3
PUEꞌ to Makuasaꞌ mongkóráꞌ, Nauliꞌ, “Nipehádingi! Ina Kuhuoꞌ huoꞌáNgkuꞌ bona mopatimama ráráNgkuꞌ.a Mewaliꞌ hangkaꞌ-hangkaꞌ Pueꞌ to nipeliꞌ ina haweꞌ miꞌi i támbiNa. HuoꞌáNgkuꞌ to nipepegiá iti ina haweꞌ hai mopahaweꞌ podándiNgkuꞌ.”b2 Agáiáná heáná to nabuku mantaha i alo kahaweꞌNa? Hai heáná to nabuku meángkáꞌ i lindoꞌNa ane Ia mopatongawaꞌ wátáNa. Láwiꞌ Ia nodo api to napakeꞌ tauna mampopengkilaꞌ tambaga, hai nodo sabuꞌ to napakeꞌ topobahoꞌi.c 3 Ia ina haweꞌ mepáresáꞌ, nodo tauna to mampopengkilaꞌ peráꞌ, hai Ia ina mopamagasaꞌ pemuleꞌána Lewi, iamoheꞌ tadulako menómbá, nodo buláwá hai peráꞌ, bona mewaliꞌheꞌ tauna to mohuhuꞌ popenómbá to napokana PUEꞌ. 4 Mewaliꞌ popenómbáraꞌ toIudá hai to i Ierusale ina mopagóeꞌ laluna PUEꞌ nodo to mewaliꞌ miꞌi hangkoia.
5 PUEꞌ to Makuasaꞌ mongkóráꞌ, Nauliꞌ, “Ina poloꞌAꞌ haweꞌ mobutusi kara-karami, hai ina mewaliꞌAꞌ sabiꞌ moewaꞌ topedoti, topebuálósi, sabiꞌ dongkoꞌ, hai tauna to mampopeahiahiꞌheꞌ tauna ntániꞌna nodo to mobagiuꞌheꞌ topobágóꞌ, tobembaꞌ, ánángkóiꞌ to ilu, hai tohaweꞌ. Hai ina mewaliꞌAꞌ woꞌo sabiꞌ kana i upu-upu tauna to tiꞌaraꞌAꞌ mobiláꞌ.”
Popenómbá hanggáláꞌ hampuloꞌ
6 PUEꞌ to Makuasaꞌ mongkóráꞌ, Nauliꞌ, “Kódóꞌ miꞌi PUEꞌ, tiꞌaraꞌAꞌ mambáliꞌ, onoꞌ miꞌi haneꞌi kómu toSáráeliꞌ pemuleꞌána Iako, tiꞌarakou Kupatuna. 7 Mantepuꞌu hangko i toiorumiheꞌ, moliungikou áturáNgkuꞌ, hai tiꞌara nipailalu. Mewaliꞌ hangaa-ngaa mesuleꞌkou i Kódóꞌ, hai ina mesuleꞌAꞌ woꞌo i kómu.
Agáiáná nipekuneꞌ, ‘Apa to hangaa-ngaa kibábehi bona mesuleꞌangkaiꞌ i Hio?’
8 Deꞌe-deꞌe mekuneꞌAꞌ i kómu: Maroꞌa paꞌi tauna moákálángi Pueꞌ Ala? Bateꞌna tiꞌara maroꞌa.
Agáiáná niákálángiraꞌAꞌ hai mekuneꞌkou, ‘Noumbá riꞌi haneꞌi Nuꞌuliꞌ kiákálángiKoꞌ?’
Mewaliꞌ Kuhánikikou: Kana i popenómbá hanggáláꞌ hampuloꞌ hai popenómbá to ntániꞌna to nihuhuꞌáꞌAꞌ. 9 Upu-upukou toSáráeliꞌ moákálángiAꞌ, onoꞌ miꞌi haneꞌi ina molámbiꞌkou pehuku.
10 Mewaliꞌ upu-upu popenómbá to hanggáláꞌ hampuloꞌ iti hangaa-ngaa niánti hai niwoli i lalu lintuꞌ pemboliá pandeꞌ i támbiNgkuꞌ,d bona gáná pandeꞌraꞌ tadulako menómbá ionoꞌ. Niꞌita rái haduduámi apa to ina Kubábehi. Ina Kubungkáhiákou upu-upu babaꞌ langiꞌ hai ina Kupoweꞌikou pewátiꞌ to handaꞌ ntepuꞌu.e 11-12 Tiꞌaraheꞌ ina Kupatodáhi katupeeꞌ moandeꞌ tudaꞌ-tudaꞌmi, hai anggoroꞌ to nitudaꞌ i pádá tiꞌara ina maránáꞌ hangko tiꞌara mani mangka. Onoꞌ miꞌi haneꞌi ina rauliꞌ tauna, maroꞌa katueꞌmi, láwiꞌ tampoꞌmi deꞌe maroꞌa rakatoroꞌi.” Eneꞌ miꞌi ngkóráꞌna PUEꞌ to Makuasaꞌ.
Tauna to tetidaꞌ i Pueꞌ Ala ina molámbiꞌheꞌ háwángina
13 PUEꞌ mongkóráꞌ, Nauliꞌ, “Makasaraꞌ ntepuꞌu polaluitami i Kódóꞌ.
Agáiáná mekuneꞌkou, niuliꞌ, ‘Noumbá riꞌi haneꞌi Nuꞌuliꞌ makasaraꞌangkaiꞌ?’ 14 Láwiꞌ niuliꞌ, ‘Mbero-mbero pekeꞌ menómbá i Pueꞌ Ala. Apa miꞌi pobunduꞌána mampeuláꞌikeꞌ áturáNa? Hai apa woꞌo pobunduꞌána mopatongawaꞌkeꞌ kapenosoꞌtaꞌ i PUEꞌ to Makuasaꞌ? 15 Taitanto haduduántaꞌ, tauna to mampepemahile, maroꞌa katueꞌraꞌ. Tauna to kadake, tiꞌara peá mantámbái kamaroꞌana katueꞌraꞌ, agáiáná kehapiꞌ mampehukáꞌheꞌ kasabaraꞌna Pueꞌ Ala, bateꞌraꞌ peá tiꞌara molámbiꞌ pehuku.’ ”
16 Agáiáná tauna to mengkoruꞌ i PUEꞌ, molaluitaheꞌ hadua hai hadua. PUEꞌ mohádi hai mopailalu apa to rauliꞌ iti. Bábehiáraꞌ tauna to mengkoruꞌ i PUEꞌ hai mobiláꞌ hangaꞌNa raukiꞌ i hambuaꞌ sura i lindoꞌna PUEꞌ bona rabuhinao oaꞌ.f
17 PUEꞌ to Makuasaꞌ mongkóráꞌ wopiꞌi, Nauliꞌ, “I alo to Kupakanótó miꞌi, hira iti ina mewaliꞌheꞌ taunáNgkuꞌ to Kupokaꞌahiꞌ, nodo hadua umaꞌ to mampokaꞌahiꞌ ánáꞌna to mengkoruꞌ i hia. 18 Tempó iti, kómu taunáNgkuꞌ ina moita wopakou katiꞌárána hibali katueꞌraꞌ tauna to manótó hai tauna to kadake. Ina niꞌita woꞌo katiꞌárána hibali tauna to menómbá i Kódóꞌ hai tauna to tiꞌara menómbá i Kódóꞌ.”