Surana Paulu to Napakatu i
toSarani i Kótá
Pilipi
Laluita to mopakanótó óntóꞌna sura
Pilipi ia miꞌi hambuaꞌ kótá to mahile i tampoꞌ Makedonia, to napolumaoi Paulu i pobámbárina Ngkóráꞌ Marasa. I pobágóꞌna iti, handaꞌheꞌ tauna to moewaꞌ Paulu, agáiáná kahópóꞌána araheꞌ woꞌo toPilipi to mepoinálái i Pueꞌ Iesu (básá Suro 16:1-40). Kapohuꞌna Paulu hangko i Pilipi, bahangapa kánina araheꞌ toPilipi to mopakatu dóiꞌ i hia bona tetulungi i pobágóꞌna.
Bahangapa parena hangko ionoꞌ, rekeꞌ-rekeꞌna pare ini puloꞌna hai isáꞌ roo karapoánákana Iesu (61M) Paulu ratarungku i Roma (básá Suro 28:16, 30-31) hai kahandaꞌraꞌ tauna to mapánde motasere Ngkóráꞌna Pueꞌ mampekiri ia moukiꞌ sura deꞌe i toPilipi hangko i Roma. Karahádina toPilipi bámbári iti, rapakatu wopiꞌi dóiꞌ motulungi Paulu i lalu tarungku. Dóiꞌ iti naꞌánti hadua toPilipi to rahangaꞌ Epaporoditu. Kahaweꞌna Epaporoditu i Roma, napeweꞌi miꞌi dóiꞌ iti i Paulu, haneꞌi toroꞌ bahangapa wulána i Roma bona modurei Paulu. Liu miꞌi bahangapa wulána, Epaporoditu nahuoꞌ Paulu mesuleꞌ moánti sura deꞌe i toSarani to ara i kótá Pilipi.
Ara bahangapa pákáꞌna tunggáiána Paulu moukiꞌ sura deꞌe. Napahaweꞌ noumbá katueꞌna i lalu tarungku (1:12-26). Naweꞌiheꞌ laluita bona mohintuwuꞌheꞌ, mengkaiwóiꞌ laluraꞌ, hai mantahaheꞌ i lalu kapári (1:27–2:18; 4:2-3). Napolaluita tunggáiána mohuoꞌ Timotiu hai Epaporoditu lao i Pilipi (2:19-30). Napaturoꞌheꞌ bona maingáꞌ-ingáꞌheꞌ i tauna to kadake bábehiáraꞌ to moánti paturoꞌ to salaꞌ (3:1-2,17-19). Hai nauliꞌ handaꞌ kamaroꞌana i toPilipi ánti petulungiraꞌ to naꞌánti Epaporoditu (4:10-18).
Óntóꞌna
1. Tabeá (1:1-2)
2. Paulu manguliꞌ handaꞌ kamaroꞌana i Pueꞌ Ala ánti pepoináláiraꞌ toPilipi, hai napekakaeáheꞌ (1:3-11)
3. Paulu mampolaluita karatarungkuna. Ánti karatarungkuna, handaꞌ tauna mohádi Ngkóráꞌ Marasa (1:12-26)
4. Paulu mampoweꞌiheꞌ laluita bona mohintuwuꞌheꞌ hai mampeuláꞌiheꞌ pándiriꞌna Iesu (1:27–2:18)
5. Paulu motóiá Timotiu hai Epaporoditu ánti pobágóꞌraꞌ i Pueꞌ (2:19–3:1a)
6. Paulu mopaingáꞌiheꞌ láwiꞌ ara tauna to moánti paturoꞌ to salaꞌ (3:1–4:1)
7. Paulu mopaturoꞌheꞌ bona maróhó pohintuwuꞌraꞌ hai pepoináláiraꞌ (4:2-9)
8. Paulu manguliꞌ handaꞌ kamaroꞌana ánti petulungiraꞌ (4:10-20)
9. Tabeá to kahópóꞌána (4:21-23)