1 Iohane 1

Surana

Iohane

to Rungu-runguna

Molámbiꞌ toSarani

i kaꞌaraꞌámi

1 Sura to kuꞌukiꞌákou deꞌe,

mokana i Ngkóráꞌ to mopaꞌara katueꞌ.^a

Ngkóráꞌ iti,

ara miꞌi ami hangko i rungu-runguna,

hangko tiꞌara mani duniáꞌ deꞌe rapopewaliꞌ.

Hai kaiꞌ topeguruna Iesu,

kihádi miꞌi,

kiꞌita mata,

kisabiki,

hai kipekamaꞌ miꞌi wátáNa.

2 To mopaꞌara katueꞌ iti haweꞌ miꞌi i duniáꞌ deꞌe,

hai kiꞌita miꞌi.

Onoꞌ miꞌi haneꞌi kipakanótóámokou kaheánáNa.

Kisabiki kaꞌIana to mopaꞌara katueꞌ to maroꞌa to tiꞌara mokahópóꞌá.

Ia to ara hingkakani hai Pueꞌ Ala Umántaꞌ,

haweꞌ miꞌi i kaiꞌ.

3 Apa to kiꞌita hai kihádi miꞌi,

iti to kipahaweꞌákou,

bona kómu woꞌo mepoinálái hai peisákou mohintuwuꞌ hai kaiꞌ i lalu pohintuwuꞌkiꞌ hai Pueꞌ Ala Umántaꞌ hai Iesu Kerisitu ÁnáꞌNa.

4 Kiukiꞌákou deꞌe,

bona góeꞌ ntepuꞌuangkaiꞌ.^b

Hangaa-ngaa tueꞌkeꞌ i lalu kamabaa

5 Deꞌe miꞌi bámbári to kihádi hangko i Iesu haneꞌi kipahaweꞌákou:

Pueꞌ Ala peisá rapándiriꞌ nodo pewangkaꞌ.^c

Tiꞌara ara kamakáindiNa.

6 Ane tauliꞌ mohintuwuꞌkeꞌ hai Pueꞌ Ala,

agáiáná katoꞌuána mobábehikeꞌ oaꞌ to kadake nodokeꞌ to tueꞌ i lalu kamakáindi,

modongkoꞌkeꞌ hai tiꞌarakeꞌ mampeuláꞌi paturoꞌ to toꞌu.

7 Agáiáná ane mobábehikeꞌ oaꞌ to maroꞌa láwiꞌ tueꞌkeꞌ i lalu kamabaa,

nodo Pueꞌ Ala ara i lalu kamabaa,

mohintuwuꞌkeꞌ hadua hai hadua,

hai waheꞌna Iesu ÁnáꞌNa mobahoꞌikeꞌ hangko i upu-upu dósántaꞌ.

8 Ane tauliꞌ tiꞌara ara dósántaꞌ,

modongkokikeꞌ wátántaꞌ haduduántaꞌ hai tiꞌarakeꞌ mopailalu paturoꞌ to toꞌu.

9 Agáiáná ane tapangákuꞌ dósántaꞌ,

Pueꞌ Ala ina mobukeki dándiNa i kitaꞌ:

Ia ina moámpungi upu-upu dósántaꞌ,

hai ina mopamagasaꞌ laluntaꞌ hangko i upu-upu to kadake,

láwiꞌ Ia mobábehi apa to manótó i kitaꞌ.

10 Ane tauliꞌ tiꞌara mpuꞌukeꞌ madósá,

lempóna mampopodongkoꞌmokeꞌ Pueꞌ Ala,

hai tiꞌara tapailalu ngkóráꞌNa.^d