ yuu a ‑da Malii 'dɩ 'nyɛ nɩɩ:

«Yu nɩ Lagɔ ‑sɛɛ ‑lɛ,

ɔ yi 'nglɩ ‑kä Yizlaɛlɩ a ‑nʋä ‑mumuë a ‑bɛ,

Lagɔ yuë gbʋ köbha ‑maa Lagɔ ‑nyɛ ‑mumuë a ‑bɛ yi wamanɩ.

Nɩkpɛ a ‑mɔɔ 'kää Lagɔ 'a dlɩpäsaa 'yli 'wälanɩ 'mö ɔ 'kää glɩnɩ.

‑Sɩbhä a za nɩkpa a ‑bɛ 'nɩɛ wa 'kä ‑waa,

35 ɔ za,

nɩkpa a dlɩpäsa yi zɩkpa bhli.

‑Maa ‑nmö ‑naa Malii,

ngäzɩ a 'kädɩ ‑yimö ɔ za dlɩ yila.»

Lagɔ a 'möbhïlanɩnglɔ Aanɩ yɛ Zezwii a 'pʋpɔ 'ylɩmö

36 ‑Lɛ a 'tɛnyɩ 'la 'mö,

Lagɔ a 'möbhïlanɩnglɔ ‑bhlʋ ‑wʋmö a ‑mä Zeluzalɛɛmö,

ɔ nglɩɛ Aanɩ.

‑Gligbëa wa laa Azɛɛ,

a 'wʋ a nɩkpɛ ‑bhlʋ wa laa Faniɛlɩ,

ɔ 'yu Aanɩ glɩnɩɛ.

‑Maa nglɔ 'la ‑gɔ ɔ ‑gɔɔ tenyii.

Ɔ ‑wʋ 'du 'mö a ghlɩɩ ɔ mö a‑a a 'luwlii,

ɔ ‑sɔɔ 'ylʋbö ngbi'sɔ yɔwʋ 'n 'luwlii yiɛ 'ku.

37 Ɔ 'luwli 'kuä 'wëë,

ɔ'ɔa'a ghlɩ ‑mɛmɛɛ mö 'n ɔ yiɛ gɔ,

'n ɔ yiɛ 'ylʋbö a gwlɩ ‑mʋäna 'ylʋbö ‑mʋäna ghlɩ.

Nglɔ 'la,

ɔ'ɔ 'bhöö 'kwädlɩ ‑mä Lagɔbudu 'Kɔdʋʋ 'mö.

‑Maa sɛɛ zila zɩɛ,

sɛɛ swe yluä,

ɔ ‑wʋ ‑mä 'n ɔ bʋbɔɔ Lagɔ.

Ɔ plɛ su 'n ɔ bhibhee Lagɔ 'kwädlɩ.

38 Zezwii a ‑lowluwa ‑nyɔɔ ‑wʋ ‑bhlɛ ‑mä Lagɔbudu 'Kɔdʋʋ 'mö,

'n nglɔ 'la yiɛ ‑lɛ ghlɛ.

Ɔ 'yɩɛ yuu 'ylɩmöö,

'n ɔ yiɛ ɔ za Lagɔ a 'nglɩ 'ghlimanɩ.

'Bhöönɩa'a ‑lɛ,

nɩkpa 'wuë ‑wa ‑kʋnɩ a‑a zlɩɩ ‑ɛnyɩɩ 'mö Lagɔ 'kää Zeluzalɛɛmö a ‑nʋa galɛ 'mö ‑sɛɛ,

'n ɔ nyʋäa'aa yuu a 'dɩ.

Zezwii a ‑lowluwa yɛ ‑mä Nazalɛɛtɩ 'bɩwʋ mö

39 Sɛɛ Lagɔ 'a Gböö gbää wa nɩ 'zʋ,

Zezwii a ‑lowluwa 'zʋä ‑sɩbhä 'wëë,

'n wa ‑nyɛ yuu yiɛ 'wlu sɩbhä,

‑mä Galilee‑bhölɩɩ 'mö a ‑glɔɔ Nazalɛɛtɩ,

mä wa glɩ a‑a,

'n wa yiɛ ‑mä 'bɩwʋ mö.

40 Mä'a wa glɩa'aa,

'n yuu 'ghlimanɩɛ 'yize 'n ɔ ‑jɩbhɛɛ.

'Ɔ 'nɛɛnɔɔ,

zumanɩ wʋ zumanɩɛ tenyii,

'n ɔ ‑bhöä Lagɔ 'mäna 'wʋ.

Zezwii kä 'ylʋbö kʋgbä 'sɔ 'n ɔ yiɛ ‑mä Lagɔbudu 'Kɔdʋʋ 'mö plɛ

41 'Ylʋbö 'wuë 'mö,

‑mä Zeluzalɛɛmö,

‑mä Zezwii a ‑lowluwa möä Galɛ'möwlʋfɛtɩɩ ‑sɛnɩɛ.

42 Zaa,

ɛ ghlɛɛ,

'n wa yee ‑sɛɛ mö,

'wa 'kwädlɩ a saa.

‑Lɛ a 'ylʋba 'la 'mö,

Zezwii kä 'ylʋbö kʋgbä'sɔ zaa,

ɔ 'mämö.

43‑45 'Fɛtɩ bhɩɛɛ 'wëë,

'n wa yiɛ ‑mä Nazalɛɛtɩ 'bɩwʋ mö.

‑Maa wa lɛ 'kää 'wʋ ‑sɔɔ yii,

wa'aa Zezwii 'ylɩmö,

wa ‑tɔnɩ wabhlɩ wa 'bhɩa 'mö ɔ bhlinɩ 'bɩwʋ zaa,

wa ‑wɔɔ ‑mä 'wa waa ‑nyɛ 'wa ‑yiyiwaa 'sɔ gla'mö sɛ tɛlɩ dɔ'wʋ,

'n wa yiɛ mö.

‑Maa gbëaa 'mö a dɔ'wʋ,

Zezwii ɔbhlɩ,

wa lɛ 'kää 'wʋ ‑sɔɔ yii,

‑mä Zeluzalɛɛmö,

‑mä ɔ tʋʋä.

Wa ‑sɛ 'ylɩ ‑bhlʋ 'yio 'wʋ,

‑sɩbhä wa tɛlɔɔ sɛ 'yize,

‑maa wa 'nɔɔ ghlɩ.

'N wa yia'aa ‑mä Zeluzalɛɛmö 'bɩwʋ mö,

wa ‑wɔɔ sɛ tɛlɩ dɔ'wʋ 'yize.

46 Wa tɛlɔɔɔ sɛ ‑këë a ylɩɩ a tanɛɛ 'mö,

'n wa yoo ‑mä Lagɔbudu 'Kɔdʋʋ 'mö ghlɩ.

Ɔ glɩ ‑mä Moyizɩ 'a Gböö a 'cɩawaa jijo'wʋ.

Wa ‑kä bhïlaa,

ɔ ‑pʋnɩ 'yukwli,

'n ɔ 'yɩbhʋää nimï.

47 ‑Maa ɔ'bhë,

ɔ ‑kä bhïlaa,

'ɔ sɛ ɔ sɛɛ wɛlɩ ‑gömöö,

‑wa ‑pʋnɔɔ 'yukwli 'wuë,

zuzu yɩ sʋää ‑gömö 'ɔ 'nɛɛnɔɔ a za.

48 Ɔ ‑lowluwa ghlɩnɔɔɔ ‑mä,

nglii yʋää tenyii.

'N ɔ ‑da yoo nimï 'yɩbhä nɩɩ:

«Na 'yu,

sɛ yɩ ‑wʋ ɔ 'mö,

n‑n ‑yinyɩ bhä sa'a a ‑li 'wlu nʋ 'nɩ?

N ‑nyɛ ‑na dɩba 'sɔ,

‑a ‑wʋmöä sɛ tɛlɩ dɔ'wʋʋ,

‑a'a dilaa 'mö yɩ ‑ki a‑a tenyii.»

49 Ɔ lɛ naa:

«Sɛ yɩ ‑wʋ ɔ 'mö 'n a tɛlɩɩ a bhä sɛ 'nɩ?

A'a bhä sɛ ‑yi nɩɩ,

na dɩba Lagɔ 'a libhoo a gbʋʋ,

mʋʋ kää wʋ ‑kaa tenyii plɛnɩ ‑a?»

50 Ɔ nʋä sa'aa,

ɔ ‑lowluwa 'niɛ 'wuë 'mö 'nʋ 'lɩlɩlɩ.

51 'N wa ‑nyɔɔ yiɛ ‑mä Nazalɛɛtɩ 'bɩwʋ mö.

Wa ‑kä ‑lɛ glɩɩ,

ɔ zuë 'klʋkpamö.

‑Maa ɔ ‑da ɔbhlɩ,

‑li 'la 'wuë ɔ 'niɛ 'kwädlɩ 'wʋ dlʋ,

‑maa dlɩ zɛmö ɔ zwiɛ.

52 Sɛɛ Zezwii 'ghlimanɩɛ 'yize,

‑sɩbhä 'ɔ 'nɛɛnɔɔ zumanɩɛ Lagɔ 'a wɛlɩɩ 'mö a dɔ'wʋ,

'n ɔ ‑bhöä Lagɔ ‑nyɛ nɩkpa 'sɔ 'mäna 'wʋ 'kwädlɩ.