To ina mewaliꞌ i kahaweꞌna Pueꞌ Iesu i karongkánina
2
1-2 Kaliliuána halalu-halalu,
kipoinao kihángáꞌáꞌákou hantepóꞌ rontepóꞌ laluita kana i apa to ina mewaliꞌ ane haweꞌ huleꞌ Pueꞌtaꞌ Iesu Kerisitu.
I tempó iti,
kitaꞌ upu-upu ina Narámpukeꞌ hingkakani hai Ia.a
Araheꞌ tauna to mohángáꞌákou,
haweꞌ miꞌi alo kahaweꞌána huleꞌ Pueꞌ,
agáiáná tiꞌara toꞌu laluitaraꞌ iti.
I oloꞌraꞌ tauna iti,
babilaꞌ araheꞌ to manguliꞌ ara to mampopaisáꞌáheꞌ noꞌonoꞌ.
Ba araheꞌ woꞌo to manguliꞌ kaꞌárána paturoꞌ ba sura hangko i kaiꞌ to mopakanótó kahaweꞌna miꞌi alona Pueꞌ.
Agáiáná kipembiáꞌ ntepuꞌu halalu-halalu,
ineeꞌkou malááꞌ ba bata-bata lalumi,
láwiꞌ tiꞌara toꞌu bámbári iti.
3-4 Kehapiꞌ ba noumbá miꞌi laluitaraꞌ tauna ntániꞌna,
ineeꞌkou maꞌala rapakanawoꞌ,
láwiꞌ hangko tiꞌara mani haweꞌ alo iti,
to rompákáꞌ deꞌe hangaa-ngaa mewaliꞌ sieruꞌ:
handaꞌ tauna hangaa-ngaa moewaꞌ Pueꞌ Ala,
hai hangaa-ngaa haweꞌ woꞌo hadua tauna to rauliꞌ Topoewaꞌ Kerisitu.
Topeꞌewaꞌ iti ia miꞌi ewálina Pueꞌ Ala.b
Ia ina mampepemahile hai mengkaiwongko hangko i upu-upu to rapenómbái i duniáꞌ.
Hai ia ina pebáiꞌ ntepuꞌu mehoda i lalu Támbina Pueꞌ Ala,c
hai ina nauliꞌ kaꞌiana miꞌi Pueꞌ Ala.
Mewaliꞌ manótó miꞌi kaꞌina ratibena i lalu naraka.d
5 Ba nikáláliꞌá,
halalu-halalu,
apa to kupaturoꞌámokou hangkoia i tempóngkuꞌ mani hingkakani hai kómu?
6 Hangaa-ngaa nibuhinao heáná to mokóntó Topeꞌewaꞌ iti bona ia ina mopatongawaꞌ wátána i tempó to napakanótó miꞌi Pueꞌ Ala.e
7 I tempó deꞌe,
kuasaꞌ to kadake mantepuꞌu miꞌi molumao ngkániiꞌ-niiꞌ i duniáꞌ.
Agáiáná Topeꞌewaꞌ iti tiꞌara mani haweꞌ,
láwiꞌ ara mani to mokóntó.
Mewaliꞌ,
ane topekóntó iti rapopobaeꞌ miꞌi,
8 hangko haweꞌ riꞌi Topeꞌewaꞌ.
Agáiáná ane haweꞌ miꞌi Pueꞌ Iesu hai kuasaꞌNa to meawaꞌ,
kamakuasaꞌna Topeꞌewaꞌ iti ini hópóꞌ miꞌi,
láwiꞌ moliu peá peinaoNa to mesuwuꞌ i humeNa,
Pueꞌ Iesu ina mopapate Topeꞌewaꞌ iti.f
9 Ane Topeꞌewaꞌ iti haweꞌ miꞌi,
ia ina mopakeꞌ kuasaꞌna Datu Tokadake bona mobábehi handaꞌ pákáꞌna tandaꞌ kuasaꞌ to mepakanawoꞌ.g
10 Upu-upu ákálána to kadake ina napakeꞌ mopakanawoꞌ tauna.
Tauna iti bateꞌraꞌ ina rahuku,
láwiꞌ tiꞌaraheꞌ mau mampeuláꞌi ngkóráꞌna Pueꞌ to toꞌu hai to peisá mohómpókiheꞌ hangko i huku dósáraꞌ.
11 Onoꞌ miꞌi haneꞌi Pueꞌ Ala mopawuliheꞌ,
álána mampoináláiheꞌ laluita to mepakanawoꞌ to napahaweꞌ Topeꞌewaꞌ iti.
12 Kahópóꞌána,
Pueꞌ Ala ina mohuku upu-upu tauna to moundeꞌ mani mobábehi dósá hai to tiꞌara mampoinálái apa to toꞌu.
Nipakaróhó pepoináláimi i Ngkóráꞌ Marasa
13 Halalu-halalu to napokaꞌahiꞌ Pueꞌ.
Hintotoꞌ ntepuꞌu kiuliꞌ oaꞌ handaꞌ kamaroꞌana i Pueꞌ Ala ánti kakómuna,
láwiꞌ hangko tiꞌara mani Napopewaliꞌ duniáꞌ deꞌe,
Pueꞌ Ala mopileꞌimokou.
Napileꞌimokou bona tehómpókikou hangko i huku dósámi,
moliu kuasaꞌna Inao to Magasaꞌ mampopewaliꞌkou taunána Pueꞌ Ala to magasaꞌ,
hai Nahómpókikou woꞌo ánti pepoináláimi i Ngkóráꞌ Marasa to toꞌu.h
14 Ia mokióꞌkou moliu Ngkóráꞌ Marasa to kipahaweꞌámokou,
bona upu-upuna iti mewaliꞌ,
hai bona molámbiꞌkou gáláꞌmi i peawaꞌna Pueꞌtaꞌ Iesu Kerisitu.i
15 Mewaliꞌ halalu-halalu,
hangaa-ngaa nipakaróhó oaꞌ pepoináláimi.
Nipailalu upu-upuna to kipaturoꞌákou,
maroꞌa to kipahaweꞌámokou,
maroꞌa to kiukiꞌákou i lalu surangkiꞌ.
16-17 Pueꞌ Ala mopatongawaꞌákeꞌ ahiꞌNa,
Napakaróhó laluntaꞌ duuꞌna i rue-ruena,
hai Naweꞌikeꞌ pehárungá to maroꞌa ánti kabulána laluNa.
Onoꞌ miꞌi haneꞌi mekakaeangkaiꞌ i Pueꞌtaꞌ Iesu Kerisitu,
hai i Pueꞌ Ala Umántaꞌ,
bona Ia mopakaróhó hai mopatetidaꞌ lalumi,
bona maroꞌa upu-upu polaluitami hai bábehiámi.