Pekámbaróána Pueꞌ Ala i towawine toSamaria
4
Nipehádingi ngkóráꞌna Pueꞌ Ala:Kómu towawine to toroꞌ i buluꞌ-buluꞌna Samaria,
kamaruduꞌmi nodo gapiꞌ to tueꞌ i Basana
láwiꞌ mampohawiꞌkou tauna to i wóiꞌ tueꞌraꞌ.
Tauna to meahiahiꞌ nitámbái kapeahiahiꞌraꞌ,
hai nihángáꞌá toámámi, niuliꞌ,
“Nipatimama painu to melángui
hai niánti mai bona mainu-inukeꞌ!”
2 Pueꞌ ALA to magasaꞌ modándi node:
“Ina haweꞌ tempóna, kómu towawine toSamaria
ina radiiꞌ soso
nodokou bouꞌ to kana peká.
3 Hadua-haduakou ina ratibe i rawa kótá,
moliu i bosoꞌ watu to raꞌambaꞌ ewálimi,
haneꞌi ina radiiꞌ sosokou lao tándáꞌ i buluꞌ Heremo.”
Eneꞌ miꞌi ngkóráꞌna PUEꞌ.
Popenómbáraꞌ toSáráeliꞌ ia miꞌi popenómbá to kadake
4 Pueꞌ Ala molaluita wopiꞌi i toSáráeliꞌ, Nauliꞌ node:
“Kómu madotakou lao menómbá i penómbáꞌá to ara i Beteli,
mole riꞌi lao pekou mobábehi bábehiá to kadake ionoꞌ.
Hai madotakou woꞌo lao menómbá i penómbáꞌá to ara i Giligá,
mole peundeꞌ-undeꞌámi riꞌi lao mobábehi to kadake ionoꞌ.
Mepulo-pulo, niánti binataꞌ popenómbámi,
hai i alo katálu niánti woꞌo popenómbá hanggáláꞌ hampuloꞌ,
agáiáná kehapiꞌ noꞌonoꞌ, bateꞌmi peá madósá.
5 Niꞌintu popenómbá kagóeꞌ lalu to hangko i rótiꞌ to raꞌragiꞌi,
hai mampeweꞌikou popenómbámi hangko i kabulána lalumi,
láwiꞌ iti miꞌi to niundeꞌ nibábehi, kómu toSáráeliꞌ,
mole riꞌi, madósákou.”
Eneꞌ miꞌi ngkóráꞌna Pueꞌ ALA.
ToSáráeliꞌ tiꞌaraheꞌ mau mesuleꞌ i Pueꞌ Ala
6 “Kódóꞌ miꞌi to mopaꞌara rimi i upu-upu kótámi,
agáiáná kehapiꞌ miꞌi noꞌonoꞌ, kómu tiꞌarakou mau mesuleꞌ i Kódóꞌ.”
Eneꞌ miꞌi ngkóráꞌna PUEꞌ.
7 “Udá Kutaha i tempóna tudaꞌ-tudaꞌmi moparaluu uwai,
i tempóna tálu mani wulána hangko tiꞌara mani mepare,
Kódóꞌ to mampopendáulu udá i kótá to hambuaꞌna,
agáiáná i kótá to ntániꞌna, tiꞌara Kupopendáulu udá.
Hinoe to hamboloꞌna kana udá,
agáiáná to hamboloꞌna tiꞌara, álána bangi.
8 Bahanoumbá wuaꞌna kótá, taunána maleoheꞌ láwiꞌ mangkadoꞌuheꞌ,
onoꞌ miꞌi haneꞌi laoheꞌ mampeliꞌ uwai i kótá to hambuaꞌna,
agáiáná tiꞌara maoha kamangkadoꞌuraꞌ.
Agáiáná kehapiꞌ miꞌi noꞌonoꞌ, tiꞌarakou mau mesuleꞌ i Kódóꞌ.”
Eneꞌ miꞌi ngkóráꞌna PUEꞌ.
9 “Kupaꞌara hakiꞌ i upu-upu to nitudaꞌ.
Hakiꞌ iti mopamalau anggoroꞌ to nitudaꞌ i hinoemi.
Upu-upu kau ara hai kau saitu to nitudaꞌ i hinoemi,
upu naꞌandeꞌ katupeeꞌ.
Agáiáná kehapiꞌ miꞌi noꞌonoꞌ, tiꞌarakou mau mesuleꞌ i Kódóꞌ.”
Eneꞌ miꞌi ngkóráꞌna PUEꞌ.
10 “Kupopesupaꞌ hakiꞌ to humalele i kómu,
nodo to rahampei toMásiriꞌ.
Tauna to maleheꞌ Kupapateheꞌ moliu pombeala,
hai upu-upu dárámi raperampaꞌi.
Kupaꞌara mau tauna to mate i lalu bambaruꞌmi,
to tiꞌara nibuku niáriꞌ.
Agáiáná kehapiꞌ miꞌi noꞌonoꞌ, tiꞌarakou mau mesuleꞌ i Kódóꞌ.”
Eneꞌ miꞌi ngkóráꞌna PUEꞌ.
11 “Hanggááꞌ hangko i kómu ina Kupatunaheꞌ,
nodo kaKupatunaraꞌ toSodomo hai toGumora.
To tueꞌ maniheꞌ hangko i oloꞌmi,
nodoheꞌ támpáꞌ kau to rahore hangko i api.
Agáiáná kehapiꞌ miꞌi noꞌonoꞌ, tiꞌarakou mau mesuleꞌ i Kódóꞌ.”
Eneꞌ miꞌi ngkóráꞌna PUEꞌ.
12 “Onoꞌ miꞌi haneꞌi kómu toSáráeliꞌ,
ina Kuhukukou!
Mewaliꞌ hangaa-ngaa timamakou motarima pehuku
to ina Kupopewaliꞌ i kómu.”
13 Pueꞌ Ala to mopaꞌara wui hai buluꞌ.
Upu-upu tunggáiáNa Napatongawaꞌ i tauna.
Ia to mampopombeháwá mabaa hai káindi.
Ia to mepárentá i humalele duniáꞌ.
PUEꞌ Ala to Makuasaꞌ, Ia miꞌi to mobábehi upu-upuna iti.