Dósá tobaleilo hai towawine
4
Mewaliꞌ halalu-halalu,
kipembiáꞌ bona nipeuláꞌi upu-upuna hawaꞌ to nihádi miꞌi hangko i kaiꞌ,
bona bábehiámi hintotoꞌ hai peundeꞌána Pueꞌ Ala.
Kiꞌisá,
deꞌe-deꞌe maroꞌa miꞌi bábehiámi,
agáiáná i lalu kuasaꞌ to naweꞌiangkaiꞌ Pueꞌ Iesu,
kipembiáꞌ ntepuꞌu bona nitámbái mani kamaroꞌana bábehiámi.
2 Niꞌisá miꞌi paturoꞌ to kipahaweꞌákou i lalu hangaꞌna Pueꞌ Iesu.
3 Deꞌe miꞌi peundeꞌána Pueꞌ Ala,
bona magasaꞌ katueꞌmi,
hai hangaa-ngaa nikaraohi bábehiá to metitidiꞌi.
4 Kómu tobaleilo,
hangaa-ngaa nibuku momeeꞌ peundeꞌána wátámi to kadake.a
5 Ineeꞌkou maꞌala naꞌánti peundeꞌána lalumi to kadake,
nodo to biásá mewaliꞌ i tauna to tiꞌaraheꞌ moisá Pueꞌ Ala.
6 Ineeꞌkou mobábehi salaꞌ to nodo mebuálósi ba mopakarugiꞌ tauna ntániꞌna,
apa mani halalu hampepepoináláimi.
Hangkoia kipaturoꞌmokou kana i pehukuna Pueꞌ Ala i tauna to mobábehi noꞌonoꞌ.
7 Apa tunggáiána Pueꞌ Ala mokióꞌkeꞌ,
halalu-halalu?
Tiꞌarakeꞌ Nakióꞌ bona mobábehikeꞌ salaꞌ,
agáiáná Nakióꞌkeꞌ bona magasaꞌ tueꞌtaꞌ.
8 Onoꞌ miꞌi haneꞌi ane ara tauna to mosapuáka paturoꞌ deꞌe,
tiꞌara tauna to nasapuáka,
agáiáná Pueꞌ Ala riꞌi!
Tunggáiána Pueꞌ Ala mampoweꞌikeꞌ Inao to Magasaꞌ,
bona magasaꞌ katueꞌtaꞌ.
Hangaa-ngaa mampokaꞌahiꞌkeꞌ halalu hampepepoináláintaꞌ
9 Kaliliuána halalu-halalu,
ara paturoꞌ to manguliꞌ hangaa-ngaa mampokaꞌahiꞌkeꞌ halalu hampepepoináláintaꞌ.
Katoꞌuána tiꞌara piꞌi paraluu kiukiꞌákou paturoꞌ iti,
láwiꞌ Pueꞌ Ala mopaturoꞌkou bona mombepokaꞌahiꞌkou hadua hai hadua.
10 Tongawaꞌ miꞌi kamaꞌahiꞌmi i upu-upu halalu hampepepoináláimi i tampoꞌ Makedonia.
Agáiáná kipembiáꞌ ntepuꞌu,
halalu-halalu,
bona bábehiámi iti nitámbái mani.
11 Nipári-pári mohintuwuꞌ hai hángká rángámi.
Hangaa-ngaa nipopolumao maroꞌa bágóꞌmi haduduámi,
ineeꞌkou mampesuaꞌi urusiána hángká rángámi.
Mobágóꞌkou mampeliꞌ pandeꞌmi haduduámi,
nodo to kipaturoꞌámokou hangkoia.
12 Ane nibábehiꞌi noꞌonoꞌ,
tiꞌarakou ina mehárungá i tauna ntániꞌna,
hai ina rabiláꞌkou tauna to tiꞌaraheꞌ mepoinálái i Pueꞌ Iesu.
Kahaweꞌna huleꞌ Pueꞌ Iesu
13 Halalu-halalu,
tunggáiána lalungkiꞌ bona niꞌisá ntepuꞌu apa to ina mewaliꞌ i tauna to mepoinálái to matemoheꞌ,
bona tiꞌara masusa ntepuꞌu lalumi nodoheꞌ tauna to tiꞌara ara pehárungáꞌáraꞌ i Pueꞌ Ala.
14 Noumbá katapoináláina Pueꞌ Iesu to mate haneꞌi tueꞌ huleꞌ,
noꞌonoꞌ woꞌo katapoináláina,
upu-upu tauna to mepoinálái i Hia agáiáná matemoheꞌ,
ina tueꞌheꞌ woꞌo huleꞌ.
Hai ina naꞌántiheꞌ Pueꞌ Ala bona tueꞌheꞌ hingkakani hai Ia.
15 Deꞌe miꞌi paturoꞌ to kitarima hangko i Pueꞌ Iesu:
i kahaweꞌNa huleꞌ,
kitaꞌ to tueꞌ mani,
tiꞌarakeꞌ ina moioru hangko i halalu hampepepoináláintaꞌ to matemoheꞌ,
16 láwiꞌ ane mendáulu mai Pueꞌ Iesu hangko i surugáꞌ,
ina tahádi pekióꞌna tadulakoraꞌ malaꞌeka hai pokániꞌ tamburuꞌna Pueꞌ Ala.b
Hai i tempó iti,
ina tueꞌ huleꞌ upu-upu tomate to mepoinálái i Kerisitu.
17 Hangko ionoꞌ,
kitaꞌ to tueꞌ mani ina Naoreꞌ hingkakani hai hira,
lao i lalu gawu mampohidupaꞌá Pueꞌ Iesu i wongko langiꞌ.c
Hai ina toroꞌkeꞌ hingkakani hai Pueꞌ duuꞌna i rue-ruena.
18 Mewaliꞌ halalu-halalu,
mombepakaróhókou hadua hai hadua moliu bámbári to kipahaweꞌámokou deꞌe.