Ukiꞌ i rindi
5
Hangkani tempó,
Datu Belesasa mokióꞌmoheꞌ hasábu tauna to mapángkáꞌ lántiꞌraꞌ bona mouláꞌheꞌ posusa mahile.
I lalu posusa iti,
ia mainu anggoroꞌ hingkakani hai torarena.
2 Hangkoia,
Datu Nebukanesa,
ia miꞌi pueꞌna Datu Belesasa,a
mamperampaꞌi párewá hangko i Támbina Pueꞌ Ala i Ierusale,
naꞌánti lao i kótá Bábeli.
Párewá iti rabábehi hangko i buláwá hai peráꞌ,
tepasuaꞌ woꞌo mangku-mangku.
Tempóna Datu Belesasa mantepuꞌu miꞌi malangu i posusa iti,
ia mohuoꞌmoheꞌ topobágóꞌna bona moalaheꞌ mangku-mangku iti,
bona rapakeꞌ upu-upu tauna to mapángkáꞌ lántiꞌraꞌ,
upu-upu toináraꞌ,
hai upu-upu towawine to rapiaraꞌ,
ina mainuheꞌ hangko i mangku onoꞌ.
3 Raꞌánti mpuꞌu miꞌi upu-upu mangku iti lao i hia,
haneꞌi rapainui.
4 Tangaꞌraꞌ mainu,
motóiáheꞌ ánituraꞌ to rabábehi hangko i buláwá,
peráꞌ,
tambaga,
besiꞌ,
kau hai watu.
5 Tempó onoꞌ,
iaperái hangkaꞌ ara tae to moukiꞌ i rindi támbi kadatuá i kamahingkaaꞌána láwiꞌ nahimbaꞌi huluꞌ,
onoꞌ miꞌi haneꞌi tongawaꞌ ntepuꞌu kanaitána datu tae to moukiꞌ iti.
6 Lindoꞌna datu mewaliꞌ mabádáꞌ,
hai masusa laluna.
Bitina mewaliꞌ maledeꞌ,
hai kuntuꞌna moridiꞌ ánti kamalááꞌna.
7 Onoꞌ miꞌi haneꞌi ia molaluita napasimbuku bona upu-upu tauna to handaꞌ pangisáraꞌ,
topebao hai upu-upu tauna to moisá mampeita betue,
raꞌánti lao i hia.
I kahaweꞌraꞌ peá,
molaluita miꞌi datu,
nauliꞌ,
“Heáná peá to moisá mobásá ukiꞌ iti hai mopahaweꞌ lempóna,
ina kuweꞌi kumbá kadatuá to makámumu,b
hai awóló rante to hangko i buláwá,
tandaꞌ pebiláꞌkuꞌ i hia.
Hai ina kuángkáꞌ mewaliꞌ tauna to katálu mepárentá hangko i datu.”
8 Mewaliꞌ lao mpuꞌumoheꞌ hadua-hadua mampehukáꞌ mobásá ukiꞌ iti,
agáiáná tiꞌara ara haweꞌ hadua to peisá mobásá ba molempónga.
9 Hangko ionoꞌ,
masusa ntepuꞌu miꞌi laluna Datu Belesasa,
haneꞌi mantámbái kamabádáꞌna lindoꞌna.
Mogalo riꞌi topobágóꞌnaheꞌ to mapángkáꞌ lántiꞌraꞌ,
malááꞌmoheꞌ woꞌo.
10 Ánti kamasimbukuna polaluitana datu hai upu-upu tauna to mapángkáꞌ lántiꞌraꞌ,
mesuaꞌ miꞌi inána datu i lintuꞌ posusaꞌá,
haneꞌi molaluita,
nauliꞌ,
“Ee datu,
hampóáꞌworia maroꞌa tueꞌmu haweꞌ i rue-ruena!
Nupatinda miꞌi lalumu,
hai ineeꞌkoꞌ malááꞌ haneꞌi mabádáꞌ lindoꞌmu.
11 I lalu kadatuá deꞌe,
ara hadua tauna to naporángá oaꞌ kuasaꞌ to magasaꞌ!
I tempóna pueꞌmu mepárentá hangkoia,
tauna iti tongawaꞌ ntepuꞌu kamanótóna laluna hai kamapándena nodo kamapánderaꞌ ánitu.
Datu Nebukanesa pueꞌmu,
moángkáꞌ tauna iti mewaliꞌ tadulakoraꞌ upu-upu tauna to handaꞌ pangisáraꞌ,
topebao,
hai tauna to moisá mampeita betue.
12 Tauna iti mapánde ntepuꞌu hai bukeꞌ pekiri.
Ia mapánde woꞌo molempónga paturu,
mowungkeꞌ upu-upu to tewuniángi,
hai naisá mopakanótó lempóna apa to maꞌángkárá rapekiri.
Hangaꞌna tauna iti Danieli,
agáiáná pueꞌmu hangkoia mobáliki hangaꞌna mewaliꞌ Beletasaꞌ.
Maroꞌa ane nukióꞌ mai Danieli.
Ia ina mopakanótó i datu apa lempóna ukiꞌ iti.”
13 Mewaliꞌ hawiáꞌ mpuꞌu miꞌi Danieli raꞌánti lao mampombelindoꞌá datu.
Mekuneꞌ miꞌi datu i Danieli,
nauliꞌ,
“Io miꞌi paꞌi to rahangaꞌ Danieli,
hadua to ratawani to naꞌánti mai Datu Nebukanesa pueꞌkuꞌ hangko i tampoꞌ Iudá.
14 Kuhádi miꞌi daritakáná mokana i hio.
Io naporángákoꞌ oaꞌ inaoraꞌ ánitu,
hai io hadua tauna to mapánde ntepuꞌu,
bukeꞌ timbá,
hai kaladu pekirimu.
15 Upu-upu tauna to handaꞌ pangisáraꞌ hai topebao,
kukióꞌmoheꞌ bona mobásáheꞌ ukiꞌ deꞌe hai mohángáꞌáꞌáꞌaꞌ lempóna ukiꞌ iti,
agáiáná tiꞌara ara to moisá.
16 Agáiáná kuhádi miꞌi mokana i hio.
Nubuku mopatongawaꞌ upu-upu to tewuniángi,
hai nuisá mopakanótó lempóna apa to maꞌángkárá rapekiri.
Mewaliꞌ,
ane nubuku mobásá ukiꞌ iti,
hai nuhángáꞌáꞌáꞌaꞌ woꞌo lempóna,
ina kuweꞌikoꞌ badu kadatuá to rabábehi hangko i báná to makámumu,
hai awóló rante to hangko i buláwá,
hai ina kuángkáꞌkoꞌ mewaliꞌ topopárentá to katálu hangko i kódóꞌ.”
17 Nauliꞌ Danieli,
“Ee pueꞌkuꞌ datu,
maroꞌa miꞌi parasee to ina nuweꞌiaꞌ,
nuweꞌimoheꞌ tauna to ntániꞌna,
hai kehapiꞌ noꞌonoꞌ,
bateꞌna ina kubásá ukiꞌ iti hai ina kuhángáꞌáꞌákoꞌ lempóna.
18 Datu,
Pueꞌ Ala to i Surugáꞌ mampoweꞌi miꞌi Datu Nebukanesa pueꞌmu,
kamakuasaꞌ,
pebiláꞌ hai kapeawaꞌ.
19 Ánti kamahilena kuasaꞌna to naweꞌi Pueꞌ Ala i hia,
onoꞌ miꞌi haneꞌi upu-upu tauna i duniáꞌ hai upu-upu pueꞌ básá moridiꞌ ánti kamalááꞌraꞌ i hia.
Ane naundeꞌ mampehuóꞌa tauna bona rapapate,
bateꞌna rapapate.
Ane naundeꞌ bona tauna rapatodáhi tueꞌ,
bateꞌna rapatodáhi.
Ia moángkáꞌ hai mampopendáulu heáná peá tauna to mobágóꞌ i lalu kadatuána mouláꞌ peundeꞌána.
20 Agáiáná i tempóna mewaliꞌ maꞌángkáꞌ,
hai matuꞌa laluna álána masodo ntepuꞌu,
ia rapopendáulu hangko i lántiꞌna,
hai kapeawaꞌna raꞌala.
21 Ia rawura hangko i oloꞌraꞌ tauna,
hai pekirina mewaliꞌ hibali hai pekiri binataꞌ.
Ia tueꞌ hingkakani hai kalide to maila.
Pandeꞌna rumpuꞌ hibali hai gapiꞌ,
hai wátána naloeꞌi namu to hangko i langiꞌ.
Upu-upuna iti mewaliꞌ duuꞌna ia mopangákuꞌ Pueꞌ Ala to i Surugáꞌ to makuasaꞌ i kadatuá tauna,
hai Ia peisá moángkáꞌ heáná peá tauna to Napileꞌi mewaliꞌ datu.
22 Upu-upu to mewaliꞌ i pueꞌmu,
nuisánto,
láwiꞌ io ueꞌnakoꞌ.
Agáiáná kehapiꞌ noꞌonoꞌ,
tiꞌara nuꞌundeꞌ mengkaiwóiꞌ.
23 Datu,
maꞌángkáꞌmokoꞌ i lindoꞌna Pueꞌ To Makuasaꞌ i surugáꞌ.
Mangku-mangku to rapakeꞌ i Támbina Pueꞌ Ala,
nupopeánti mai i hio,
haneꞌi datu hai upu-upu tauna to mapángkáꞌ lántiꞌraꞌ i kadatuá deꞌe,
hai upu-upu toináraꞌ hai towawine to rapiaraꞌ,
mainukou i mangku iti.
Hai motóiákoꞌ ánitu to rabábehi peá hangko i peráꞌ,
buláwá,
tambaga,
besiꞌ,
kau hai watu.
Ánitu iti tiꞌaraheꞌ peisá meita,
tiꞌaraheꞌ peisá mehádi,
hai tiꞌaraheꞌ woꞌo moisá apa-apa.
Agáiáná Pueꞌ Ala to motibaaꞌ peinaomu hai mopakanótó rárá katueꞌmu,
tiꞌara nubiláꞌ.
24 Onoꞌ miꞌi haneꞌi Pueꞌ Ala mopakanótó bona niꞌita tae iti to moukiꞌ apa to Napahaweꞌ.
25 Ukiꞌ iti ia miꞌi:
‘MENE,
MENE,
TEKEL,
UFARSIN,’
ba:
‘Raimbaꞌ,
raimbaꞌ,
ratimbá,
ragáláꞌ.’
26 Hai deꞌe miꞌi lempóna:
MENE lempóna raimbaꞌ,
láwiꞌ kamaruena popárentána datu naimbaꞌ miꞌi Pueꞌ Ala hai upu miꞌi tempóna.
27 TEKEL lempóna ratimbá,
láwiꞌ bábehiána datu ratimbá miꞌi mopakeꞌ popetimbá,
hai tongawaꞌ ara mani kamakuraꞌmu.
28 FARSIN lempóna ragáláꞌ,
láwiꞌ kadatuána datu ragáláꞌ miꞌi mewaliꞌ ronggáláꞌ hai raweꞌimoheꞌ toMedia hai toPeresia.”c
29 Mewaliꞌ hawiáꞌ miꞌi Datu Belesasa mopárentái topobágóꞌna bona mobadui Danieli hai kumbá to malóe to rabábehi hangko i báná to makámumu,
hai raꞌáwólói rante buláwá.
Hai napahaweꞌ miꞌi datu i tauna to handaꞌ kamoángkáꞌna miꞌi Danieli mewaliꞌ tauna to katálu mepárentá hangko i datu.
30 Káindi iti woꞌo Datu Belesasa to mepárentá i Bábeli rapapate.d