2 Tesalonika i

Surana Paulu to Karongkánina

i toSarani i Kótá

Tesalonika

Laluita to mopakanótó óntóꞌna sura

Rekeꞌ-rekeꞌna pare lima puloꞌna hai duá hangko tiꞌara mani Iesu rapoánáka (52M), Paulu mopakatu sura deꞌe i jemaꞌa to ara i kótá Tesalonika láwiꞌ tiꞌara mani raisá apa to ina mewaliꞌ i kahaweꞌna huleꞌ Pueꞌ Iesu karongkánina (2:1-2). Araheꞌ to manguliꞌ haweꞌ miꞌi Kerisitu i karongkánina. Araheꞌ woꞌo to tiꞌarapoheꞌ mobágóꞌ láwiꞌ rauliꞌ tiꞌara piꞌi marue Pueꞌ Iesu ina haweꞌ miꞌi (3:6,11-12). Mewaliꞌ tunggáiána Paulu i lalu sura deꞌe, bona napakanótóáheꞌ paturoꞌ to toꞌu kana i upu-upuna deꞌe.

Paulu mopakanótóáheꞌ katiꞌárána mani haweꞌ Kerisitu. Nauliꞌ, hangko tiꞌara mani haweꞌ, hangaa-ngaa haweꞌ sieruꞌ hadua tauna to rauliꞌ Topeꞌewaꞌ. Ánti bábehiána tauna iti, ina rumihi ntepuꞌu kapári to ina merampe i duniáꞌ deꞌe.

I lalu sura deꞌe, Paulu membiáꞌ i toTesalonika bona mantahaheꞌ i lalu kapári to ina morampeheꞌ ánti pepoináláiraꞌ i Kerisitu. Ia mopaturoꞌheꞌ bona mobágóꞌheꞌ oaꞌ bona ara pandeꞌraꞌ nodo to rabábehi Paulu hai rángána to hampopobágóꞌheꞌ. I lalu paturoꞌna, Paulu membiáꞌ woꞌo bona maroꞌa oaꞌ bábehiáraꞌ.

Óntóꞌna

1. Tabeá (1:1-2)

2. Paulu motóiá Pueꞌ Ala ánti pepoináláiraꞌ toTesalonika (1:3-12)

3. Paulu mopaturoꞌáheꞌ kana i kahaweꞌna huleꞌ Pueꞌ Iesu (2:1-17)

4. Paulu moweꞌiheꞌ laluita bona maróhó pepoináláiraꞌ hai maroꞌa bábehiáraꞌ (3:1-15)

5. Tabeá hai pewátiꞌ to kahópóꞌána (3:16-18)