Hangaa-ngaa timamakou i kaꞌina haweꞌna Pueꞌ Iesu
5
Halalu-halalu,
tiꞌaranto paraluu kiukiꞌákou kaimpirána mpuꞌu alo kahaweꞌána Pueꞌ Iesu,
2 láwiꞌ niꞌisá alo kahaweꞌáNa huleꞌ ina haweꞌ nodo topanako i tangaꞌ káindi;
ina tingkáráꞌ upu-upu tauna i duniáꞌ.a
3 Hangko tiꞌara mani haweꞌ tempóna,
tauna to tiꞌaraheꞌ moisá Pueꞌ Ala ina manguliꞌ,
“Maroꞌa ntepuꞌu katueꞌtaꞌ,
tiꞌara ara kamalááꞌtaꞌ.”
Agáiáná i tempó iti woꞌo,
hangkaꞌ-hangkaꞌ peá ina narampeheꞌ kapári to rumihi,
nodo pantódihána hadua towawine to humádi.
Tiꞌara mpuꞌu ara ráráraꞌ mokaraohi pehukuna Pueꞌ Ala.
4 Agáiáná kómu halalu-halalu,
niꞌisá miꞌi Pueꞌ Ala,
hai tiꞌarapokou ara i lalu kamakáindi.b
Mewaliꞌ,
ane haweꞌ alo kahaweꞌána Pueꞌ Iesu,
tiꞌarakou ina tingkáráꞌ nodo tauna to nakahaweꞌi topanako.
5 Kómu upu-upu ara miꞌi i lalu kamabaa láwiꞌ mepoináláimokou.
Tiꞌarapokeꞌ mobábehi to kadake nodo to rabábehi tauna to ara mani i lalu kamakáindi.
6 Mewaliꞌ ineeꞌkeꞌ leraꞌ,
ineeꞌkeꞌ letaꞌ nodo tauna to tiꞌara mani moisá Pueꞌ Ala.
Maingáꞌ-ingáꞌkeꞌ,
hai hangaa-ngaa tapakanótó pekirintaꞌ,
7 láwiꞌ tauna to tiꞌaraheꞌ timama i kaꞌina haweꞌna huleꞌ Pueꞌ Iesu,
káindi ina letaꞌ peheꞌ hai malangu-languheꞌ.
8 Agáiáná kitaꞌ deꞌe,
timamakeꞌ láwiꞌ tueꞌkeꞌ i lalu kamabaa,
onoꞌ miꞌi haneꞌi hangaa-ngaa tapakanótó pekirintaꞌ.
Hangaa-ngaa tapakaróhó pepoináláintaꞌ i Pueꞌ Ala hai kamaꞌahiꞌtaꞌ i hángká rángántaꞌ,
nodokeꞌ to mopakeꞌ badu besiꞌ to napakeꞌ surudadoꞌ.
Hangaa-ngaa tapakaróhó pehárungántaꞌ i kaꞌina naweꞌintaꞌ Pueꞌ Ala katehómpóꞌ i alo pobutusi,
bona maróhókeꞌ nodo hadua surudadoꞌ to mesóngkó besiꞌ.c
9 Pueꞌ Ala ina mampoweꞌikeꞌ katueꞌ to maroꞌa.
Taisá iti láwiꞌ tiꞌarakeꞌ Napileꞌi bona molámbiꞌkeꞌ pehukuNa,
ngkáliꞌna Napileꞌirakeꞌ bona molámbiꞌkeꞌ katehómpóꞌ hangko i Iesu Kerisitu Pueꞌtaꞌ.
10 Iesu Kerisitu mate mosulewátáikeꞌ,
bona ane matemokeꞌ ba tueꞌ manikeꞌ i tempó kahaweꞌáNa huleꞌ,
bateꞌna ina tueꞌkeꞌ hingkakani hai Ia.
11 Onoꞌ miꞌi haneꞌi halalu-halalu,
hangaa-ngaa mombepakaróhókou mpolalu hai mombepaturoꞌkou hadua hai hadua,
nodo to nibábehi miꞌi deꞌe-deꞌe.
Paturoꞌ to ntániꞌna
12 Halalu-halalu,
kipembiáꞌ bona nibiláꞌheꞌ tauna to mobágóꞌ matimi mampopolumao bágóꞌna Pueꞌ,
láwiꞌ hira miꞌi to napileꞌi Pueꞌ bona motadulakoikou hai mopaturoꞌkou.
13 Hangaa-ngaa nibiláꞌheꞌ hai nipokaꞌahiꞌheꞌ ánti pobágóꞌraꞌ.
Hai hangaa-ngaa mohintuwuꞌkou hadua hai hadua.
14 Halalu-halalu,
kipembiáꞌ woꞌo bona nikámbáróáheꞌ halalu hampepepoináláimi to tiꞌara mau mobágóꞌ.d
Nipalindó laluraꞌ tauna to malááꞌ.
Nitulungi tauna to araheꞌ i lalu kamakuraꞌraꞌ.
Hangaa-ngaa sabaraꞌkou i upu-upu tauna.
15 Ane arai to mobábehi to kadake i kómu,
ineeꞌ niháwángi,
ngkáliꞌna riꞌi hangaa-ngaa nibábehi oaꞌ to maroꞌa i halalumi iti hai i upu-upu tauna.
16-18 Ánti pohintuwuꞌmi hai Iesu Kerisitu,
hangaa-ngaa góeꞌkou,
mekakaekou,
hai niuliꞌ oaꞌ handaꞌ kamaroꞌana i Pueꞌ Ala i apa peá to pewaliꞌ,
láwiꞌ iti miꞌi peundeꞌána Pueꞌ Ala i kómu.
19 Ineeꞌ niewaꞌ bágóꞌna Inao to Magasaꞌ.e
20 Ineeꞌ nisapuáka laluita hangko i Pueꞌ Ala to Napahaweꞌ moliu taunáNa.
21 Hangaa-ngaa nipáresáꞌ maroꞌa upu-upu laluita iti.
Ane to maroꞌai,
hangaa-ngaa nitibaaꞌ.
22 Hai upu-upu to kadake,
hangaa-ngaa nikaraohi.
Tabeá hai laluita to kahópóꞌána
23 Mekakaeangkaiꞌ i Pueꞌ Ala to mampoweꞌikeꞌ roꞌa ngkatueꞌ.
Kiuliꞌ node:
“Pueꞌ Ala!
Kipembiáꞌ bona Nupakanótó bábehiáraꞌ toTesalonika,
duuꞌna magasaꞌ tueꞌraꞌ.
Nukámpái katueꞌraꞌ,
maroꞌa laluraꞌ ba inaoraꞌ ba wátáraꞌ,
bona tiꞌara ara kamasalaꞌraꞌ i kahaweꞌna huleꞌ Pueꞌkiꞌ Iesu Kerisitu.”
Noꞌonoꞌ miꞌi pekakaengkiꞌ.
24 Pueꞌ Ala to mopileꞌikou,
hai Ia tetidaꞌ,
láwiꞌ apa peá to Nadándi bateꞌna ina mewaliꞌ.
25 Halalu-halalu,
kipembiáꞌ bona nipekakaeáꞌangkaiꞌ woꞌo.
26 Nipahaweꞌ tabeángkiꞌ hai kamaꞌahiꞌkiꞌ i upu-upu halalu hampepepoináláintaꞌ.
27 I lalu hangaꞌna Pueꞌ Iesu,
kupembiáꞌ ntepuꞌu bona sura deꞌe rabásá i lindoꞌraꞌ upu-upu halalu hampepepoináláintaꞌ to araheꞌ ionoꞌ.
28 Pueꞌtaꞌ Iesu Kerisitu mowátiꞌkou upu-upu.
Hangko i kódóꞌ,
PAULU