Petatangi i toSáráeliꞌ
5
Nipehádingi nani petatangi to ina kunánikaꞌákou.2 “ToSáráeliꞌ to rapándiriꞌ nodo ánáꞌntawine,
madámpámoheꞌ i pombeala,
tiꞌarapoheꞌ ina mearó-aró.
I tampoꞌraꞌ haduduáraꞌ, ina rapatódáhihe,
tiꞌara ara to modureiheꞌ meángkáꞌ.”
3 Node ngkóráꞌna Pueꞌ ALA mokana i kómu toSáráeliꞌ:
“Hasábu surudadoꞌ ina lao mombeala
hangko i hambuaꞌ kótá,
hangatu peramoheꞌ to ina mesuleꞌ.
Hangatu surudadoꞌ ina lao mombeala
hangko i kótá ntániꞌna,
hampuloꞌ peramoheꞌ to ina mesuleꞌ.”
Peundeꞌána Pueꞌ bona taunáNaheꞌ mampenosoꞌi bábehiáraꞌ
4 Mongkóráꞌ miꞌi PUEꞌ i toSáráeliꞌ, Nauliꞌ node:
“Mesuleꞌmokou i Kódóꞌ,
bona tiꞌarakou molámbiꞌ pehuku hangko i Kódóꞌ.
5 Ineeꞌmokou lao menómbá i Beteli,
láwiꞌ Beteli ina Kuropuꞌ.
Hai ineeꞌkou woꞌo lao menómbá i Giligá,
láwiꞌ taunána ina ratawaniheꞌ.
Ineeꞌmokou lao menómbá i Baraseba.”
6 Amosi molaluita i toSáráeliꞌ, nauliꞌ node:
“Mesuleꞌmokou i PUEꞌ,
bona tueꞌkou.
Ane tiꞌarakou mesuleꞌ i Hia,
Ia ina haweꞌ nodo api to mendele,
ina moandeꞌkou toSáráeliꞌ.a
I Beteli tiꞌara ara haweꞌ hadua tauna
to ina nabuku mopapate api iti.
7 Hurewuꞌmokou to mobáliki to manótó mewaliꞌ salaꞌ,
hai to maroꞌa nipakadake.
8 Pueꞌ to mampopewaliꞌ betue Mbalunu hai betue Torioloꞌ.b
Ia to mampopewaliꞌ bona mombeháwá-háwá mabaa hai káindi!
Ia to mopárentái uwai tahiꞌ,
bona moloeꞌi tampoꞌ.
PUEꞌ miꞌi to mampopewaliꞌ upu-upuna iti.
9 Ia to mopatuna tauna to maróhó
hai mogero benteraꞌ.
10 Kómu mokáhihiꞌkou tauna
to manótó pobutusiraꞌ kara-kara,c
hai tiꞌarakou moundeꞌ mampehádingi tauna
to mopahaweꞌ apa to toꞌu.
11 Mopamapárikou tauna to i wóiꞌ tueꞌraꞌ,
hai mamperampaꞌikou hanggáláꞌ hangko i pareraꞌ.
Onoꞌ miꞌi haneꞌi, kehapiꞌkou mobábehi támbi to mababe,
agáiáná tiꞌara ina nikatoroꞌi.
Kehapiꞌ mantudaꞌkou anggoroꞌ,
agáiáná tiꞌara ina niꞌinu uwaina,
12 láwiꞌ Kuisá bábehiámi to kadake handaꞌ ntepuꞌu,
hai dósámi tiꞌara peisá raimbaꞌ.
Kómu mopamapárikou tauna to manótó,
motarimakou popesogoꞌ,
hai pobutusimi i tauna to meahiahiꞌ
tiꞌara hintimbá.
13 Ánti bábehiámi to tiꞌara maroꞌa iti,
onoꞌ miꞌi haneꞌi tauna to bukeꞌ pekiri
maniiꞌ-niiꞌ peheꞌ láwiꞌ raisá tempó iti tempó to kadake.
14 Hangaa-ngaa nipári-pári mobábehi apa to maroꞌa
tiꞌara to kadake,
bona tueꞌkou,
láwiꞌ ane nibábehi noꞌonoꞌ,
PUEꞌ Ala to Makuasaꞌ ina mamporángákou
nodo to paka niuliꞌ.
15 Hangaa-ngaa nikáhihiꞌ to kadake,
hai mobábehikou bábehiá to maroꞌa.
Hangaa-ngaa nitibaaꞌ to hintimbá
ane mohoda-hodakou kara-kara.
Babilaꞌ PUEꞌ Ala to Makuasaꞌ
ina mampokaꞌahiꞌ toSáráeliꞌd to mentárá.”
16 Mewaliꞌ ánti dósámi, PUEꞌ Ala to Makuasaꞌ molaluita node:
“I upu-upu rárá i kótá,
ina ara tauna to teriaꞌ hai metatangi
ánti kawioraraꞌ.
Mogaloraheꞌ topohinoe ina rakióꞌheꞌ
bona teriaꞌheꞌ hingkakani hai tauna
to rasaro motatangi tomate.
17 Hai i lalu upu-upu hinoe anggoroꞌ,
tauna ina metatangiheꞌ
láwiꞌ ina haweꞌAꞌ mai mohukuheꞌ.”
Eneꞌ miꞌi ngkóráꞌna PUEꞌ.
Alo kahaweꞌána Pueꞌ
18 Hurewuꞌ ntepuꞌu tauna to mohárungá kaꞌina haweꞌna alona PUEꞌ!
Apa to nihárungá ina mewaliꞌ i alo iti?
Alo iti ina makáindi,
tiꞌara piꞌi mabaa.
19 I alo iti, kómu ina nodokou hadua tauna
to mampelangkaha singá to ina mehakaꞌ,
agáiáná mampohidupaꞌá riꞌi beruá.
Ba ina nodokou hadua tauna to mesuleꞌ i támbina
mempágá i rindi,
mole natilóꞌ riꞌi lelótó.
20 Alona PUEꞌ ina makáindi,
tiꞌara piꞌi mabaa.
Alo iti ina modediꞌ ntepuꞌu,
láwiꞌ PUEꞌ ina mohuku tauna!
Penómbáraꞌ toSáráeliꞌ nakáhihiꞌ Pueꞌ
21 Mongkóráꞌ miꞌi PUEꞌ, Nauliꞌ:
“Kukáhihiꞌ hai tiꞌara Kupokana penómbámi,
tiꞌara woꞌo Kupokana alo-alo mahile ágámámi.
22 Ane moántikou popenómbá to raintu hai popenómbá pare,e
tiꞌara Kutarima.
Mogalo riꞌi binataꞌ to maruduꞌ to mewaliꞌ popenómbá pohintuwuꞌ,
tiꞌara woꞌo Kuꞌundeꞌ.
23 Nipopengkaroo hinángkáꞌ nani-nani petóiá to metuliꞌi.
Tiꞌara Kuꞌundeꞌ mohádi pokániꞌna gambusuꞌmi.
24 Ngkáliꞌna riꞌi hangaa-ngaa nipári-pári oaꞌ
bona pobutusimi hintotoꞌ oaꞌ
nodo uwai to tiꞌara madepuꞌ-depuꞌ poilina,
hai mobábehikou oaꞌ to manótó
nodo katumbuꞌá uwai to moili oaꞌ.
25 Ee toSáráeliꞌ! I tempóNgkuꞌ moteteꞌ toiorumi molumao i pádá loriꞌ iba puloꞌna parena kamaruena, ba Kódóꞌ peá to rapenómbái? Tiꞌara. 26 Ngkáliꞌna riꞌi haweꞌ deꞌe-deꞌe mampenómbáirakou Sakuꞌ, ánitumi to niánti-ánti hai nirekeꞌ datumi. Noꞌonoꞌ woꞌo Kewa ánitu betue, hai watutauna to nibábehi haneꞌi nipenómbái. 27 Onoꞌ miꞌi haneꞌi ina ratawanikou karaoꞌ hangko i Damasiꞌ.”
PUEꞌ Ala to Makuasaꞌ to mongkóráꞌ.