1 Tesalonika 1

Surana Paulu to Rungu-runguna

i toSarani i Kótá

Tesalonika

Molámbiꞌ Jemaꞌa

i kótá Tesalonika

1 Sura deꞌe hangko i kaiꞌ to tálu:

Paulu,

Silasi^a hai Timotiu.

Kipakatu sura deꞌe haweꞌ i kómu toTesalonika to mohintuwuꞌ hai Pueꞌ Ala Umántaꞌ hai Pueꞌ Iesu Kerisitu!

Tabeá maroꞌa.

Mekakaeangkaiꞌ i Pueꞌ Ala bona Nawátiꞌkou hai Naweꞌikou roꞌa ngkatueꞌ.

Katueꞌraꞌ hai pepoináláiraꞌ toTesalonika

2 Halalu-halalu,

tiꞌaraꞌangkaiꞌ luleꞌ manguliꞌ handaꞌ kamaroꞌana i Pueꞌ Ala ánti kakómuna.

3 Ane mekakaeangkaiꞌ i Pueꞌ Ala Umántaꞌ,

kibuhinao oaꞌ pobágóꞌmi i Pueꞌ ánti pepoináláimi,

kibuhinao petulungimi i hángká rángámi ánti kamaꞌahiꞌmi,

hai kibuhinao kamantahami i lalu kapári ánti pehárungámi i Pueꞌtaꞌ Iesu Kerisitu.

4 Kiꞌisá halalu-halalu,

Pueꞌ Ala mampokaꞌahiꞌkou hai Napileꞌimokou mewaliꞌ taunáNa,

5 láwiꞌ kiꞌisá i tempóngkiꞌ mopahaweꞌákou Ngkóráꞌ Marasa,

tiꞌara haduduángkiꞌ peá to molaluita,

agáiáná Inao to Magasaꞌ to moweꞌiangkaiꞌ kuasaꞌ molaluita,

hai kipoinálái ntepuꞌu katoꞌuna Ngkóráꞌ Marasa iti.

Niꞌisá noumbá rárána katueꞌkiꞌ i tempóngkiꞌ mani hingkakani hai kómu,

hai upu-upuna iti kibábehi bona motulungikou.

6 Hai kómu halalu-halalu,

i kanihádina Ngkóráꞌ Marasa iti,

nipeuláꞌi bábehiángkiꞌ hai bábehiána Pueꞌ Iesu,

láwiꞌ kehapiꞌ rumihi karapopeahiahiꞌmi,

góeꞌkou oaꞌ motarima Ngkóráꞌ Marasa.

Kagóeꞌmi iti mentóáꞌ hangko i Inao to Magasaꞌ.

7 Mewaliꞌ,

deꞌe-deꞌe bábehiámi rapeuláꞌi upu-upu halalu hampepepoináláimi i tampoꞌ Makedonia hai Akaia,

8-9 láwiꞌ mantepuꞌu hangko i kómu,

ngkóráꞌna Pueꞌ rabámbári i humalele tampoꞌ Makedonia hai tampoꞌ Akaia.

Hai tiꞌara peá ionoꞌ,

agáiáná pepoináláimi i Pueꞌ Ala iumbá-umbá peá rapolaluita.

Mewaliꞌ,

tauna to toroꞌ i upu-upu wánuá to kikalaoi moisámoheꞌ noumbá kanitarimangkiꞌ.

Tiꞌarapongkaiꞌ paraluu mopahaweꞌ apa-apa,

láwiꞌ tauna iti mohádimoheꞌ bámbári to manguliꞌ noumbá kanikábáhána menómbá i ánitu,

katebálikina miꞌi lalumi hai pengkoruꞌmi i Pueꞌ Ala to toꞌu-toꞌu ara hai to tueꞌ oaꞌ haweꞌ i rue-ruena.

10 Tauna iti mampolaluitaheꞌ woꞌo noumbá pehárungámi i kaꞌina haweꞌna huleꞌ Ánáꞌna Pueꞌ Ala hangko i surugáꞌ,

ia miꞌi Iesu to napatueꞌ huleꞌ Pueꞌ Ala hangko i kapate.

Iesu miꞌi to mohómpókikeꞌ hangko i pehukuna Pueꞌ Ala to ina morampe tauna to tiꞌaraheꞌ mepoinálái i Hia.