Handaꞌ tauna mampeuláꞌi paturoꞌ to mepakanawoꞌ
4
Inao to Magasaꞌ mopakanótó i kitaꞌ:
i alo to ina haweꞌ,
araheꞌ tauna to ina mosuliꞌ hangko i pampeuláꞌiraꞌ paturoꞌ to toꞌu.
Ina mengkoruꞌheꞌ i kuasaꞌ to mepakanawoꞌ hai mampeuláꞌiheꞌ paturoꞌ to hangko i setáꞌ.
2 Paturoꞌ iti ina rapahaweꞌ tauna to mepakanawoꞌ.
Topodongkoꞌheꞌ.
Laluitaraꞌ tiꞌara hiolaꞌ hai bábehiáraꞌ.
Makáindi laluraꞌ;
tiꞌara piꞌi raisá mahili ane mobábehiheꞌ bábehiá to kadake.
3 Mopaturoꞌheꞌ tauna bona ineeꞌheꞌ mohamboko hai ineeꞌheꞌ mandeꞌ ba apa peá to rapopopáliáꞌáheꞌ.
Mole upu-upu pandeꞌ napopewaliꞌ Pueꞌ Ala bona raꞌandeꞌ.
Kitaꞌ to mepoinálái i Kerisitu hai moisá paturoꞌ to toꞌu,
peisá taꞌandeꞌ upu-upuna asalaꞌ tapekakaeá i lalu hangaꞌna Pueꞌ Ala.
4 Tiꞌara ara to rapáliá ane tatarima hai tauliꞌ handaꞌ kamaroꞌana i Hia.
Upu-upu to napopewaliꞌ Pueꞌ Ala maroꞌa,
láwiꞌ Ia haduduáNa to manguliꞌ noꞌonoꞌ
5 moliu ngkóráꞌNa.a
Nawátiꞌ woꞌo moliu pekakaentaꞌ.
Topobágóꞌna Pueꞌ Iesu to maroꞌa bábehiána
6 Timotiu,
ane nupaturoꞌáheꞌ halalu hampepepoináláintaꞌ upu-upu paturoꞌ deꞌe,
ina mewaliꞌkoꞌ topobágóꞌna Kerisitu Iesu to maroꞌa.
Hai ina maróhó ntepuꞌu lalumu ánti ngkóráꞌna Pueꞌ Ala to nupoinálái,
hai ánti paturoꞌ to maroꞌa to marue miꞌi nupeuláꞌi.
7 Ineeꞌ nutibe-tibe tempómu lao mampehádingi darita-darita to tiꞌara toꞌu hai tiꞌara modureikeꞌ i lalu pepoináláintaꞌ.
Ngkáliꞌna riꞌi hangaa-ngaa nupakaróhó lalumu bona maróhó ntepuꞌu pengkoruꞌmu i Pueꞌ Ala.
8 Láwiꞌ ane wátántaꞌ peá tapakaróhó,
hantóiꞌ peá pobunduꞌána.
Agáiáná ane pepoináláintaꞌ tapakaróhó,
handaꞌ pobunduꞌána,
láwiꞌ iti to moánti pewátiꞌ i lalu katueꞌtaꞌ,
maroꞌa i duniáꞌ deꞌe,
maroꞌa i alo to ina haweꞌ.
9 Toꞌu ntepuꞌu laluita iti,
hangaa-ngaa tapoinálái.
10 Onoꞌ miꞌi haneꞌi mobágóꞌkeꞌ matimi,
láwiꞌ mepoináláikeꞌ i Pueꞌ Ala to tueꞌ duuꞌna i rue-ruena láwiꞌ Ia to mohómpóki upu-upu tauna,
iamoheꞌ to mepoinálái i Hia.
11 Upu-upu to kuhángáꞌáꞌákoꞌ deꞌe,
nupaturoꞌáheꞌ hai nuhawaꞌiáheꞌ bona rapeuláꞌi.
12 Kehapiꞌ maleheꞌ manikoꞌ,
agáiáná hintotoꞌkoꞌ rabiláꞌ tauna.
Onoꞌ miꞌi haneꞌi hangaa-ngaa nupoweꞌiheꞌ pándiriꞌb moliu:
polaluitamu,
bábehiámu,
kamaꞌahiꞌmu i hángká rángámu,
pepoináláimu i Pueꞌ,
hai katueꞌmu to magasaꞌ.c
13 Hangko tiꞌara maniaꞌ haweꞌ,
hangaa-ngaa nubásá oaꞌ Sura Magasaꞌ i lindoꞌraꞌ halalu hampepepoináláintaꞌ.
Hangaa-ngaa nupakaróhó oaꞌ laluraꞌ hai nupaturoꞌheꞌ.
14 Ineeꞌ nukábáhá bágóꞌmu to hangaa-ngaa nupopolumao hiolaꞌ hai pewátiꞌ to naweꞌikoꞌ Inao to Magasaꞌ.
Io raweꞌikoꞌ pewátiꞌ iti i tempóraꞌ pinátuá i jemaꞌa moángkáꞌ taeraꞌ i wuáꞌmu mopahaweꞌ laluita to hangko i Pueꞌ Ala.
15 Upu-upu bágóꞌmu hangaa-ngaa nupopolumao hangko i lalumu ntepuꞌu,
bona tongawaꞌ i upu-upu tauna pobágóꞌmu i Pueꞌ kalao-lao maroꞌa.
16 Hangaa-ngaa nukámpái bábehiámu,
hai nukámpái woꞌo paturoꞌmu.
Nupobágóꞌ oaꞌ upu-upuna iti,
bona molámbiꞌkoꞌ katehómpóꞌ,
noꞌonoꞌ woꞌo tauna to mampehádingi paturoꞌmu ina molámbiꞌheꞌ woꞌo katehómpóꞌ.