Pándiriꞌ hangko i katueꞌna Burahima
1. Burahima mewaliꞌ manótó i peitána Pueꞌ Ala ánti pepoináláina, tiꞌara ánti kamaroꞌana bábehiána
4
Mewaliꞌ,
apa mani to peisá ina tauliꞌ mokana katueꞌna Burahima toioruntaꞌ?
Noumbá rárána haneꞌi ia mewaliꞌ manótó i peitána Pueꞌ Ala?
2 Ane rápáꞌna Burahima mewaliꞌ manótó i peitána Pueꞌ Ala ánti bábehiána to maroꞌa,
peisá miꞌi mampepemahile.
Agáiáná tiꞌara ara álásána Burahima mampepemahile i lindoꞌna Pueꞌ Ala,
láwiꞌ ia tiꞌara mewaliꞌ manótó i peitána Pueꞌ Ala ánti bábehiána to maroꞌa.a
3 Teukiꞌ i Sura Magasaꞌ node:
“Burahima mepoinálái i Pueꞌ Ala,
onoꞌ miꞌi haneꞌi narekeꞌ Pueꞌ Ala manótó i peitáNa.” (Pewaliꞌána 15:6)
4 Pándiriꞌna:
tauna to mobágóꞌ molámbiꞌ saro.
Saroraꞌ iti tiꞌara raweꞌi mbero,
láwiꞌ mewaliꞌ miꞌi gáláꞌraꞌ ánti pobágóꞌraꞌ.
5 Agáiáná pohintuwuꞌtaꞌ hai Pueꞌ Ala tiꞌara nodo tauna to molámbiꞌ saro,
láwiꞌ tiꞌarakeꞌ natarima Pueꞌ Ala ánti kamaroꞌana bábehiántaꞌ.
Ane mepoináláikeꞌ i Hia,
kehapiꞌkeꞌ madósá,
Narekeꞌkeꞌ tauna to manótó i peitáNa ánti pepoináláintaꞌ i Hia.
6 Paturoꞌ deꞌe hibali hai laluitana Datu Daudiꞌ hangkoia.
Ia mampolaluita kana i kamorasiꞌraꞌ tauna to Narekeꞌ Pueꞌ Ala manótó i peitáNa,
agáiáná tiꞌara ánti kamaroꞌana bábehiáraꞌ.
7 Nauliꞌ Daudiꞌ node:
“Morasiꞌ tauna to teámpungi salaꞌraꞌ,
hai to tewehángi dósáraꞌ.
8 Morasiꞌ ntepuꞌuheꞌ,
láwiꞌ Pueꞌ Ala tiꞌara piꞌi mopailalu dósáraꞌ.” (Sura Petóiá 32:1-2)
2. Burahima mewaliꞌ manótó i peitána Pueꞌ Ala ánti pepoináláina, tiꞌara ánti karatileꞌna
9 Ba pewátiꞌ to napolaluita Daudiꞌ iti talámbiꞌ peá kitaꞌ toIahudiꞌ to ratileꞌ?
Tiꞌara.
Pewátiꞌ iti ralámbiheꞌ woꞌo tauna to tiꞌara ratileꞌ.
Láwiꞌ nodo to kupahaweꞌámokou,
Pueꞌ Ala morekeꞌ Burahima manótó i peitáNa ánti pepoináláina.
10 Impirá pantepuꞌuána Burahima mewaliꞌ manótó i peitána Pueꞌ Ala?
Karoona ratileꞌ ba hangko tiꞌara mani ratileꞌ?
Taisá hangko i daritakáná Burahima,
ia mewaliꞌ manótó i peitána Pueꞌ Ala hangko tiꞌara mani ratileꞌ.b
11 Karatileꞌna iti mewaliꞌ peá tandaꞌ kamanótóna i peitána Pueꞌ Ala.
Mewaliꞌ tongawaꞌ miꞌi i kitaꞌ:
Burahima mewaliꞌ manótó i peitána Pueꞌ Ala ánti pepoináláina hangko tiꞌara mani ratileꞌ.
Iti miꞌi to mopatongawaꞌ Burahima kamewaliꞌna woꞌo umáraꞌ upu-upu tauna to tiꞌara toIahudiꞌ to mepoinálái i Iesu,
láwiꞌ kehapiꞌheꞌ tiꞌara ratileꞌ mouláꞌ Paturoꞌna Musa,
bateꞌna peisáheꞌ mewaliꞌ manótó i peitána Pueꞌ Ala láwiꞌ mepoináláiheꞌ hibali hai Burahima.
12 Noꞌonoꞌ woꞌo Burahima rapouma toIahudiꞌ to mepoinálái i Iesu,
láwiꞌ ia miꞌi to mewaliꞌ pándiriꞌ,
tiꞌara peá ánti karatileꞌraꞌ,
agáiáná ánti kamampeuláꞌiraꞌ woꞌo pepoináláina Burahima hangko tiꞌara mani ratileꞌ.
3. Burahima motarima dándina Pueꞌ Ala ánti pepoináláina, tiꞌara ánti pampeuláꞌina Paturoꞌna Musa
13 Hangkoia Pueꞌ Ala modándi i Burahima hai i pemuleꞌána kaꞌina hirána mampopueꞌ duniáꞌ.c
Pueꞌ Ala modándi noꞌonoꞌ i Burahima hai pemuleꞌánaheꞌ,
tiꞌara ánti pampeuláꞌiraꞌ Paturoꞌna Musa,
agáiáná ánti pepoináláiraꞌ,
14 láwiꞌ ane tauna to mampeuláꞌi Paturoꞌna Musa to molámbiꞌ apa to nadándi Pueꞌ Ala,
lempóna,
pepoináláintaꞌ i Pueꞌ Ala mbero-mbero peá,
hai apa to nadándi Pueꞌ Ala tiꞌara ina mewaliꞌ.
15 Tongawaꞌ hangko i Párentána Pueꞌ Ala to napahaweꞌ Musa,
kataliungina párentána Pueꞌ Ala iti mopaꞌara kamabukoꞌNa,
haneꞌi hangaa-ngaa Nahukukeꞌ.
Ane rápáꞌna tiꞌarakeꞌ napoweꞌi Pueꞌ Ala PárentáNa,
ketiꞌarakeꞌ Narekeꞌ masalaꞌ moliungi PárentáNa iti.
16 Mewaliꞌ,
Pueꞌ Ala morekeꞌkeꞌ manótó i peitáNa ánti pepoináláintaꞌ,
bona hangko i kabulána laluNa,
upu-upu pemuleꞌána Burahima bateꞌna ina molámbiꞌ apa to Nadándi.
Dándina Pueꞌ Ala iti tiꞌara peá gáláꞌraꞌ toIahudiꞌ to mangisá Paturoꞌna Musa,
agáiáná mewaliꞌ woꞌo gáláꞌraꞌ heáná peá tauna to mepoinálái i Pueꞌ Ala hibali hai Burahima,
láwiꞌ Burahima ia miꞌi umántaꞌ upu-upu.
4. Burahima mampoinálái kamakuasaꞌna Pueꞌ Ala mobukeki dándiNa
17 Ara laluitana Pueꞌ Ala i Burahima to teukiꞌ node:
“Ina Kupopewaliꞌkoꞌ umáraꞌ handaꞌ tauna i humalele duniáꞌ.”d
I peitána Pueꞌ Ala,
Burahima mewaliꞌ umántaꞌ upu-upu to mepoinálái,
láwiꞌ ia mepoinálái i Pueꞌ Ala,
hai Pueꞌ Ala Ia miꞌi to mopatueꞌ huleꞌ tomate.
Hai moliu peá ngkóráꞌNa,
Ia mopaꞌara apa to tiꞌara ara,
bona ara.
18 Tiꞌara piꞌi ara pehárungána Burahima ina memuleꞌ láwiꞌ matoama miꞌi,
agáiáná Burahima bateꞌ-bateꞌna mepoinálái hai mehárungá oaꞌ i dándina Pueꞌ Ala i hia,e
álána ia mewaliꞌ umáraꞌ handaꞌ tauna i humalele duniáꞌ,
láwiꞌ hangko tiꞌara mani ara muleꞌna,
Pueꞌ Ala modándi miꞌi i hia,
Nauliꞌ,
“Pemuleꞌámu ina handaꞌ ntepuꞌu.”f
19 I tempó iti,
tinuwuꞌna Burahima hungkuꞌ miꞌi hangatu parena,g
hai tiꞌara piꞌi maróhó wátána láwiꞌ matoama ntepuꞌu miꞌi.
Noꞌonoꞌ woꞌo Sáráꞌ toinána matoina miꞌi hai lalo.
Kehapiꞌ noꞌonoꞌ,
tiꞌara makuraꞌ pepoináláina Burahima,
bateꞌna napoinálái oaꞌ kaꞌina árána muleꞌna.
20 Tiꞌara bata-bata laluna i dándina Pueꞌ Ala,
agáiáná katetátámbáiá riꞌi pepoináláina i dándina Pueꞌ Ala.
Ánti pepoináláina iti,
maróhó laluna,
onoꞌ miꞌi haneꞌi Burahima motóiá oaꞌ Pueꞌ Ala,
21 hai napoinálái ntepuꞌu Pueꞌ Ala makuasaꞌ mobukeki dándiNa.
22 Ánti pepoináláina iti,
ara teukiꞌ i lalu Sura Magasaꞌ to manguliꞌ:
“Pueꞌ Ala morekeꞌ Burahima manótó i peitáNa.”h
23 To teukiꞌ iti,
tiꞌara peá mokana i Burahima,
24 agáiáná mokana woꞌo i kitaꞌ.
Kitaꞌ natarimamokeꞌ Pueꞌ Ala,
hai Narekeꞌmokeꞌ manótó i peitáNa láwiꞌ mepoináláikeꞌ i Pueꞌ Ala to mopatueꞌ huleꞌ Pueꞌtaꞌ,
Pueꞌ Iesu.
25 Iesu miꞌi iti to rapehuhuꞌá bona rapapate mosulewátáikeꞌ ánti kamasalaꞌtaꞌ,i
hai rapatueꞌ huleꞌ bona kitaꞌ mewaliꞌkeꞌ manótó i peitána Pueꞌ Ala.