Amosi
Nabiꞌ hangko i Tekoa
1
Amosi ia miꞌi hadua tauna hangko i Tekoa to mopiaraꞌ dimbá. Ia mewaliꞌ nabiꞌ i tempóna Datu Usia mepárentá i tampoꞌ Iudá, hai Datu Ierobea ánáꞌna Ioasi mepárentá i tampoꞌ Sáráeliꞌ. Rompare hangko tiꞌara mani mewaliꞌ linu to rumihi,a Pueꞌ Ala mopahaweꞌ laluitaNa i Amosi.2 Nauliꞌ Amosi:
“PUEꞌ molaluita Napasimbuku hangko i buluꞌ Sio,
hai hangko i Ierusale mampopahádi wambaꞌNa nodo pengauna singá.
Upu-upu pádá poewuá mewaliꞌ bangi,
hai rumpuꞌ to tueꞌ i tutuꞌ buluꞌ Karame mewaliꞌ malau.”b
Pehukuna Pueꞌ Ala i tauna to toroꞌ hungkuꞌ i tampoꞌ Sáráeliꞌ
Damasiꞌ (i tampoꞌ Siria)
3 Mongkóráꞌ miꞌi PUEꞌ, Nauliꞌ node:
“Láwiꞌ mompakani-kanimoheꞌ toDamasiꞌ mobábehi bábehiá to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ melumbuꞌ ntepuꞌu kamampopeahiahiꞌraꞌ toGileaꞌ.
Rapapateheꞌ nodo pare to rarupuꞌ hai besiꞌ.c
4 Onoꞌ miꞌi haneꞌi ina Kuhunu bente katoroꞌána Datu Benhada,
ia miꞌi sosorana hangko i umána, ia miꞌi Datu Hasae.d
5 Upu-upu babaꞌá bente kótá Damasiꞌ ina Kupamarugiꞌ,
hai upu-upu tauna to ara i Bikea-Awe, ina Kupatunaheꞌ.
Noꞌonoꞌ woꞌo to ina Kubábehi i upu-upu topopárentá i Bei-Eden,
hai toSiria ina rahakaꞌ hai ratawaniheꞌ,
raꞌánti lao i tampoꞌ Kie.”
Eneꞌ miꞌi ngkóráꞌna PUEꞌ.
Gasa (i tampoꞌ Pelisitiꞌ)e
6 Mongkóráꞌ wopiꞌi PUEꞌ, Nauliꞌ node:
“Láwiꞌ mompakani-kanimoheꞌ toGasa mobábehi bábehiá to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ mohakaꞌmoheꞌ handaꞌ tauna,
haneꞌi ratawaniheꞌ hai rapobaluꞌheꞌ i toEdo
bona rapopewaliꞌheꞌ hawiꞌ.
7 Onoꞌ miꞌi haneꞌi ina Kupaꞌara api i lalu bosoꞌ watu to motolelingi kótá Gasa,
álána bentena upu naꞌandeꞌ api.
8 Ina Kuropuꞌ upu-upu tauna to i kótá Asado,
onoꞌ woꞌo to ina Kubábehi i topopárentá i kótá Asakelo.
Ina Kuhukuheꞌ toEkero,
hai ina Kupatunaheꞌ upu-upu toPelisitiꞌ to mentárá.”
Eneꞌ miꞌi ngkóráꞌna Pueꞌ ALA.
Tiru (i tampoꞌ Penisia)
9 Mongkóráꞌ wopiꞌi PUEꞌ, Nauliꞌ node:
“Láwiꞌ mompakani-kanimoheꞌ toTiru mobábehi bábehiá to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ molingkaꞌimoheꞌ dándi pohalaluraꞌ:
motawaniheꞌ handaꞌ tauna,
haneꞌi rapobaluꞌheꞌ i toEdo bona rapopewaliꞌheꞌ hawiꞌ.
10 Onoꞌ miꞌi haneꞌi ina Kupaꞌara api i lalu bosoꞌ watu i kótá Tiru,
álána bentena ina upu naꞌandeꞌ api.”
Edo
11 Mongkóráꞌ wopiꞌi PUEꞌ, Nauliꞌ node:
“Láwiꞌ mompakani-kanimoheꞌ toEdof mobábehi bábehiá to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ tiꞌara ara kamaꞌahiꞌraꞌ:
mampombealaꞌáheꞌ toSáráeliꞌ, mole topohalaluheꞌ.
Mabukoꞌ ntepuꞌuheꞌ hai mepailaluheꞌ oaꞌ.
12 Onoꞌ miꞌi haneꞌi ina Kupaꞌara api i kótá Temana,
hai bente i kótá Bosara woꞌo ina upu naꞌandeꞌ api.”
Amoni
13 Mongkóráꞌ wopiꞌi PUEꞌ, Nauliꞌ node:
“Láwiꞌ mompakani-kanimoheꞌ toAmonig mobábehi bábehiá to kadake,
tiꞌara piꞌi Kubáliki poliwoNgkuꞌ ina mohukuheꞌ,
láwiꞌ i tempóraꞌ mombeala bona mopakaeláꞌheꞌ tampoꞌraꞌ,
mobáláꞌheꞌ taꞌiraꞌ towawine toGileaꞌ to tangaꞌraꞌ káláꞌeá.
14 Onoꞌ miꞌi haneꞌi ina Kupaꞌara api i bosoꞌ watu kótá Raba,
álána bentena ina upu naꞌandeꞌ api.
Tempó onoꞌ ina tehádi kamagewo ánti pombeala,
hai pombeala iti ina rumihi ntepuꞌu nodo karumihina angi.
15 Datu to mopárentáheꞌ ina ratawani
hingkakani hai tauna to mapángkáꞌ lántiꞌraꞌ i lalu kadatuá iti.”
Eneꞌ miꞌi ngkóráꞌna PUEꞌ.