Amosi 8

Pampetudeꞌá to kaꞌiba: Wuaꞌngkau i lalu kárándi

Deꞌe miꞌi to napetudeꞌá Pueꞌ ALA i kódóꞌ. I lalu pampetudeꞌá iti, kuita hambuaꞌ kárándi to bukeꞌ wuaꞌngkau to mangka. 2 Mongkóráꞌ miꞌi Pueꞌ Ala i kódóꞌ, Nauliꞌ, “Amosi, apa to nuita?”

Kuhániki, “Kuita hambuaꞌ kárándi to bukeꞌ hai wuaꞌngkau to mangka, láwiꞌ haweꞌ miꞌi tempóna rapupu.”

Mongkóráꞌ wopiꞌi PUEꞌ i kódóꞌ, Nauliꞌ:

“Haweꞌ miꞌi tempóna

ina Kuhuku taunáNgkuꞌ toSáráeliꞌ,

hai tiꞌarapoheꞌ ina Kuámpungi.

3 I tempó iti, nani-nani kagóeꞌ-góeꞌ i lalu támbi kadatuá,

ina Kupopewaliꞌ petatangi to mewiwiorai.

Iumbá-umbá peá ina ara kandulinga wátámandoꞌraꞌ tauna to mate

to ratibe ngkaniiꞌ-niiꞌ.”

Eneꞌ miꞌi ngkóráꞌna Pueꞌ ALA.

Pepaingáꞌi i tauna to paka moákálángi rángána

4 Nauliꞌ Amosi:

“Ee kómu to mampopeahiahiꞌkou tauna to mapári tueꞌraꞌ

hai mopapateheꞌ topeahiahiꞌ i tampoꞌ deꞌe bona tunaheꞌ.

Nipehádingi maroꞌa laluitangkuꞌ deꞌe:

5 Molaluitakou i lalumi haduduámi, niuliꞌ:

‘Impirá alo mahile wulá to woꞌu ina maliu,

bona peisá wopakeꞌ mampobaluꞌ pare?

Marue gaga alo posusa mahile deꞌe!

Impirá alo penómbáꞌá ina hópóꞌ,

bona peisá wopakeꞌ mampobaluꞌ tinámpu

to tahukáꞌ peá hai beleꞌ to tapakókóiꞌ,

motámbáikeꞌ hólóna,

hai mopakeꞌkeꞌ popetimbá to tiꞌara toꞌu

bona maꞌalaheꞌ tabagiuꞌ.

6 Tinámpu to tiꞌara piꞌi maroꞌa

tapobaluꞌ tapamasuliꞌ.

Mampeliꞌkeꞌ tauna to peahiahiꞌ,

to tiꞌara piꞌi rabuku mobaiari indáraꞌ,

kehapiꞌ indáraꞌ iti hólóna peá hapari sandale.

Hira iti tahólóheꞌ, bona mewaliꞌheꞌ hawiꞌtaꞌ.’

7 PUEꞌ to rapomahile toSáráeliꞌ modándi, Nauliꞌ:

‘Tiꞌara mpuꞌu ina Kukáláliꞌá bábehiáraꞌ to kadake iti.

8 Ánti karahukuraꞌ, tampoꞌ deꞌe ina moenggo-enggo,

álána upu-upu tauna to toroꞌ ionoꞌ

ina meraruaꞌheꞌ láwiꞌ mapári rahádi.

Upu-upu tampoꞌ ina mobálumbá

nodo uwai Nili to kebuꞌu hai mauhu.’ ”

Alo to mewiwiorai

9 Pueꞌ ALA mongkóráꞌ, Nauliꞌ:

“Ina haweꞌ tempóna, tangaꞌna kalialó mpase,

alo ina Kupamatántá.

Mewaliꞌ i tempóna mabaa,

duniáꞌ ina makáindi.

10 Alo posusami ina Kubáliki mewaliꞌ alo kawiora,

hai nani kagóeꞌ-góeꞌ ina Kupopewaliꞌ petatangi.

Ina Kupopewaliꞌkou mopakeꞌ waruꞌ hangko i karuꞌ

hai ina Kupopewaliꞌkou mokáiꞌ weluáꞌmi, tandaꞌ kawiorami.

Ina Kubábehi tempó onoꞌ nodo tempóna tohamboko

moteriahi kamatena ánáꞌraꞌ to haduduána.

Hai kahópóꞌána alo iti ina mewaliꞌ alo to mapári

hai mewiwiorai.”

11 Pueꞌ ALA mongkóráꞌ wopiꞌi, Nauliꞌ:

“Ina haweꞌ tempóna

Kupaꞌara tempó rimi to rumihi i tampoꞌ deꞌe.

Tauna ina marimiheꞌ,

agáiáná tiꞌaraheꞌ ina marimi hai pandeꞌ.

Ina mangkadoꞌuheꞌ,

agáiáná tiꞌaraheꞌ ina mangkadoꞌu hai uwai,

ngkáliꞌna riꞌi ina marimi hai mangkadoꞌuheꞌ

hai ngkóráꞌKuꞌ.

12 Kehapiꞌ mambuliliheꞌ i lalu duniáꞌ mampeliꞌ ngkóráꞌKuꞌ,

agáiáná tiꞌara piꞌi ina ralámbiꞌ.

13 Tempó iti, ánáꞌntawine to malásáꞌ

hai ánáꞌntomoane to maróhó mani,

ina malimpuheꞌ ánti kamangkadoꞌuraꞌ.

14 Tauna to membiáꞌ tulungi i ánitu ina manawoꞌ,

iamoheꞌ tauna to mokabelái hangaꞌna ánitu i tempóraꞌ modándi,

maroꞌa i ánitu Asima to i Samaria,

ánitu to rapenómbái i kótá Daa,

hai ánitu to i kótá Baraseba.

Tauna to mokabelái hangaꞌraꞌ ánitu iti ina manawoꞌheꞌ,

tiꞌarapoheꞌ ina mearó-aró.”