Paturoꞌ i tadulakoraꞌ toSarani
3
Ara tauna to manguliꞌ:
“Tauna to mampoinaoheꞌ motadulakoi jemaꞌa,
lempóna raundeꞌ mampopolumao bágóꞌ to maroꞌa.”
Toꞌu ntepuꞌu laluita iti.
2 Mewaliꞌ tadulako i jemaꞌa,
hangaa-ngaa to tiꞌara peisá rasalaꞌi.
Hangaa-ngaa hadua peá toinána,a
hai nabuku momeeꞌ peundeꞌána laluna.
Hangaa-ngaa to bukeꞌ pekiri hai moisá ádá.
Hangaa-ngaa naundeꞌ motarima torare i támbina hai naisá mepaturoꞌ.
3 Tiꞌara peisá to paka malangu ba to paka mosisalaꞌ.
Hangaa-ngaa to maꞌálusuꞌ pambiárána,
to moisá mohintuwuꞌ hai hángká rángána,
hai to tiꞌara mampoinao peá dóiꞌ.
4 Hangaa-ngaa naisá motadulakoi tauna to toroꞌ i támbina,
hai naisá mopaturoꞌ ánáꞌna bona raisá mebiláꞌ hai mengkoruꞌ i tosaeraꞌ.
5 Láwiꞌ ane ara tauna to tiꞌara moisá mokádipurá tauna i lalu támbina,
noumbá paꞌi kanabukuna motadulakoi taunána Pueꞌ Ala?
6 Ane ara hadua tauna to tiꞌara mani marue mepoinálái i Pueꞌ Iesu,
ia tiꞌara mani peisá rapileꞌi mewaliꞌ pinátuá,
bona ia tiꞌara mewaliꞌ maꞌángkáꞌ hai kahópóꞌána molámbiꞌ pehuku nodo karahukuna Datu Tokadake ánti kamaꞌángkáꞌna.
7 Kaliliuána,
tauna to motadulakoi jemaꞌa hangaa-ngaa to tiꞌara ara salaꞌiána i peitáraꞌ tauna to tiꞌaraheꞌ mepoinálái,
bona ineeꞌ maꞌala rapakanawoꞌ haneꞌi nakuasaꞌi Datu Tokadake.
Paturoꞌ i diaken
8 Noꞌonoꞌ woꞌo hai tauna to mewaliꞌ diaken.
Hangaa-ngaa manótó bábehiáraꞌ hai hintotoꞌ rabiláꞌ.
Tiꞌara peisá to momata potimbali ba paka malangu ba mampoinao peá dóiꞌ.
9 Ngkáliꞌna riꞌi,
hangaa-ngaa motibaaꞌ ntepuꞌuheꞌ paturoꞌ to hangko i Pueꞌ Ala.
Hangkoia paturoꞌ iti tewuniángi i tauna,
agáiáná deꞌe-deꞌe tongawaꞌ miꞌi.
Hangaa-ngaa mampeuláꞌiheꞌ paturoꞌ iti hangko i kabulána laluraꞌ.
10 Ane araheꞌ tauna to mampoinao mewaliꞌ diaken,
hangaa-ngaa nipampeitai sieruꞌ bábehiáraꞌ hai pambiáráraꞌ,
hai ane tiꞌara ara salaꞌiáraꞌ,
hangko peisáraheꞌ rapileꞌi mewaliꞌ diaken i lalu jemaꞌa.
11 Noꞌonoꞌ woꞌo toináraꞌ.b
Hangaa-ngaa manótó bábehiáraꞌ bona hintotoꞌheꞌ rabiláꞌ.
Tiꞌaraheꞌ hintotoꞌ ane moánti-ántiheꞌ laluita.
Hangaa-ngaa raisá momeeꞌ peundeꞌána laluraꞌ,
hai hangaa-ngaa tauna to peisá rapoinálái i pákáꞌ-pákáꞌna.
12 Diaken hangaa-ngaa hadua peá toináraꞌ,c
hai hangaa-ngaa moisáheꞌ motadulakoi maroꞌa ánáꞌraꞌ hai tauna to toroꞌ i támbiraꞌ.
13 Ane maroꞌa kamampopolumaoraꞌ bágóꞌna Pueꞌ,
ina rabiláꞌheꞌ,
hai ina tetámbái kapebáiꞌraꞌ mopahaweꞌ i tauna mokana i pepoináláiraꞌ i Kerisitu Iesu.
Tunggáiána Paulu moukiꞌ sura deꞌe i Timotiu
14 Timotiu,
ara mpuꞌu tunggáiángkuꞌ lao moweoꞌkoꞌ.
Agáiáná kehapiꞌ noꞌonoꞌ,
kuꞌukiꞌákoꞌ sura deꞌe,
15 bona ane marue maniaꞌ hangko haweꞌ,
ina nuisá miꞌi ami noumbá katueꞌna tauna to mepoinálái i Pueꞌ Ala to tueꞌ.
Motibaaꞌkeꞌ paturoꞌ to toꞌu,
láwiꞌ paturoꞌ iti ia miꞌi ntóáꞌna hai róhóna pepoináláintaꞌ.
16 Maroꞌa ntepuꞌu paturoꞌ to tapeuláꞌi ánti pengkoruꞌtaꞌ i Pueꞌ Ala.
Hangkoia paturoꞌ iti tiꞌara raisá tauna,
agáiáná deꞌe-deꞌe napatongawaꞌámokeꞌ Pueꞌ Ala.
Deꞌe miꞌi to tapoinálái mokana i Iesu Kerisitu:
Ia miꞌi
to mewaliꞌ tauna,
to napakanótó Inao to Magasaꞌ,d
hai to raita malaꞌeka.
BámbáriNa rapahaweꞌ i tauna to tiꞌara maniheꞌ moisá Pueꞌ Ala,
hai Ia rapoinálái tauna i humalele duniáꞌ,
hai naoreꞌ Pueꞌ Ala lao i surugáꞌ.
Ionoꞌ Ia meawaꞌ tueꞌNa.