Pilipi 1

Surana Paulu to Napakatu i

toSarani i Kótá

Pilipi

Molámbiꞌ Jemaꞌa

i kótá Pilipi

1-2 Tabeá hangko i kaiꞌ Paulu hai Timotiu,

huoꞌána Kerisitu Iesu.

Kupakatu sura deꞌe i kómu to mepoinálái i Kerisitu Iesu to ara i kótá Pilipi,

hai i tauna to mampopolumao bágóꞌna Pueꞌ i oloꞌmi,

maroꞌa tadulako jemaꞌa,

maroꞌa topobágóꞌna Pueꞌ.

Mekakaeangkaiꞌ i Pueꞌ Ala Umántaꞌ hai Pueꞌ Iesu Kerisitu bona mowátiꞌkou hai mampoweꞌikou roꞌa ngkatueꞌ.

Paulu mampekakaeáheꞌ toPilipi

3 Halalu-halalu,

i káni-kánina ane kubuhinaokou,

kuꞌuliꞌ handaꞌ kamaroꞌana i Pueꞌ Ala Pueꞌkuꞌ ánti kakómuna.

4 Hai i lalu pekakaengkuꞌ,

góeꞌ ntepuꞌu lalungkuꞌ mampekakaeákou upu-upu,

5 láwiꞌ hangko i rungu-runguna i kamohádimi Ngkóráꞌ Marasa duuꞌna deꞌe-deꞌe,

nitulungiaꞌ i lalu pobágóꞌkuꞌ mopahaweꞌ Ngkóráꞌ Marasa to hangko i Pueꞌ Ala.

6 Pueꞌ Ala haduduáNa to mokale i lalumi,

hai maroꞌa ntepuꞌu apa to Natepuꞌu miꞌi Nabábehi i lalu katueꞌmi.

Kupoinálái Pueꞌ Ala ina mopaliliu bágóꞌNa iti,

duuꞌna apa to Natunggái i lalu katueꞌmi ina tepabukeꞌi i alo kahaweꞌána huleꞌ Kerisitu Iesu.

7 Kubuhinaokou oaꞌ,

hai hintotoꞌ ntepuꞌu noꞌonoꞌ,

láwiꞌ nitulungiaꞌ oaꞌ i lalu pobágóꞌkuꞌ to naweꞌiaꞌ Pueꞌ Ala ánti kabulána laluNa,

maroꞌa deꞌe-deꞌe tangaꞌkuꞌ ratarungku,

maroꞌa i kamohánikingkuꞌ tauna to mosapuáka Ngkóráꞌ Marasa,

hai tempóngkuꞌ mopakanótó katoꞌuna Ngkóráꞌ Marasa iti.

8 Pueꞌ Ala moisá katoꞌuna laluitangkuꞌ deꞌe:

rumihi ntepuꞌu kakukabilaimi,

hai pekabilaingkuꞌ deꞌe nodo kamaꞌahiꞌna Kerisitu Iesu i kómu.

9 Mewaliꞌ,

deꞌe miꞌi pekakaengkuꞌ i Pueꞌ Ala.

Kupembiáꞌ bona tetámbái kamaꞌahiꞌmi,

hai tetámbái woꞌo kamapándemi moisá apa to toꞌu,

duuꞌna tongawaꞌ ntepuꞌu i lalumi.

10 Halalu-halalu,

upu-upu iti kupembiáꞌ,

bona niꞌisá rárá mopileꞌi apa to maroꞌa ntepuꞌu,

hai bona magasaꞌ katueꞌmi duuꞌna tiꞌara piꞌi ara kamasalaꞌmi i alo kahaweꞌána huleꞌ Kerisitu.

11 Mekakaeaꞌ bona ina mobábehikou oaꞌ apa to manótó i peitána Pueꞌ Ala,

hai bábehiámi iti ina mentóáꞌ hangko i kuasaꞌna Iesu Kerisitu i lalu katueꞌmi,

álána Pueꞌ Ala ina ratóiá hai rapomahile.

Ami.

Posabikina Paulu i lalu tarungku

12 Mewaliꞌ halalu-halalu,

kuꞌundeꞌ bona niꞌisá,

kehapiꞌaꞌ ratarungku,

góeꞌaꞌ,

láwiꞌ ánti kamapáringkuꞌ deꞌe,

katetátámbáiá tauna to mohádi hai mampoinálái Ngkóráꞌ Marasa.

13 Surudadoꞌ to mokámpái támbina datu hai handaꞌ tauna ieneꞌ,

moisáheꞌ karatarungkungkuꞌ ánti peuláꞌkuꞌ i Kerisitu.

14 Noꞌonoꞌ woꞌo,

tepakaróhó pepoináláiraꞌ handaꞌ toSarani ieneꞌ,

láwiꞌ moitaheꞌ noumbá Pueꞌ motulungiaꞌ i karatarungkungkuꞌ,

álána tiꞌarapoheꞌ malááꞌ,

agáiáná kapepebáiꞌáraheꞌ mopahaweꞌ ngkóráꞌna Pueꞌ Ala.

15-16 Hangko i oloꞌraꞌ,

ara to moánti bámbári kana i Kerisitu ánti kabulána laluraꞌ.

Rapahaweꞌ bámbári iti ánti kamaꞌahiꞌraꞌ i kódóꞌ,

láwiꞌ raisá kakódóꞌna to napileꞌi Pueꞌ Ala mewaliꞌ suroNa to mopakanótó Ngkóráꞌ Marasa i upu-upu tauna ieneꞌ.

Agáiáná araheꞌ woꞌo to moánti bámbári iti ánti kamahiniꞌraꞌ i kódóꞌ hai raundeꞌ moewaꞌ bágóꞌkuꞌ.

17 Mopahaweꞌheꞌ bámbári iti hangko i tunggáiáraꞌ to salaꞌ,

láwiꞌ raundeꞌ peá mopaioru tunggáiáraꞌ haduduáraꞌ hai mampomahile hangaꞌraꞌ haduduáraꞌ.

Tunggáiáraꞌ iti bona tetámbái kamapáringkuꞌ i lalu tarungku.

18 Agáiáná kehapiꞌ noꞌonoꞌ,

tiꞌaranto moapa.

To kupaioru,

kehapiꞌ ba noumbá tunggáiáraꞌ,

maroꞌa ba tiꞌara maroꞌa,

Ngkóráꞌ Marasa kana i Kerisitu bateꞌna rabámbári oaꞌ.

Mewaliꞌ góeꞌaꞌ.

19 Hai kupogóeꞌ woꞌo,

láwiꞌ ánti pekakaemi hai ánti petulungina Inao to Magasaꞌ to hangko i Iesu Kerisitu,

kuisá ina tekábáháꞌaꞌ.^a

20 Kuisá iti ina mewaliꞌ,

hai peundeꞌángkuꞌ bona tiꞌara ara to hangaa-ngaa kupokahili i kamampopolumaongkuꞌ bágóꞌ to Naweꞌiaꞌ Pueꞌ Ala.

Tunggáiángkuꞌ bona pebáiꞌaꞌ mopahaweꞌ oaꞌ posabikingkuꞌ,

pelumbuꞌna mani deꞌe-deꞌe,

bona kupomahile hangaꞌna Kerisitu,

maroꞌa i lalu katueꞌkuꞌ,

maroꞌa i kamatengkuꞌ.

21 Láwiꞌ ane tueꞌaꞌ,

tunggáiána katueꞌkuꞌ bona Kerisitu peá rapomahile.

Hai ane mateaꞌ,

morasiꞌ ntepuꞌuaꞌ.

22 Agáiáná ane tueꞌ maniaꞌ i duniáꞌ deꞌe,

peisá maniaꞌ mampopolumao bágóꞌ to mobunduꞌ ntepuꞌu.

Mewaliꞌ,

tiꞌara kuisá umbána to kuꞌundeꞌ.

23 To rompákáꞌ iti mombediiꞌ mani i lalungkuꞌ.

Kupoinao mopálehi duniáꞌ deꞌe haneꞌiaꞌ lao i Kerisitu i surugáꞌ,

láwiꞌ iti to maroꞌa ntepuꞌu.

24 Agáiáná ane tueꞌ maniaꞌ i duniáꞌ deꞌe,

handaꞌ ntepuꞌu pobunduꞌána i kómu halalungkuꞌ,

bona peisá manikou kutulungi.

25 Manótó i kódóꞌ,

onoꞌ to hangaa-ngaa mewaliꞌ,

hai kuisá bateꞌna ina tueꞌ maniaꞌ.

Mewaliꞌ ina kupengkáláhiꞌi mani lao moweoꞌkou hai motulungikou bona tetámbái kamaróhóna pepoináláimi i Pueꞌ Iesu,

hai ina tetámbái woꞌo kagóeꞌmi láwiꞌ mepoináláikou i Hia.

26 Mewaliꞌ,

ane mesuleꞌaꞌ i kómu,

ina tetámbái kagóeꞌmi hai petóiámi i Kerisitu Iesu ánti kakódóꞌna.

Bábehiántaꞌ hangaa-ngaa hiolaꞌ hai Ngkóráꞌ Marasa

27 Mewaliꞌ halalu-halalu,

to hangaa-ngaa nipaioru ia miꞌi,

bábehiámi hangaa-ngaa hintotoꞌ hai bábehiána tauna to mepoinálái i Ngkóráꞌ Marasa kana i Kerisitu.

Hangaa-ngaa nibábehi noꞌonoꞌ,

bona ane mohidupaꞌ manikeꞌ ba tiꞌara,

bateꞌna ina kuisá pohintuwuꞌmi i lalu pobágóꞌmi mopahaweꞌ Ngkóráꞌ Marasa to mopaꞌara pepoinálái to maróhó.

28 Ineeꞌkou mampokalááꞌ tauna to moewaꞌkou,

láwiꞌ ánti katiꞌáráraꞌ nipokalááꞌ ewálimi,

iti to mopakanótó kaꞌina nahukuraꞌ Pueꞌ Ala,

hai kómu ina napoweꞌikou Pueꞌ Ala katueꞌ to maroꞌa to tiꞌara mokahópóꞌá.

Pueꞌ Ala to makuasaꞌ i upu-upuna.

29 Mewaliꞌ,

ineeꞌkou malááꞌ i tauna to moewaꞌkou,

láwiꞌ Pueꞌ Ala mopatongawaꞌ miꞌi kamaroꞌaNa i kómu,

hai Napileꞌikou,

tiꞌara peá bona mepoináláikou i Kerisitu,

ngkáliꞌna riꞌi ara woꞌo tunggáiáNa bona molámbiꞌkou kapári,

álána hangaꞌna Kerisitu rapomahile.

30 Mewaliꞌ i tempó deꞌe,

molámbiꞌmokou woꞌo kapári nodo kapári to kulámbiꞌ i tempóngkuꞌ mani hingkakani hai kómu,^b

hai niꞌisá,

halalu-halalu,

kutódihá mani kapári iti duuꞌna haweꞌ deꞌe-deꞌe.