Moabiꞌa
2
Mongkóráꞌ wopiꞌi PUEꞌ, nauliꞌ node:“Láwiꞌ mompakani-kanimoheꞌ toMoabiꞌ mobábehi bábehiá to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ mokaeheꞌ popatawuána daturaꞌ toEdo,
hai buꞌuna raꞌala haneꞌi raintu duuꞌna mewaliꞌ awu.
2 Onoꞌ miꞌi haneꞌi tampoꞌ Moabiꞌ bateꞌna ina Kuhunu,
hai bentena kótá Kerio ina upu naꞌandeꞌ api.
ToMoabiꞌ ina mateheꞌ tangaꞌ pogewona pombeala
hai karatawueꞌna tamburuꞌ.
3 Upu-upu tauna to mepárentá to mapángkáꞌ lántiꞌraꞌ i kadatuá Moabiꞌ
ina Kupapateheꞌ.”
Eneꞌ miꞌi ngkóráꞌna PUEꞌ.
Iudá
4 Mongkóráꞌ wopiꞌi PUEꞌ, nauliꞌ node:
“Láwiꞌ mompakani-kanimoheꞌ toIudá mobábehi to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ hira iti moliungiheꞌ hawaꞌKuꞌ,
hai tiꞌaraheꞌ mouláꞌ paturoꞌKuꞌ,
agáiáná rapakanawoꞌ peheꞌ ánitu-ánitu
to rapenómbái toioruraꞌ.
5 Onoꞌ miꞌi haneꞌi ina Kupaꞌara api i tampoꞌ Iudá,
álána bente i kótá Ierusale ina upu naꞌandeꞌ api.”
Pehukuna Pueꞌ i toSáráeliꞌ
6 Mongkóráꞌ wopiꞌi PUEꞌ, Nauliꞌ node:
“Láwiꞌ mompakani-kanimoheꞌ toSáráeliꞌ mobábehi to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ mampobaluꞌheꞌ tauna to tiꞌara masalaꞌ,
bona molámbiꞌ peheꞌ dóiꞌ.
Topeahiahiꞌ iti, tiꞌara rabuku mobaiari indáraꞌ
kehapiꞌ indáraꞌ iti hólóna peá hapari sandale.
7 Mopamapáriheꞌ tauna to i wóiꞌ tueꞌraꞌ,
hai tiꞌaraheꞌ mampehaileki tauna to peahiahiꞌ.
To ntaliuma laoheꞌ mobábehi bábehiá to metitidiꞌi i hadua ánáꞌntawine,
álána bábehiáraꞌ iti mopakadake hangaꞌKuꞌ to magasaꞌ.
8 Tauna laoheꞌ maturu i hintáiꞌna paintuá popenómbá,
mampohaluꞌheꞌ waruꞌ to raꞌala hangko i tauna to poindá i hira,b
hai i Támbina Pueꞌ Ala, mainuheꞌ anggoroꞌ
to raꞌala hangko i tauna to ragiwuꞌ.
9 Mole riꞌi, Kódóꞌ miꞌi to moropuꞌheꞌ toAmori hangkoia,
bona nikatoroꞌi tampoꞌraꞌ.
Kehapiꞌ toAmori iti mapángkáꞌ hai maróhóheꞌ
nodo kau to mapángkáꞌ ntepuꞌu,c
Kupatunaheꞌ mantepuꞌu hangko i daturaꞌ
duuꞌna haweꞌ i taunána to i wóiꞌ tueꞌraꞌ.d
10 Kódóꞌ miꞌi to moántikou
mesuwuꞌ hangko i tampoꞌ Másiriꞌ.
Hai Kódóꞌ miꞌi woꞌo to moteteꞌkou molumao i pádá loriꞌ
i lalu iba puloꞌna parena kamaruena.
Hai tampoꞌraꞌ toAmori Kuweꞌimokou mewaliꞌ tampoꞌmi.
11 Hangko i oloꞌraꞌ ánáꞌmi,
aramoheꞌ to Kupileꞌi mewaliꞌ nabiꞌ,
hai bahangapaheꞌ hangko i ánáꞌmi to maleheꞌ mani
modándimoheꞌ i Kódóꞌ mewaliꞌ Nasire
Ee toSáráeliꞌ! Tiꞌara paꞌi toꞌu upu-upuna iti?”
Eneꞌ miꞌi ngkóráꞌna PUEꞌ.
12 “Agáiáná tauna to mewaliꞌheꞌ Nasir
nipasimbukuheꞌ moliungi dándiraꞌ i Pueꞌ Ala
áláraꞌ mainu anggoroꞌ,
hai nabiꞌ tiꞌaraheꞌ nipaliu mopahaweꞌ laluitaNgkuꞌ.
13 Mewaliꞌ nipehádingi.
Deꞌe-deꞌe ina Kuhukukou upu-upu,
duuꞌmi meraruaꞌ
nodo pokeiꞌ-keiꞌna gorobaꞌ to moánti to matimi.
14 I alo iti, kehapiꞌ tauna to makehiꞌ,
tiꞌara ina rabuku mengkatueꞌ.
Tauna to maróhó,
tiꞌara ina mobunduꞌ kamaróhóraꞌ,
hai tauna to keate mombeala,
tiꞌara ina mobunduꞌ kakeateraꞌ.
15 To motibaaꞌ panaꞌ,
tiꞌara ina rabuku mantaha.
Tauna to magásiꞌ melangka,
tiꞌara ina mobunduꞌ kamagásiꞌraꞌ.
Topodárá,
tiꞌara ina rabuku mengkatueꞌ.
16 I alo iti, surudadoꞌ to pebáiꞌ hangko i oloꞌraꞌ to keate,
ina melangkaheꞌ mopálehi párewáraꞌ mombeala.”
Eneꞌ miꞌi ngkóráꞌna PUEꞌ.