Surana
Peturuꞌ
to Karongkánina
1
Molámbiꞌ toSaranii kaꞌaraꞌámi
1 Sura deꞌe hangko i kódóꞌ Simoꞌ Peturuꞌ huoꞌána hai surona Iesu Kerisitu.
Kupakatu sura deꞌe i kómu halalu-halalu to mepoinálái i Iesu Kerisitu.
Iesu Kerisitu Ia miꞌi Pueꞌ Ala to mohómpókikeꞌ hangko i huku dósántaꞌ.
Ánti bábehiáNa to manótó iti,
Napopewaliꞌmokou taunáNa to mepoinálái i Hia,
hibali hai kaiꞌ suroNa.
2 Tabeá!
Kupembiáꞌ i Pueꞌ Ala bona tetámbái pewátiꞌ hai roꞌa ngkatueꞌ to Naweꞌikou,
ánti kaniꞌisána miꞌi Pueꞌ Ala hai Iesu Pueꞌtaꞌ.
Hangaa-ngaa maróhó pepoináláintaꞌ hai maroꞌa bábehiántaꞌ
3 Moliu kuasaꞌNa,
Pueꞌ Ala mampoweꞌimokeꞌ upu-upu to taparaluu bona molámbiꞌkeꞌ katueꞌ to woꞌu hai maróhó peuláꞌtaꞌ i Hia.a
Naweꞌimokeꞌ upu-upu iti láwiꞌ moisá ntepuꞌumokeꞌ Pueꞌ Ala,
hai Ia to mokióꞌkeꞌ mewaliꞌ ánáꞌNa ánti peawaꞌNa hai kamaroꞌana laluNa.
4 Moliu peawaꞌNa hai kamaroꞌana laluNa iti,
Napaꞌara dándi,
hai mahile ntepuꞌu bunduꞌna i kitaꞌ.
TunggáiáNa mopaꞌara dándi iti i kómu,
bona pambiárámi peisá mewaliꞌ hibali hai pambiárána Pueꞌ Ala,b
hai bona tekábáhákou hangko i peundeꞌána lalumi to kadake to mopamarugiꞌ peá laluraꞌ tauna i duniáꞌ deꞌe.
5 Halalu-halalu,
iti miꞌi kamaroꞌana Pueꞌ Ala i kómu.
Onoꞌ miꞌi haneꞌi,
i rawa hangko i pepoináláimi,
hangaa-ngaa nibábehi oaꞌ apa to maroꞌa.
Liu hangko ionoꞌ,
hangaa-ngaa manótó pekirimi.
6 Melingkaꞌ hangko ionoꞌ,
hangaa-ngaa niꞌisá momeeꞌ peundeꞌána lalumi.
Hangaa-ngaa mantahakou i lalu kapári.
Hangaa-ngaa mengkoruꞌkou i Pueꞌ Ala.
7 Hangaa-ngaa mampokaꞌahiꞌkou halalu hampepepoináláimi.
Hai hangaa-ngaa maꞌahiꞌkou i upu-upu tauna.
8 Ane noꞌonoꞌ pambiárámi
hai nitámbái oaꞌ kamaroꞌana pambiárámi,
ina mobunduꞌ ntepuꞌu katueꞌmi,
láwiꞌ ina niꞌisá mpiiꞌ Pueꞌtaꞌ Iesu Kerisitu.
9 Agáiáná tauna to tiꞌara noꞌonoꞌ,
nodo tobilo ba to tiꞌara karaoꞌ pampekirina,
láwiꞌ nakáláliꞌá kateámpungina miꞌi dósána.
10 Mewaliꞌ halalu-halalu,
láwiꞌ napileꞌimokou Pueꞌ Ala hai Nakióꞌmokou mewaliꞌ taunáNa,
onoꞌ miꞌi haneꞌi hangaa-ngaa nipári-pári ntepuꞌu mouláꞌ Pueꞌ Ala,
bona tongawaꞌ kaNapileꞌimi hai kaNakióꞌmi.
Láwiꞌ ane nitámbái pepoináláimi hai bábehiá to kuꞌuliꞌ ininá,
bateꞌna tiꞌarakou ina mosuliꞌ hangko i pepoináláimi,
11 hai i alo to ina haweꞌ,
Pueꞌ Ala ina motarimakou i lalu popárentána Iesu Kerisitu Pueꞌtaꞌ Topohómpóꞌ Salaꞌ.
Hai popárentáNa iti tiꞌara ina mokahópóꞌá.
Peawaꞌna Iesu Kerisitu rasabiki suroNa
12 Mewaliꞌ halalu-halalu,
kehapiꞌ niꞌisá miꞌi katoꞌuna upu-upuna iti,
hai maróhó pampeuláꞌimi paturoꞌ iti,
kupoinao oaꞌ bona nibuhinao.
13-14 Láwiꞌ kuisá miꞌi tiꞌara piꞌi marue ina mateaꞌ hintotoꞌ hai apa to napahaweꞌámoꞌ Iesu Kerisitu Pueꞌtaꞌ.c
Mewaliꞌ,
tangaꞌkuꞌ mani tueꞌ,
hangaa-ngaa kupahaweꞌákou bona nibuhinao upu-upu iti.
15 Onoꞌ miꞌi haneꞌi kupári-pári mopaturoꞌkou,
bona ane kupálehimokou,
ina nibuhinao oaꞌ upu-upu paturoꞌkuꞌ.d
16 Kódóꞌ hai surona Iesu to ntániꞌna,
mopaturoꞌmokou kamaróhóna kuasaꞌna Pueꞌtaꞌ Iesu Kerisitu hai kaꞌina haweꞌNa huleꞌ i duniáꞌ.
To kipaturoꞌákou iti,
tiꞌara darita dongkoꞌ.
Kiꞌisá apa to kipaturoꞌákou,
láwiꞌ kiꞌita mata peawaꞌna Iesu.
17 Hangkoia meuláꞌangkaiꞌ i Iesu lao i wongko buluꞌ tempóNa motarima pebiláꞌ hai peawaꞌ hangko i Pueꞌ Ala UmáNa to meawaꞌ ntepuꞌu.
I tempó iti,
nauliꞌ Pueꞌ Ala,
“Deꞌe miꞌi ÁnáꞌKuꞌ to Kupokaꞌahiꞌ hai Kupokagóeꞌ.”e
18 Kaiꞌ miꞌi to mohádi wambaꞌNa Pueꞌ Ala hangko i surugáꞌ i tempóngkiꞌ ara hingkakani hai Iesu i wongko buluꞌ to magasaꞌ iti.
19 Mewaliꞌ,
kipoinálái ntepuꞌu ngkóráꞌna Pueꞌ Ala to rapahaweꞌ nabiꞌ-nabiꞌ hangkoia mokana i Iesu.
Laluitaraꞌ iti nodo huluꞌ to mewangkaꞌ i lalu kakáindiána,
hai hangaa-ngaa nipailalu oaꞌ duuꞌna haweꞌ wopiꞌi Pueꞌ Iesu i karongkánina mai i duniáꞌ deꞌe.
Kahaweꞌna huleꞌ Iesu iti peisá rapándiriꞌ nodo pesupaꞌna alo ba nodo betue tándáꞌ i mata alof to mowangkaꞌi duniáꞌ.
Tempó onoꞌ,
Iesu ina mewangkaꞌ i lalumi {bona niꞌisá ntepuꞌu Pueꞌ Ala}.