Pampetudeꞌá to kalima: Pueꞌ meángkáꞌ i hintáiꞌna paintuá popenómbá
9
Hangko ionoꞌ, moitaꞌaꞌ PUEꞌ meángkáꞌ i hintáiꞌna paintuá popenómbá hai mongkóráꞌ:“Nubóbáꞌ miꞌi nupasimbuku wuntu áriꞌi támbiNgkuꞌ deꞌe,
bona moduá mantepuꞌu hangko i wongko
haweꞌ-haweꞌ i wóiꞌ.
Nuambaꞌ upu-upu áriꞌina
bona modumpingi upu-upu tauna.
Heáná tauna to tiꞌara mate nadumpingi áriꞌi,
ina Kupapate moliu pombeala.
Tiꞌara ara haweꞌ hadua hangko i hira
to ina nabuku melangka lao mengkatueꞌ.
2 Kehapiꞌheꞌ mokaeꞌ tampoꞌ bona laoheꞌ i duniáꞌ tauna to mate,
bateꞌ-bateꞌraꞌ ina Kudiiꞌ hangko ionoꞌ.
Kehapiꞌheꞌ mengkaheꞌ haweꞌ i langiꞌ,
bateꞌ-bateꞌraꞌ ina Kupopendáuluheꞌ hangko indoreá.
3 Kehapiꞌheꞌ lao mentábuni i tutuꞌ buluꞌ Karame,a
bateꞌ-bateꞌraꞌ ina Kupeliꞌ bona Kuhakaꞌheꞌ.
Kehapiꞌheꞌ lao mentábuni i pohiꞌ tahiꞌ,
bateꞌ-bateꞌna ina Kuhuoꞌ naga tahiꞌb bona laoheꞌ motilóꞌ.
4 Kehapiꞌheꞌ raeri nodo binataꞌ hai ratuntungi ewáliraꞌ,
haneꞌiheꞌ ratawani i tampoꞌ to karaoꞌ,
bateꞌ-bateꞌna ina Kupepárentái
bona rapapateheꞌ ionoꞌ hai pihoꞌ.
TunggáiáNgkuꞌ maróhó miꞌi:
hira ina Kupatunaheꞌ
hai tiꞌarapoheꞌ ina Kutulungi.”
5 Pueꞌ ALA to Makuasaꞌ motóbóꞌ peá duniáꞌ,
álána upu-upu tampoꞌ moenggo,
hai upu-upu tampoꞌ mobálumbá
nodo uwai Nili i tampoꞌ Másiriꞌ to kebuꞌu hai mauhu.
Onoꞌ miꞌi haneꞌi upu-upu tauna metatangi.
6 PUEꞌ moaró támbiNa i wongko langiꞌ,
hai mowáláhi langiꞌ i wongko duniáꞌ
bona mobóungángi tampoꞌ.
Ia mopárentái uwai tahiꞌ
bona moloeꞌi tampoꞌ.
To mobábehi upu-upuna iti, hangaꞌna PUEꞌ.
Pueꞌ Ala tiꞌara mampokana toSáráeliꞌ
7 Mongkóráꞌ miꞌi PUEꞌ i toSáráeliꞌ, Nauliꞌ:
“Ee toSáráeliꞌ! Ba nipekiri kamaꞌahiꞌKuꞌ i kómu
melumbuꞌ hangko i toEtiopia?
{Tiꞌara. Tiꞌarakou Kupopontaniꞌ.}
Hangkoia kómu toSáráeliꞌ,
Kuteteꞌkou mesuwuꞌ hangko i tampoꞌ Másiriꞌ.
Hai iti woꞌo to Kubábehi i ewálimi toPelisitiꞌ,
Kuꞌántiheꞌ mesuwuꞌ hangko i tampoꞌ Kereta,c
hai toSiria hangko i tampoꞌ Kie.
8 Bona niꞌisá, Kuita miꞌi hinángkáꞌ dósá
to nibábehi i lalu kadatuámi,
onoꞌ miꞌi haneꞌi ina Kupatunakou
hangko i wongko duniáꞌ deꞌe.
Agáiáná kómu toSáráeliꞌ,d
tiꞌarakou ina Kupatuna upu-upu.”
Eneꞌ miꞌi ngkóráꞌna PUEꞌ.
9 “Nipehádingi maroꞌa. Ina Kupaꞌara hawaꞌ
bona kómu toSáráeliꞌ rahawukakou
i oloꞌraꞌ tauna i humalele duniáꞌ.
Nodo tauna to motápiꞌi pare
bona mampopontaniꞌ to mobunduꞌ hai tiꞌara mobunduꞌ,
noꞌonoꞌ woꞌo ina Kupopontaniꞌkou
bona tauna to kadake ratibe.
10 Upu-upu to madósá i oloꞌraꞌ taunáNgkuꞌ manguliꞌ:
‘Tiꞌarakeꞌ ina napatodáhi Pueꞌ Ala narampe kapári.’
Mole riꞌi, tauna itimoheꞌ to ina mate i pombealaꞌá.”
Kadatuá Sáráeliꞌ ina raꞌáro huleꞌ
11 Nauliꞌ Pueꞌ:
“Ina haweꞌ tempóna, kadatuána Daudiꞌ ina Kuáro huleꞌ.
Deꞌe-deꞌe kadatuá iti nodo bambaruꞌ to madungká.
Agáiáná upu-upu rindi to maꞌambaꞌ ina Kupakaroꞌa,
hai upu-upu to magero ina Kuaró huleꞌ,
bona mewaliꞌ maróhó nodo hangkoia.
12 Upu-upuna iti ina Kubábehi
bona toSáráeliꞌ mokuasaꞌiheꞌ huleꞌ tampoꞌ Edo to ara mani,
hai upu-upu tampoꞌ to Kupárentá hangkoia
ina mewaliꞌ wopiꞌi gáláꞌKuꞌ.”e
Eneꞌ miꞌi ngkóráꞌna PUEꞌ, hai Ia to ina mampopewaliꞌ upu-upuna iti.
13 Mongkóráꞌ wopiꞌi PUEꞌ, Nauliꞌ node:
“Nipehádingi. Ina haweꞌ tempóna pare kawiáꞌ katueꞌna,
haneꞌi tempó mepare tiꞌara ina madepuꞌ-depuꞌ.
Hai anggoroꞌ ina maruduꞌ ntepuꞌu,
haneꞌi tauna tiꞌara ina mengkakaroo mopieꞌ anggoroꞌ,
álána handaꞌ ntepuꞌu uwai anggoroꞌ
ina moili hangko i buluꞌna.
14 Ina Kupakaroꞌa huleꞌ katueꞌraꞌ taunáNgkuꞌ toSáráeliꞌ.
Upu-upu kótá to magero ina raꞌaró huleꞌ
hai ina rakatoroꞌi.
Hinoe anggoroꞌ ina ratudaꞌi huleꞌ
hai uwaina rainu.
Ina mohinoeheꞌ huleꞌ
hai wuaꞌna ina raꞌandeꞌ.
15 Ina Kupatoroꞌheꞌ taunáNgkuꞌ i tampoꞌ to Kuweꞌimoheꞌ hangkoia,f
hai tiꞌarapoheꞌ ina Kupopesuwuꞌ hangko i tampoꞌ iti.”
Eneꞌ miꞌi ngkóráꞌna PUEꞌ Ala to nipenómbái.