Pampetudeꞌá mokana i pehukuna Pueꞌ Ala
Pampetudeꞌá to kaꞌisáꞌ: Katupeeꞌ
7
Deꞌe miꞌi to napetudeꞌá Pueꞌ ALA i kódóꞌ Amosi: I lalu pampetudeꞌá iti, kuita Pueꞌ ALA mopaꞌara harómbóngá katupeeꞌ. Iti mewaliꞌ i tempóna rumpuꞌ gáláꞌna datu to ina mewaliꞌ pandeꞌna dárána upu miꞌi rahambe, hai rumpuꞌ to woꞌu tueꞌ huleꞌ. 2 Kuita tudaꞌ-tudaꞌ to tueꞌ i tampoꞌ ina upu miꞌi naꞌandeꞌ katupeeꞌ, onoꞌ miꞌi haneꞌi kuꞌuliꞌ:“Ó Pueꞌ ALA, Nuámpungi wohiraꞌá taunáMu.
Noumbá kaꞌina rabukuna toSáráeliꞌa taunáMuheꞌ iti ina mantaha?
Hira tiꞌaraheꞌ handaꞌ hai tiꞌaraheꞌ woꞌo maróhó.”
3 Mewaliꞌ poliwona PUEꞌ ina mohukuheꞌ, Nabáliki miꞌi, Nauliꞌ:
“Apa to nuita iti, tiꞌara ina mewaliꞌ.”
Pampetudeꞌá to kaduá: Api
4 Deꞌe miꞌi to napetudeꞌá Pueꞌ ALA i kódóꞌ. I lalu pampetudeꞌá iti, kuita Pueꞌ ALA timama miꞌi mohukuheꞌ taunáNa hai api. Api iti ina moandeꞌ upu-upu uwai tahiꞌ duuꞌna maꞌáti, hai ina moandeꞌ upu-upu hinoe. 5 Onoꞌ miꞌi haneꞌi kuꞌuliꞌ:
“Ó Pueꞌ ALA, kupembiáꞌ bona ineeꞌ Nupopewaliꞌ tunggáiáMu iti.
Noumbá kaꞌina rabukuna toSáráeliꞌb taunáMuheꞌ iti mantaha?
Tiꞌaraheꞌ handaꞌ hai tiꞌaraheꞌ woꞌo maróhó.”
6 Mewaliꞌ poliwona PUEꞌ ina mohukuheꞌ, Nabáliki miꞌi, Nauliꞌ:
“Apa to nuita iti, tiꞌara ina mewaliꞌ.”
Pampetudeꞌá to katálu: ia miꞌi kariri popebetiꞌ
7 Deꞌe miꞌi to napetudeꞌáꞌaꞌ Pueꞌ Ala i kódóꞌ. I lalu pampetudeꞌá iti, kuita PUEꞌ meángkáꞌ i hintáiꞌna bosoꞌ watu. Ia motibaaꞌ kariri popebetiꞌ to rapantiólóngi, ina moukuruꞌ bosoꞌ watu iti, ba manoroꞌi ba tiꞌara. 8 Mongkóráꞌ miꞌi PUEꞌ i kódóꞌ, Nauliꞌ, “Amosi, apa to nuita?”
Kuhániki, “To kuita, kariri popebetiꞌ.”
Mongkóráꞌ miꞌi Pueꞌ:
“Nupehádingi maroꞌa. Ina Kuꞌulu kariri popebetiꞌ
i tangaꞌ-tangaꞌraꞌ taunáNgkuꞌ, toSáráeliꞌ.
Tongawaꞌ ntepuꞌu, nodoheꞌ bosoꞌ watu to tiꞌara manoroꞌ.
Tiꞌara piꞌi ina Kubáliki poliwoNgkuꞌ, bateꞌna ina Kuhukuheꞌ.
9 Upu-upu penómbáꞌáraꞌ toSáráeliꞌc to ara i katoroꞌá to mapángkáꞌ,
ina Kugero,
hai upu-upu támbi penómbáꞌá to magasaꞌ i tampoꞌ Sáráeliꞌ
ina Kuambaꞌ.
Noꞌonoꞌ woꞌo Datu Ierobea hai pemuleꞌánaheꞌ,
ina Kupatunaheꞌ moliu pombeala.”
Amosi hai Amasia
10 Hangko ionoꞌ, Amasia kapalaꞌ tadulako menómbá toSáráeliꞌ i Beteli, mohuoꞌ tauna lao mopahaweꞌ tewáina i Datu Ierobea, daturaꞌ toSáráeliꞌ, rauliꞌ node: “Pueꞌkuꞌ datu! Amosi moliwo ina moewaꞌ datu i lalu kadatuámu, hai polaluitana to moahui handaꞌ tauna ina mogero kadatuá Sáráeliꞌ deꞌe. 11 Deꞌe miꞌi to nauliꞌ Amosi,
‘Datu Ierobea ina mate i pombealaꞌá,
hai kómu toSáráeliꞌ ina ratawanikou
hai ina raꞌántikou karaoꞌ hangko i tampoꞌmi.’ ”
12 Hangko ionoꞌ, molaluita miꞌi Amasia i Amosi, nauliꞌ, “Mesuleꞌmokoꞌ lao i tampoꞌmu, tampoꞌ Iudá. Laomokoꞌ mopahaweꞌ laluitana Pueꞌ Ala ionoꞌ, bona hira to mampoweꞌikoꞌ pandeꞌmu. 13 Ineeꞌmokoꞌ mopahaweꞌ laluitana Pueꞌ ieneꞌ i Beteli, láwiꞌ Beteli deꞌe ia miꞌi katoroꞌána datu hai kaꞌaraꞌána támbi penómbáꞌá kadatuá to magasaꞌ.”
14 Agáiáná nahániki Amosi, nauliꞌ, “Kódóꞌ deꞌe tiꞌaraꞌaꞌ nabiꞌ, hai tiꞌaraꞌaꞌ woꞌo tepasuaꞌ nabiꞌ-nabiꞌ, ngkáliꞌna riꞌi kódóꞌ deꞌe to mopiaraꞌaꞌ binataꞌ hai mohinoe kau ara. 15 Agáiáná nakióꞌmoꞌ PUEꞌ hangko i bágóꞌkuꞌ mopiaraꞌ binataꞌ, haneꞌi Ia mongkóráꞌ i kódóꞌ, Nauliꞌ node: ‘Laomokoꞌ mopahaweꞌ laluitaNgkuꞌ i toSáráeliꞌ.’
16 Mewaliꞌ deꞌe-deꞌe Amasia, nupehádingi laluitana PUEꞌ i hio:
Nuꞌuliꞌ, ‘Ineeꞌkoꞌ mopahaweꞌ laluita to moewaꞌ toSáráeliꞌ.’d
Láwiꞌ nikóntóaꞌ mopahaweꞌ laluitana Pueꞌ,
17 onoꞌ miꞌi haneꞌi PUEꞌ mongkóráꞌ node:
‘Toinámu ina mewaliꞌ towawine to mampobaluꞌ wátána i lalu kótá,
ánáꞌmu towawine hai tobaleilo ina mateheꞌ i pombealaꞌá.
Tampoꞌmu ina ragáláꞌ-gáláꞌ raweꞌi tauna ntaniꞌ.
Io Amasia, ina matekoꞌ i tampoꞌraꞌ tauna
to tiꞌara moisá Pueꞌ Ala,
hai toSáráeliꞌ ina ratawaniheꞌ
raꞌánti karaoꞌ hangko i tampoꞌraꞌ.’ ”