Maleaki 4

Alona Pueꞌ

PUEꞌ to Makuasaꞌ mongkóráꞌ, Nauliꞌ, “Ina haweꞌ alo pehuku nodo api to lolaaꞌ. Upu-upu tauna to mampepemahile hai kadake bábehiáraꞌ, ina nodoheꞌ deami. I alo iti, ina raintuheꞌ upu-upu hai tiꞌara ina ara to mentárá, nodo kau to raintu pumpu haweꞌ-haweꞌ i kálándána. 2 Agáiáná kómu to mengkoruꞌkou i Kódóꞌ, kuasaꞌKuꞌ mohómpókikou ina membeto nodo alo, hai pewangkaꞌna mopaꞌara roꞌa ngkatueꞌ.^a Kómu ina tekábáhákou hai góeꞌkou, nodokou ánáꞌ gapiꞌ to mentimboꞌ-ntimboꞌ láwiꞌ rapopesuwuꞌ hangko i gimpu. 3 I alo to Kupakanótó iti, kómu ina monangikou tauna to kadake bábehiáraꞌ, haneꞌi ina nipangka-pangkaheꞌ nodo awu.” Eneꞌ miꞌi ngkóráꞌna PUEꞌ to Makuasaꞌ.

4 “Hangaa-ngaa nibuhinao paturoꞌ, áturá hai párentá to Kupeweꞌi i Musa hangkoia i buluꞌ Sinai,^b bona kómu toSáráeliꞌ mampeuláꞌikou upu-upuna iti.

5 Nipehádingi! Hangko tiꞌara mani haweꞌ alo to tepakanótó miꞌi hai meriringkuꞌi iti, ina Kuhuoꞌ nabiꞌ Eliá^c lao i kómu. 6 Ia ina mepaturoꞌ hai mopahintuwuꞌ huleꞌ umaꞌ-umaꞌ hai ánáꞌraꞌ, noꞌonoꞌheꞌ woꞌo ánángkóiꞌ hai umáraꞌ, bona tiꞌaraꞌAꞌ ina mai mopatuna tampoꞌmi.”