Kolose i

Surana Paulu to Napakatu i

toSarani i Kótá

Kolose

Laluita to mopakanótó óntóꞌna sura

Kolose ia miꞌi hambuaꞌ kótá i poropensi Asia to tiꞌara karaoꞌ hangko i kótá Epesu. Deꞌe-deꞌe poropensi Asia hanggáláꞌ hangko i Turki. Paulu mobágóꞌ rompare lábi mopahaweꞌ Ngkóráꞌ Marasa i toEpesu (Suro 19:1-41). Hangko ionoꞌ, araheꞌ toSarani hangko i Epesu to lao i Kolose mopahaweꞌ Ngkóráꞌ Marasa, álána araheꞌ woꞌo toKolose to mepoinálái i Pueꞌ Iesu. Bahangapa parena hangko ionoꞌ, Paulu ratarungku i Roma ánti pobágóꞌna mopahaweꞌ Ngkóráꞌ Marasa. Tangaꞌna ratarungku, ia moukiꞌ miꞌi sura deꞌe, haneꞌi napakatuáheꞌ toKolose rekeꞌ-rekeꞌna pare ini puloꞌna roo karapoánákana Iesu (60M).

I lalu sura deꞌe, Paulu mopaingáꞌiheꞌ mokana i guru-guru agama to moánti paturoꞌ to salaꞌ. Rauliꞌ, ane mampoinaokeꞌ molámbiꞌ katehómpóꞌ hangko i Pueꞌ Ala, tiꞌara gáná ane mepoinálái pekeꞌ i Iesu; hangaa-ngaa menómbákeꞌ woꞌo i pákáꞌ-pákáꞌna to makuasaꞌ i langiꞌ hai i duniáꞌ, hai rauliꞌ woꞌo, hangaa-ngaa ratileꞌkeꞌ mouláꞌ áturá ágámáraꞌ toIahudiꞌ, hai hangaa-ngaa mampeuláꞌikeꞌ woꞌo áturá mokana i pandeꞌ to rapáliá. I lalu sura deꞌe, Paulu moewaꞌ paturoꞌraꞌ to salaꞌ iti moliu paturoꞌ to toꞌu, nauliꞌ: Ane mepoináláikeꞌ i Iesu, gáná miꞌi, láwiꞌ bateꞌna peá Iesu to peisá mampoweꞌi katehómpóꞌ i tauna. Nauliꞌ woꞌo, duniáꞌ hai upu-upu óntóꞌna deꞌe napopewaliꞌ Pueꞌ Ala moliu Iesu, hai kuasaꞌna Iesu melumbuꞌ hangko i upu-upu kuasaꞌ ntániꞌna. Kahópóꞌána, Paulu mopaturoꞌheꞌ kana i bábehiá to hintotoꞌ i toSarani.

Óntóꞌna

1. Tabeá (1:1-2)

2. Paulu manguliꞌ handaꞌ kamaroꞌana i Pueꞌ Ala ánti pepoináláiraꞌ toKolose, hai napekakaeáheꞌ (1:3-14)

3. Pambiárána hai pobágóꞌna Kerisitu (1:15-23)

4. Pobágóꞌna Paulu mopahaweꞌ Ngkóráꞌ Marasa (1:24–2:5)

5. Bábehiá to hintotoꞌ i tauna to mohintuwuꞌ hai Kerisitu (2:6–4:6)

6. Laluita to kahópóꞌána hai tabeá (4:7-18)