Tauna to tueꞌ i kamaroꞌa-roꞌa hurewuꞌheꞌ
6
Molaluita wopiꞌi Amosi, nauliꞌ node:“Hurewuꞌmokou tauna to tueꞌ i kamaroꞌa-roꞌa i buluꞌ Sio,
hai kómu to i buluꞌ Samaria to tiꞌara malááꞌ i ewálimi.
Noꞌonoꞌ woꞌo kómu totosae toSáráeliꞌ,
to biásákou rapembiáꞌi tulungi tauna!
2 Laomokou mampeita kótá Kalane,
hai liliukou lao i kótá Hamaꞌ to mahile i tampoꞌ Siria,
haneꞌi laokou woꞌo i kótá Gati i tampoꞌ Pelisitiꞌ.
Niuliꞌ ripaꞌi kadatuáraꞌ maroꞌa mani hangko i kadatuá Iudá hai Sáráeliꞌ,
ba tampoꞌraꞌ maeláꞌ mani hangko i tampoꞌmi?
{Katoꞌuána tiꞌara.}
3 Hurewuꞌmokou to matuꞌa lalumi.
Pehárungámi kaꞌina haweꞌna alo kapári karaoꞌ mani,
mole bábehiámi to kadake iti, mopakawiáꞌ riꞌi kahaweꞌna alo iti.
4 Hurewuꞌmokou to maturu-turu peá
i paturuá to rabungaꞌ-bungaꞌi hai toꞌaeꞌ gajaꞌ to rabóhóꞌ-bóhóꞌ,
hai mehoda-hoda pekou mosusa
mandeꞌ bauꞌ gapiꞌ hai bauꞌ dimbá to maleheꞌ mani hai maruduꞌ.
5 Góeꞌkou mokáráhi nani
nodo to nabábehi Daudiꞌ,
hai ninanika nani iti mopakeꞌkou gambusuꞌ.
6 Mainukou anggoroꞌ hangko i mangku to mahile,
hai mopakeꞌkou wongi-wongi to masuliꞌ,
agáiáná tiꞌara niposusa lalu kaꞌina magerona toSáráeliꞌ.a
7 Mewaliꞌ kómu to mehoda-hoda pekou,
kómu miꞌi to ina ioru-oru raꞌánti lao i potawaniá.
Posusa-susami hai painu-inumi anggoro ina hópóꞌ miꞌi.
8 Pepaingáꞌina Pueꞌ ALA to Makuasaꞌ deꞌe tiꞌara ina Nalewái. Nauliꞌ node:
‘Tiꞌára Kupokagóeꞌ támbi kadatuáraꞌ to meawaꞌ,
hai Kukáhihiꞌ ntepuꞌu kamaꞌángkáꞌraꞌ toSáráeliꞌ.
Onoꞌ miꞌi haneꞌi kótá deꞌe hai tauna to toroꞌ ieneꞌ
ina Kuhuhuꞌheꞌ i ewáliraꞌ.’
9 Ane araheꞌ hampuloꞌ tauna to mentábuni i lalu hambuaꞌ támbi, bateꞌraꞌ ina mate. 10 Ane haweꞌ pinoumána to ina mourusi karatawuraꞌ, ia ina mokióꞌ tauna to mentábuni i taleuꞌ támbi hai mekuneꞌ node: ‘Ba ara maniꞌi tauna to tueꞌ?’
Ina nahániki, ‘Tiꞌara piꞌi ara. Kódóꞌ perái.’
Mewaliꞌ ina nauliꞌ tauna to mokádipurá tomate, ‘Maniiꞌkeꞌ! Tiꞌarakeꞌ peisá mohuwárá hangaꞌna PUEꞌ.’
11 Mewaliꞌ nipehádingi! Ane PUEꞌ mopaꞌara párentá,
upu-upu támbi to mahile hai to kókóiꞌ ina magero.
12 Peisá paꞌi dárá melangka i buluꞌ watu?
Ara paꞌi tauna to peisá mopajekoꞌ i tahiꞌ mopakeꞌ gapiꞌ?
Agáiáná kómu, hintimbá nigoli riꞌi mewaliꞌ rasu to mepapate,
hai to toꞌu nipopewaliꞌ to salaꞌ.
13 Kómu mampepemahilekou láwiꞌ niuliꞌ monangikou kótá Lodeba,b
hai niuliꞌ woꞌo, ‘Ánti kamaróhóntaꞌ haneꞌi kótá Karanaic takuasaꞌi.’
14 PUEꞌ Ala to Makuasaꞌ molaluita node:
‘Ina Kuhuoꞌheꞌ hangko i kadatuá to ntániꞌna
bona moewaꞌkou toSáráeliꞌ.
Ina rapopeahiahiꞌkou i humalele tampoꞌmi,
mantepuꞌu hangko i rárá lao i Hamaꞌ, tándáꞌ i wongko,
haweꞌ-haweꞌ i tahiꞌ Mate i Araba, tándáꞌ i wóiꞌ.’ ”