Maleaki
1
Ngkóráꞌna Pueꞌ Ala. Deꞌe miꞌi laluita to napahaweꞌ PUEꞌ i Maleaki, bona napahaweꞌáheꞌ toSáráeliꞌ.Pueꞌ mampokaꞌahiꞌ toSáráeliꞌ
2 PUEꞌ molaluita i taunáNaheꞌ, Nauliꞌ, “Kupokaꞌahiꞌkou.”
Agáiáná nihániki node: “Noumbá rárána kaNupokaꞌahiꞌkiꞌ?”
Nahániki PUEꞌ, “Tiꞌara paꞌi Esau wutuꞌna Iako? Kehapiꞌ noꞌonoꞌ, Iako hai pemuleꞌánaheꞌ to Kupileꞌi mewaliꞌ taunáNgkuꞌ, 3 tiꞌara Esau hai pemuleꞌánaheꞌ.a Onoꞌ miꞌi haneꞌi buluꞌ-buluꞌna to rakatoroꞌi pemuleꞌánaheꞌ Esau, Kupahoa, hai tampoꞌ sosoraraꞌ Kupopewaliꞌ pádá loriꞌ.”b
4 Babilaꞌ toEdo ina manguliꞌ, “Upu-upu wánuángkiꞌ magero miꞌi, agáiáná ina kiaró huleꞌ.”
Agáiáná PUEꞌ to Makuasaꞌ ina manguliꞌ, “Peisáheꞌ moaró, agáiáná bateꞌna peá ina Kugero huleꞌ, áláraꞌ ina rauliꞌ ‘tauna to kadake’ hai ina rauliꞌheꞌ woꞌo ‘tauna to nahuku PUEꞌ duuꞌna i rue-ruena.’ ”
5 Kómu toSáráeliꞌ, mátámi haduduámi ina moita apa to ina mewaliꞌ i toEdo iti, hai ina niuliꞌ node: “Makuasaꞌ ntepuꞌu PUEꞌ. KamakuasaꞌNa haweꞌ-haweꞌ i rawa tampoꞌ Sáráeliꞌ.”c
Popenómbá to tiꞌara hintotoꞌ
6 PUEꞌ to Makuasaꞌ mongkóráꞌ i tadulako-tadulako menómbá, Nauliꞌ, “Ánángkóiꞌ mobiláꞌheꞌ umáraꞌ, hai hawiꞌ mobiláꞌheꞌ tuáraꞌ. Agáiáná Kódóꞌ, kehapiꞌAꞌ umámi, moapa riꞌi haneꞌi tiꞌaraꞌAꞌ nibiláꞌ? KehapiꞌAꞌ tuámi, moapa riꞌi haneꞌi tiꞌaraꞌAꞌ nipomahile? Kómu tadulako menómbá, pakakou mopakóiꞌ hangaꞌKuꞌ.
Agáiáná mekuneꞌrakou, niuliꞌ, ‘Noumbá riꞌi haneꞌi Nuꞌuliꞌ kipakóiꞌ hangaꞌMu?’
7 Pandeꞌ to tiꞌara hintotoꞌ nihuhuꞌ i Kódóꞌ, onoꞌ riꞌi to nipopenómbá i wongko paintuá popenómbá.
Agáiáná mekuneꞌrakou, niuliꞌ, ‘Noumbá riꞌi haneꞌi Nuꞌuliꞌ katiꞌárána hintotoꞌ?’
Nipekiri tiꞌarakou paraluu mohuhuꞌ i Kódóꞌ popenómbá to hintotoꞌ i wongko paintuá popenómbá. 8 Ane mampopenómbákou binataꞌ to bilo, ba to mohakiꞌ, ba to mokuda, tiꞌara paꞌi bábehiámi iti bábehiá to kadake? Nipehukáꞌ binataꞌ to noꞌonoꞌ lao nipeweꞌi i mágáuꞌ. Natarima paꞌi, ba góeꞌ paꞌi laluna i kómu? Bateꞌna tiꞌara.”d Eneꞌ miꞌi ngkóráꞌna PUEꞌ to Makuasaꞌ.
9 Mewaliꞌ kómu tadulako menómbá, deꞌe-deꞌe mekakaekou i Pueꞌ Ala bona Ia mopatongawaꞌ kamaꞌahiꞌNa i kitaꞌ. Agáiáná ane nihuhuꞌ popenómbá to tiꞌara hintotoꞌ, bateꞌna tiꞌara ina Natarima. 10 PUEꞌ to Makuasaꞌ molaluita node: “Rángina miꞌi babaꞌ támbiNgkuꞌ ratuko bona tiꞌarakou peisá mopatueꞌ api i wongko paintuá popenómbá, láwiꞌ popenómbámi i Kódóꞌ mbero-mbero peá. Tiꞌarakou Kupogóeꞌ, hai tiꞌara woꞌo ina Kutarima popenómbámi. 11 HangaꞌKuꞌ ina rapomahile i humalele duniáꞌ. Iumbá-umbá peá, tauna ina mointu dupaꞌ tandaꞌ pebiláꞌraꞌ i Kódóꞌ, hai ina mohuhuꞌheꞌ hinángkáꞌ popenómbá to maroꞌa, láwiꞌ upu-upu tauna ina mampomahile hangaꞌKuꞌ.” Eneꞌ miꞌi ngkóráꞌna PUEꞌ to Makuasaꞌ.
12 “Agáiáná niuliꞌ i lalumi, ‘Paintuá popenómbá tiꞌara piꞌi magasaꞌ, onoꞌ miꞌi haneꞌi pandeꞌ to tiꞌara hintotoꞌ peisá tapopenómbá ionoꞌ.’ ” 13 Niuliꞌ, ‘Luleꞌmokeꞌ moánti popenómbá.’ Nipakasusa laluNgkuꞌ. Moántikou binataꞌ to niperampaꞌi, to mokuda hai to mohakiꞌ. Iti riꞌi to nipopenómbá i Kódóꞌ. Peisá paꞌi popenómbámi to noꞌonoꞌ Kutarima? Bateꞌna tiꞌara. 14 Tauna to moákálángiAꞌ ina Kuhuku. Modándiheꞌ ina mampopenómbá binataꞌ laki to maroꞌa i Kódóꞌ, mole binataꞌ to mohakiꞌ riꞌi to rapopenómbá. Kódóꞌ miꞌi PUEꞌ, Datu mahile to rabiláꞌ i humalele duniáꞌ.” Eneꞌ miꞌi ngkóráꞌna PUEꞌ to Makuasaꞌ.