Paulu membiáꞌ bona rapekakaeáheꞌ toTesalonika
3
Mewaliꞌ halalu-halalu,
kipembiáꞌ bona nipekakaeáꞌangkaiꞌ woꞌo,
bona hawiáꞌ kamantámbáina tauna to ina mampehádingi hai motarima ngkóráꞌna Pueꞌ,
nodo to mewaliꞌ i kómu hangkoia.
2 Nipembiáꞌ woꞌo bona Pueꞌ Ala mokámpáiangkaiꞌ hangko i tauna to kadake hai to mepopeahiahiꞌ,
láwiꞌ handaꞌ tauna to tiꞌara mampoinálái ngkóráꞌna Pueꞌ Ala.
3 Agáiáná Pueꞌ to peisá rapoinálái.
Ia to ina mopakaróhókou hai mokámpáikou hangko i to kadake.a
4 Mewaliꞌ,
ánti katetidaꞌna Pueꞌ i kómu,
onoꞌ miꞌi haneꞌi kiꞌisá ntepuꞌu kanipeuláꞌina apa to kipaturoꞌákou,
hai kiꞌisá woꞌo paturoꞌ iti ina nipeuláꞌi oaꞌ.
5 Kipekakaeákou bona Pueꞌ Iesu moteteꞌkou duuꞌna moisá ntepuꞌukou kamaꞌahiꞌna Pueꞌ Ala i kómu hai noumbá rárána mantaha i lalu kapári nodo woꞌo Kerisitu.
Paulu mokámbáróá tauna to lohe mobágóꞌ
6 Halalu-halalu,
i lalu kuasaꞌ to naweꞌiangkaiꞌ Pueꞌ Iesu Kerisitu,
kihángáꞌáꞌákou:
ineeꞌheꞌ nipohintuwuꞌá halalu hampepepoináláimi to loheheꞌ mobágóꞌ hai tiꞌaraheꞌ mampeuláꞌi paturoꞌ to nitarima hangko i kaiꞌ.
7 Niꞌisá miꞌi bábehiángkiꞌ hangkoia.
Tiꞌaraꞌangkaiꞌ lohe mobágóꞌ i tempóngkiꞌ hingkakani hai kómu.
Bábehiángkiꞌ iti to hangaa-ngaa nipeuláꞌi.
8 Tiꞌaraꞌangkaiꞌ mandeꞌ pandeꞌ ane tiꞌarai kibaiari.
Hangalo-hangalo mobágóꞌangkaiꞌ matimi bona tiꞌarakou kipamapári.
9 Katoꞌuána,
tiꞌaranto woꞌo masalaꞌ ane membiáꞌangkaiꞌ i kómu.
Agáiáná tiꞌara iti to kibábehi láwiꞌ tunggáiángkiꞌ bona kipopaitaꞌákou pándiriꞌ to maroꞌa to peisá nipeuláꞌi.
10 I tempóngkiꞌ mani hingkakani hai kómu hangkoia,
ara miꞌi laluita to kiweꞌikou.
Kiuliꞌ:
heáná to lohe mobágóꞌ,
ineeꞌ rapopandeꞌ.
11 Tunggáiángkiꞌ haneꞌi kiuliꞌ noꞌonoꞌ,
láwiꞌ kihádi bámbári to manguliꞌ kaꞌáráraꞌ tauna i oloꞌmi to lohe mobágóꞌ.
Raundeꞌ peá mampesuaꞌi urusiána tauna ntániꞌna.
12 Mewaliꞌ,
i lalu kuasaꞌ to naweꞌiangkaiꞌ Pueꞌ Iesu Kerisitu,
kipohawaꞌáheꞌ tauna iti hai kipaturoꞌheꞌ bona madotaheꞌ mobágóꞌ mampeliꞌ pandeꞌraꞌ.
13 Hai kómu,
ineeꞌkou luleꞌ mobábehi apa to maroꞌa.
14 Rápáꞌna,
ane ara tauna to tiꞌara moundeꞌ mampeuláꞌi apa to kiukiꞌ i lalu sura deꞌe,
nipetándái tauna iti.
Ineeꞌheꞌ nipohintuwuꞌá,
bona raisá kamasalaꞌraꞌ hai ina mahiliheꞌ.
15 Agáiáná ineeꞌheꞌ nirekeꞌ ewálimi,
ngkáliꞌna riꞌi hangaa-ngaa nipaturoꞌheꞌ nodo halalu hampepepoináláimi.
Tabeá hai pewátiꞌ to kahópóꞌána
16 Bateꞌna Pueꞌ to peisá mampoweꞌikeꞌ roꞌa ngkatueꞌ.
Onoꞌ miꞌi haneꞌi mekakaeangkaiꞌ i Pueꞌ bona alo-alona Naweꞌikou roꞌa ngkatueꞌ i pákáꞌ-pákáꞌna.
Pueꞌ mamporángákou upu-upu.
17 Tabeá hangko i kódóꞌ,
Paulu.
Kahópóꞌána sura deꞌe kuꞌukiꞌ hai taengkuꞌ haduduángkuꞌ.
Deꞌe miꞌi tandaꞌ to kupakeꞌ i upu-upu surangkuꞌ,
bona niꞌisá ntepuꞌu kakódóꞌna miꞌi to moukiꞌ sura deꞌe.
18 Kupembiáꞌ bona Pueꞌtaꞌ Iesu Kerisitu mowátiꞌkou upu-upu hangko i kabulána laluNa.
Hangko i kódóꞌ,
Paulu