Surana Paulu to Karongkánina
i toSarani i Kótá
Tesalonika
1
Molámbiꞌ Jemaꞌai kótá Tesalonika
1-2 Sura deꞌe hangko i kaiꞌ,
Paulu,
Silasia hai Timotiu.
Kipakatu sura deꞌe i kómu to mohintuwuꞌ hai Pueꞌ Ala Umántaꞌ hai Pueꞌ Iesu Kerisitu!
Kipembiáꞌ bona Pueꞌ Ala hai Pueꞌ Iesu Kerisitu mowátiꞌkou hai mampoweꞌikou roꞌa ngkatueꞌ.
Handaꞌ kamaroꞌana i Pueꞌ Ala ánti pepoináláiraꞌ toTesalonika
3 Halalu-halalu,
tiꞌaraꞌangkaiꞌ luleꞌ manguliꞌ handaꞌ kamaroꞌana i Pueꞌ Ala ánti kakómuna.
Hai hintotoꞌ ntepuꞌu manguliꞌangkaiꞌ noꞌonoꞌ,
láwiꞌ kiꞌisá kamaróhó-róhóá pepoináláimi i Pueꞌ Iesu,
hai katetátámbáiá woꞌo ahiꞌmi i upu-upu rángámi.
4 Onoꞌ miꞌi haneꞌi i jemaꞌa ntániꞌna,
kitóiákou i lindoꞌraꞌ halaluntaꞌ to mepoinálái i Pueꞌ Ala.
Kihángáꞌáheꞌ,
kómu toTesalonika,
kehapiꞌkou narampe handaꞌ kapári hai rapopeahiahiꞌkou,
bateꞌna mepoináláikou oaꞌ i Pueꞌ Iesu.
5 Mewaliꞌ ánti kamaróhóna mani pepoináláimi iti,
tongawaꞌ miꞌi pobutusina Pueꞌ Ala ina manótó ntepuꞌu.
Hai Napakanótó kahintotoꞌmi mewaliꞌ taunáNa i lalu popárentáNa,
láwiꞌ mantahakou i lalu kapári to morampekou deꞌe-deꞌe ánti peuláꞌmi i Pueꞌ Ala.
6 Pueꞌ Ala mobábehi apa to manótó.
Ia ina moháwángi bábehiáraꞌ tauna to mampopeahiahiꞌkou,
7 hai ina Nakábáhákou hangko i kapárimi,
nodo woꞌo kaiꞌ.
Ina Nabábehi woꞌo noꞌonoꞌ i kahaweꞌna huleꞌ Pueꞌ Iesu to ina mendáulu mai hangko i surugáꞌ hingkakani hai malaꞌekaNa to makuasaꞌ i lalu api to roreꞌ.b
8 Ia miꞌi to ina mohukuheꞌ tauna to tiꞌara moisá Pueꞌ Ala hai tiꞌaraheꞌ woꞌo mau mampeuláꞌi Ngkóráꞌ Marasa to mopakanótó kaheánána Pueꞌtaꞌ Iesu.
9 Tauna to tiꞌaraheꞌ mepoinálái ina molámbiꞌ pehuku to tiꞌara mokahópóꞌá,
hai ina ratibeheꞌ karaoꞌ hangko i Pueꞌ,
álána tiꞌarapoheꞌ moita kamahilena kuasaꞌNa hai peawaꞌNa.
10 Upu-upuna iti ina mewaliꞌ i kahaweꞌána huleꞌ Pueꞌ Iesu.
I tempó iti,
upu-upu taunáNa ina mampomahile hangaꞌNa,
hai upu-upu tauna to mepoinálái i Hia ina manguliꞌ,
“Tongawaꞌ ntepuꞌu peawaꞌNa!”
Hai kómu woꞌo halalu-halalu,
bateꞌna ina nipomahile Pueꞌ Iesu i alo iti,
láwiꞌ nipoinálái miꞌi bámbári to kipahaweꞌákou.
Paulu mampekakaeá toTesalonika
11 Halalu-halalu,
onoꞌ miꞌi haneꞌi kipekakaeákou oaꞌ,
bona mewaliꞌkou hintotoꞌ i kanapileꞌimi miꞌi Pueꞌ Ala.
Kipembiáꞌ bona moliu kuasaꞌNa,
Ia mampopewaliꞌ upu-upu tunggáiámi to maroꞌa hai mopamagánái upu-upu to nipobágóꞌ ánti pepoináláimi i Pueꞌ Iesu.
12 Tunggáiángkiꞌ mekakae noꞌonoꞌ,
bona ánti bábehiámi to maroꞌa iti,
hangaꞌna Pueꞌtaꞌ Iesu rapomahile,
hai bona kómu woꞌo ina napomahilekou Pueꞌ Iesu.
Upu-upuna iti hangaa-ngaa mewaliꞌ ánti kabulána laluna Pueꞌ Ala Umántaꞌ hai Pueꞌ Iesu Kerisitu.