Pueꞌ Ala mokámbáróáheꞌ tadulako menómbá
2
1-2 PUEꞌ to Makuasaꞌ mongkóráꞌ i kómu tadulako menómbá, Nauliꞌ node: “Deꞌe miꞌi pepaingáꞌiNgkuꞌ i kómu: Ane tiꞌarakou mampehádingi ngkóráꞌKuꞌ, hai tiꞌarakou mampomahile hangaꞌKuꞌ, ina Kuhukukou, hai hinángkáꞌ pewátiꞌ to nitárima ina mewaliꞌ pehuku. Hai pewátiꞌ iti mewaliꞌ miꞌi pehuku láwiꞌ tiꞌarakou mopailalu pepaingáꞌiNgkuꞌ. 3 I tempómi mamposusai alo mahile, ina Kuhuku pemuleꞌámi, hai lindoꞌmi ina Kuriro hai remuꞌ hangko i taꞌiraꞌ binataꞌ to nipopenómbá i Kódóꞌ. Hai ina raꞌántikou ratibe i potámbungaꞌá remuꞌ iti. 4 Mewaliꞌ ina niꞌisá, pepaingáꞌi deꞌe Kupahaweꞌ i kómu bona podándiNgkuꞌ hai tadulako-tadulako menómbá pemuleꞌánaheꞌ Lewia ina ara oaꞌ.” Eneꞌ miꞌi ngkóráꞌna PUEꞌ to Makuasaꞌ.5 “PodándiNgkuꞌ hai toLewi iti mopaꞌara roꞌa ngkatueꞌ, hai Kuweꞌiheꞌ pewátiꞌ iti bona rabiláꞌAꞌ.b Hangkoia, mengkoruꞌheꞌ i Kódóꞌ hai mampomahileheꞌ hangaꞌKuꞌ. 6 Mopaturoꞌheꞌ apa to maroꞌa, tiꞌara to kadake. Meuláꞌheꞌ i Kódóꞌ i lalu roꞌa ngkatueꞌ, hai manótó laluraꞌ. Handaꞌ tauna to rapaturoꞌ menosoꞌheꞌ hangko i dósáraꞌ. 7 Tadulako menómbá hangaa-ngaa motibaaꞌheꞌ paturoꞌ to toꞌu mokana i Kódóꞌ PUEꞌ to Makuasaꞌ, hai tauna hangaa-ngaa mekuneꞌheꞌ i hira kana i paturoꞌ iti, láwiꞌ tadulako menómbá iamoheꞌ huoꞌáNgkuꞌ.
8-9 Agáiáná deꞌe-deꞌe, kómu tadulako menómbá, tiꞌarapokou mampeuláꞌi paturoꞌKuꞌ. Handaꞌ miꞌi tauna to nipakanawoꞌ moliu pepaturoꞌmi. Molingkaꞌikou totowi to Kupaꞌara i kómu pemuleꞌána Lewi. Mewaliꞌ ina Kupopewaliꞌkou tauna to tiꞌara rabiláꞌ toSáráeliꞌ, láwiꞌ tiꞌarakou mampeuláꞌi paturoꞌ to Kupakanótóámokou. Ngkáliꞌna riꞌi, ane mopaturoꞌkou taunáNgkuꞌ, nipopontaniꞌ-ntaniꞌheꞌ.” Eneꞌ miꞌi ngkóráꞌna PUEꞌ to Makuasaꞌ.
Maleaki mokámbáróá toSáráeliꞌ láwiꞌ tiꞌaraheꞌ tetidaꞌ
10 Upu-upuntaꞌ deꞌe, tiꞌara paꞌi hadua peá Umántaꞌ? Tiꞌara paꞌi hadua peá Pueꞌ Ala to mampopewaliꞌkeꞌ? Ane noꞌonoꞌi, moapa riꞌi haneꞌi tiꞌarakeꞌ mohintuwuꞌ? Molingkaꞌirakeꞌ totowi to napaꞌara Pueꞌ Ala hai toioruntaꞌ.
11 ToIudá molingkaꞌimoheꞌ podándiraꞌ hai Pueꞌ Ala hai mobábehiheꞌ bábehiá to meriringkuꞌi i tampoꞌ Sáráeliꞌ, tepasuaꞌ kótá Ierusale. Támbi to magasaꞌ to napokaꞌahiꞌ PUEꞌ rapakedái, láwiꞌ mampohambokoáheꞌ ánáꞌntawineraꞌ tauna to menómbáheꞌ i ánitu. 12 Tauna to mobábehi noꞌonoꞌ, rángina miꞌi nagáákiheꞌ PUEꞌ hangko i oloꞌraꞌ toSáráeliꞌ, kehapiꞌheꞌ moánti popenómbáraꞌ i PUEꞌ to Makuasaꞌ.
13 Ara mani bábehiámi to tiꞌara maroꞌa. Meángkáꞌkou hungkuꞌ i paintuá popenómbá hai teriaꞌkou meraruaꞌ i lindoꞌna PUEꞌ, láwiꞌ popenómbámi tiꞌara Napokana. 14 Hai mekuneꞌkou, niuliꞌ, ‘Moapa riꞌi haneꞌi Pueꞌ tiꞌara piꞌi motarima popenómbángkiꞌ?’ Láwiꞌ modándimokou i lindoꞌna PUEꞌ bona tetidaꞌkou i towawine to nipotoina i tempómi mani maleheꞌ, agáiáná deꞌe-deꞌe tiꞌarapokou tetidaꞌ i hia, mole riꞌi ia toinámi.
15 Tiꞌara paꞌi PUEꞌ Ala haduduáNa to mampopewaliꞌmokou hawátá-wátá? Apa tunggáiána hawátá-wátá iti? Tunggáiána bona memuleꞌkou, hai pemuleꞌámi mewaliꞌheꞌ tauna to manótó, taunána Pueꞌ Ala. Mewaliꞌ hangaa-ngaa nikámpái lalumi hai pekirimi bona ineeꞌ ara i oloꞌmi to tiꞌara tetidaꞌ i toinána.
16 PUEꞌ Ala to rapenómbái toSáráeliꞌ mongkóráꞌ, Nauliꞌ, “Kukáhihiꞌ pogááꞌ i pohamboko. Ane araheꞌ tobaleilo to mobábehi to kadake iti, bateꞌna mpuꞌu Kukáhihiꞌ bábehiá iti.
Mewaliꞌ nikámpái lalumi hai pekirimi, hai hangaa-ngaa tetidaꞌkou oaꞌ i toinámi.”c
Hungkuꞌ miꞌi alo pehuku
17 Kómu mopakasusamokou laluna PUEꞌ moliu polaluitami.
Agáiáná mekuneꞌkou, niuliꞌ, “Noumbá riꞌi haneꞌi nuꞌuliꞌ kipakasusa laluna PUEꞌ?”
Láwiꞌ niuliꞌ node: “Upu-upu tauna to mobábehi to kadake napokana PUEꞌ hai maroꞌaheꞌ i peitáNa.” Hai mekuneꞌ wopakou, “Iumbámi Pueꞌ Ala to rauliꞌ manótó pobutusiNa?”d