Paulu motuntu mokana i pobágóꞌna i Tesalonika
2
Halalu-halalu,
niꞌisánto katiꞌárána mpuꞌu mbero-mbero kamawonggoꞌkiꞌ hangkoia tempóngkiꞌ lao moweoꞌkou i kótámi.
2 Hangko tiꞌara maniangkaiꞌ haweꞌ i kótámi,
rapopeahiahiꞌangkaiꞌ hai rasasalaꞌiangkaiꞌ i kótá Pilipi.a
Niꞌisá miꞌi apa to pewaliꞌ i kaiꞌ!
Kehapiꞌangkaiꞌ raewaꞌ handaꞌ tauna i kótámi,
agáiáná Pueꞌ Ala mopakaróhó lalungkiꞌ bona tiꞌaraꞌangkaiꞌ malááꞌ mopaliliu bágóꞌkiꞌ mopahaweꞌákou Ngkóráꞌ Marasa to hangko i Pueꞌ Ala.
3 Tiꞌarakou kiwáwáhá mampeuláꞌi paturoꞌ to salaꞌ.
Tiꞌara woꞌo ara tunggáiángkiꞌ to kadake,
hai tiꞌaraꞌangkaiꞌ mampoinao mopakanawoꞌ ba heáná peá.
4 Tiꞌaraꞌangkaiꞌ woꞌo molaluita bona kipagóeꞌ peá laluraꞌ tauna,
agáiáná mopahaweꞌangkaiꞌ apa to mopagóeꞌ Pueꞌ Ala,
láwiꞌ Ia to mopáresáꞌ lalungkiꞌ hai Napoináláiangkaiꞌ moánti Ngkóráꞌ Marasa.
5 Niꞌisá miꞌi,
halalu-halalu,
tiꞌaraꞌangkaiꞌ mopahaweꞌ apa to mopagóeꞌ peá lalumi.
Tiꞌaraꞌangkaiꞌ mampe to maroꞌa bona molámbiꞌangkaiꞌ ba apa-apa hangko i kómu.
Pueꞌ Ala to mosabiki!
6 Tiꞌaraꞌangkaiꞌ woꞌo mampopetóiá i kómu ba i tauna ntániꞌna.
Katoꞌuána,
tiꞌaranto woꞌo masalaꞌ ane membiáꞌangkaiꞌ ba apa-apa i kómu halalu-halalu,
láwiꞌ kaiꞌ deꞌe surona mpuꞌuangkaiꞌ Kerisitu.
7 Agáiáná tiꞌara tuꞌu inaongkiꞌ mobábehi noꞌonoꞌ.
I tempóngkiꞌ hingkakani mani hai kómu,
maꞌálusuꞌ pambiárángkiꞌ,
nodo hadua inaꞌ to mokádipurá ánáꞌna.
8 Ánti kamaꞌahiꞌkiꞌ i kómu,
góeꞌangkaiꞌ mopahaweꞌákou Ngkóráꞌ Marasa to hangko i Pueꞌ Ala,
hai tiꞌara iti peá.
Mogalo riꞌi katueꞌkiꞌ,
kihuhuꞌ bona peisákou kitulungi.
9 Halalu-halalu,
hangaa-ngaa nibuhinao mani noumbá kamawonggoꞌkiꞌ mobágóꞌ hangkoia.
Mobágóꞌangkaiꞌ matimi bona ara pandeꞌkiꞌ,
hai bona tiꞌarakou kipamapári tangaꞌkiꞌ mopaturoꞌákou Ngkóráꞌ Marasa to hangko i Pueꞌ Ala.
10 Niꞌisá kamanótóna bábehiángkiꞌ hai tiꞌara ara kamasalaꞌkiꞌ i kómu to mepoinálái i Pueꞌ Iesu.
Kómu to mewaliꞌ sabiꞌkiꞌ hingkakani hai Pueꞌ Ala.
11 Niꞌisá miꞌi pekádipurángkiꞌ i kómu upu-upu,
nodoangkaiꞌ hadua umaꞌ i ánáꞌna.
Kiweꞌikou laluita hai kipakaróhó lalumi,
12 hai kipembiáꞌ ntepuꞌu bona bábehiámi hintotoꞌ hai peundeꞌána Pueꞌ Ala,
láwiꞌ Pueꞌ Ala to mokióꞌkou mewaliꞌ taunáNa,
bona molámbiꞌkou gáláꞌmi i lalu popárentáNa hai peawaꞌNa.b
13 Ara mani hampákáꞌ to moruaꞌ lalungkiꞌ haneꞌi kiuliꞌ oaꞌ handaꞌ kamaroꞌana i Pueꞌ Ala,
ia miꞌi i kanitarimana ngkóráꞌna Pueꞌ hangko i kaiꞌ,
tiꞌara nitarima nodo laluita to hangko i tauna peá,
agáiáná nodo mpuꞌumokou motarima laluita to hangko i Pueꞌ Ala.
Hai deꞌe-deꞌe,
ngkóráꞌna Pueꞌ Ala iti mokale i lalumi,
láwiꞌ mepoináláimokou i Pueꞌ Iesu.
14 Kiꞌisá iti,
halalu-halalu,
láwiꞌ apa to mewaliꞌ i toSarani i tampoꞌ Iudá,
mewaliꞌ miꞌi woꞌo i kómu.
Nodo halalu hampepepoináláintaꞌ i tampoꞌ Iudá rapopeahiahiꞌheꞌ hangka toIahudiꞌraꞌ,
kómu woꞌo rapopeahiahiꞌkou hangka toTesalonikami.
15 Hangkoia toIahudiꞌ mopapateheꞌ bahangapa nabiꞌ,
hai bahangapa parena to liu,c
mopapate wopaheꞌ Pueꞌ Iesu.
Deꞌe-deꞌe,
kaiꞌ wopiꞌi to rapopeahiahiꞌ toIahudiꞌ to tiꞌara mepoinálái.
Tiꞌaraheꞌ mopagóeꞌ Pueꞌ Ala,
hai mampoewaliáheꞌ upu-upu tauna.
16 Iti tongawaꞌ hangko i bábehiáraꞌ,
láwiꞌ rakóntóangkaiꞌ bona tiꞌaraꞌangkaiꞌ peisá mopahaweꞌ Ngkóráꞌ Marasa i tauna to tiꞌaraheꞌ toIahudiꞌ,d
mole Ngkóráꞌ Marasa iti peisá mohómpókiheꞌ hangko i huku dósáraꞌ.
Mewaliꞌ mantámbái oaꞌ bábehiáraꞌ to kadake,
duuꞌna gáná imbaꞌna kahandaꞌna dósáraꞌ,
álána molámbiꞌheꞌ pehukuna Pueꞌ Ala.
Paulu mampoinao wopiꞌi moweoꞌ toTesalonika
17-18 Halalu-halalu,
tiꞌara mani marue pogááꞌtaꞌ,e
agáiáná mabila ntepuꞌumongkaiꞌ i kómu.
Kehapiꞌkeꞌ mogááꞌ karaoꞌ,
agáiáná laluntaꞌ bateꞌna hidupaꞌ.
Ánti kamabilangkiꞌ,
kipeliꞌ mpuꞌu rárá bona peisáꞌangkaiꞌ lao moweoꞌkou.
Hai kódóꞌ Paulu,
bahangapa miꞌi kánina kupoinao ina lao moweoꞌkou,
agáiáná Datu Tokadake mosalemporiaꞌ oaꞌ.
19 Kipoinao mpuꞌu moweoꞌkou,
láwiꞌ ane haweꞌ miꞌi tempó kahaweꞌána Pueꞌtaꞌ Pueꞌ Iesu hai hirámpukeꞌ i lindoꞌNa,
heáná mani paꞌi to ina mewaliꞌ wuaꞌna pobágóꞌkiꞌ to kihárungá hai kipokagóeꞌ?
20 Bateꞌna mpuꞌu peá kómu to kipomahile hai kipokagóeꞌ!