Nabiꞌ ia miꞌi to mopahaweꞌ ngkóráꞌna Pueꞌ Ala
3
Kómu toSáráeliꞌ to nateteꞌmokou Pueꞌ Ala mesuwuꞌ hangkoia hangko i tampoꞌ Másiriꞌ, nipehádingi ngkóráꞌna PUEꞌ. Nauliꞌ node:2 “Hangko i upu-upu tauna to i duniáꞌ,
kómu miꞌi tauna to Kuisá hai Kupailalu.
Mewaliꞌ kómu bateꞌmi ina Kuhuku
ánti kahandaꞌna dósámi.”
3 Molaluita wopiꞌi Amosi, nauliꞌ:
“Ara paꞌi tauna to rodua hingkakaniheꞌ molumao,
ane tiꞌaraheꞌ sieruꞌ modándi.
4 Ara paꞌi singá to mengau i kakau,
ane tiꞌara mani molámbiꞌ to ina nahakaꞌ.
Hai ara paꞌi singá to mengau i lalu balamba,
ane tiꞌara mani mohakaꞌ apa-apa to ina naꞌandeꞌ.
5 Peisá paꞌi hambaꞌa tádahi kana tupáꞌ i tampoꞌ,
ane tiꞌara ara heáꞌ to ratáꞌá.
Teahoꞌ paꞌi tupáꞌ
ane tiꞌara ara to mesuaꞌ.
6 Ara paꞌi tauna to i lalu kótá to tiꞌara malááꞌ,
ane mohádiꞌi pokáni tamburuꞌ pombeala.
Ara paꞌi to merampe i lalu kótá,
ane tiꞌára nabábehi PUEꞌ.
7 Katoꞌuána, Pueꞌ ALA tiꞌara ina mobábehi hinángkáꞌna,
ane Ia tiꞌara mani mopahaweꞌ tunggáiáNa i huoꞌáNa, iamoheꞌ nabiꞌ-nabiꞌ.
8 Ane singá mengau,
heáná paꞌi to tiꞌara malááꞌ?
Ane Pueꞌ ALA molaluita,
heáná paꞌi to mampekaniika
hai tiꞌara mopahaweꞌ laluitaNa i tauna.
Kamagerona Samaria
9 Nipahaweꞌ miꞌi deꞌe i upu-upu tauna
to toroꞌ i támbi kadatuá Másiriꞌ,
hai i támbi kadatuá Asado,
nihangáꞌáheꞌ node:
‘Hirámpumokou i buluꞌ-buluꞌ to hungkuꞌ i Samaria,
haneꞌi nipeita kamagewo to rumihi
hai pepopeahiahiꞌ to mewaliꞌ i lalu kadatuá iti.’ ”
10 Nauliꞌ PUEꞌ node:
“Taunaheꞌ iti tiꞌara moisá mobábehi to manótó,
párewá to raperampaꞌi rarámpu i lalu benteraꞌ.”
11 Mewaliꞌ node ngkóráꞌna Pueꞌ ALA mokana i hira,
“Tampoꞌraꞌ ina ratolelingi ewáliraꞌ,
róhóraꞌ ina rawehángi hangko i hira,
hai támbi kadatuáraꞌ ina raperampaꞌi.”
12 Mongkóráꞌ wopiꞌi PUEꞌ, Nauliꞌ node:
“Nodo hadua topoewu to molámbiꞌ perái rombali biti
hai hambali talinga dimbána, pentáráꞌána to naꞌandeꞌ singá,
noꞌonoꞌ woꞌo toSáráeliꞌ to ara i Samaria,
to deꞌe-deꞌe maroꞌanto kaletaꞌraꞌ i paturuá to mawuuꞌ,
tiꞌarapoheꞌ handaꞌ to ina rapelae.”
13 Node ngkóráꞌna Pueꞌ ALA to Makuasaꞌ i tampoꞌ hai langiꞌ:
“Nipailalu upu-upuna deꞌe, hai nupaingáꞌiheꞌ toSáráeliꞌ.a
14 I tempóNgkuꞌ mohuku toSáráeliꞌ,
ánti kamampopengaana miꞌi bábehiáraꞌ to kadake,
ina Kugero upu-upu paintuá popenómbá i Beteli,
álána tánduꞌ-tánduꞌna paintuá iti matepó hai manawoꞌ i tampoꞌ.
15 Mogalo riꞌi támbi to rakatoroꞌi tauna
i tempó lengiꞌ hai i tempó madiiꞌ
ina Kugero.
Noꞌonoꞌ woꞌo támbi to mahile
to rabungaꞌ-bungaꞌi hai toꞌaeꞌ gajaꞌ,
ina Kugero woꞌo.”
Eneꞌ miꞌi ngkóráꞌna PUEꞌ.