Surana Paulu to Karongkánina i
Timotiu
Laluita to mopakanótó óntóꞌna sura
Paulu moukiꞌ sura deꞌe i tempóna ratarungku i kótá Roma rekeꞌ-rekeꞌna pare ini puloꞌna hai ini roo karapoánákana Iesu (66M). I tempó iti, matoama miꞌi, hai tiꞌara piꞌi ara tauna to mamporángá láwiꞌ ina rahuku mate. Mewaliꞌ, sura deꞌe naukiꞌ Paulu hai napakatuá Timotiu, hadua tauna to marue miꞌi mamporángá Paulu. Sura deꞌe nodo peawilina Paulu i Timotiu.
Ntóáꞌna paturoꞌna Paulu ia miꞌi bona Timotiu tetidaꞌ i pepoináláina. Paulu mampoweꞌi woꞌo laluita bona Timotiu mopahaweꞌ oaꞌ Ngkóráꞌ Marasa hai mepaturoꞌ mokana i Sura Magasaꞌ. Kehapiꞌ narampe kapári hai raewaꞌ tauna, bágóꞌna iti tiꞌara peisá nakábáhá; bateꞌna napobágóꞌ oaꞌ.
Paulu mampopaingáꞌá Timotiu bona ineeꞌ mampesuaꞌi pombeheheꞌ to tiꞌara mobunduꞌ hai to mopakarugiꞌ peá pekiriraꞌ tauna.
Timotiu hangaa-ngaa mampeuláꞌi pándiriꞌ hangko i katueꞌna Paulu. Hangaa-ngaa maróhó pepoináláina, sabaraꞌ i upu-upu tauna, maꞌahiꞌ i tauna, hai mantaha i lalu kapári.
I lalu sura deꞌe, Paulu mokábelái rodua tauna to moánti paturoꞌ to salaꞌ. Mouláꞌ tauna iti, “Pearóraꞌ upu-upu tauna to mate mewaliꞌ miꞌi” (2:17-18). To ratunggái ia miꞌi: Pueꞌ Ala mampoweꞌi pekeꞌ katueꞌ to woꞌu i duniáꞌ deꞌe. Tiꞌarakeꞌ ina Napopearó huleꞌ hangko i kapate i kahópóꞌána duniáꞌ. Agáiáná nauliꞌ Paulu, paturoꞌraꞌ iti tiꞌara toꞌu. I tempó to ina haweꞌ, upu-upu tauna to mate miꞌi bateꞌna ina napopearó Pueꞌ Ala, bona tueꞌheꞌ huleꞌ. (Básá woꞌo 1 Korintu 15:12,19-23; 1 Tesalonika 4:16-17.)
Óntóꞌna
1. Tabeá (1:1-2)
2. Paulu manguliꞌ handaꞌ kamaroꞌana i Pueꞌ Ala ánti pepoináláina Timotiu (1:3-5)
3. Paulu mopaturoꞌ Timotiu hai mopakaróhó laluna (1:6–4:5)
4. Paulu mampolaluita kana i katueꞌna haduduána (4:6-18)
5. Kahópóꞌána laluita (4:19-22)