Paturuna Datu Nebukanesa to karongkánina
4
Deꞌe miꞌi pampopaisá hangko i Datu Nebukanesa to napahaweꞌ i tauna to ara i upu-upu roboꞌ,
hai upu-upu básá i humalele duniáꞌ:
Tabeá hai roꞌa ngkatueꞌ haweꞌ i kómu upu-upu.
2 Deꞌe-deꞌe kuꞌundeꞌ ina mampodarita tandaꞌ kuasaꞌ hai tandaꞌ-tandaꞌ to metingkáráki to nabábehi Pueꞌ Ala to i Surugáꞌ i kódóꞌ.
3 Metingkáráki ntepuꞌu tandaꞌ-tandaꞌ to Nabábehi,
hai mehelei ntepuꞌu tandaꞌ kuasaꞌ to Nabábehi!
KadatuáNa ia miꞌi kadatuá to tiꞌara mokahópóꞌá,
hai popárentáNa ina ara oaꞌ haweꞌ i rue-ruena!
4 Kódóꞌ Datu Nebukanesa,
toroꞌaꞌ i támbingkuꞌ i katinda lalu,
hai tueꞌaꞌ i lalu kagóeꞌ-góeꞌ.
5 Agáiáná hangkani tempó tangaꞌkuꞌ letaꞌ i paturuángkuꞌ,
mampaturuáꞌaꞌ hai molámbiꞌaꞌ pampetudeꞌá to melááꞌ-lááꞌi.
6 Hangko ionoꞌ,
kupehawaꞌá bona upu-upu tauna to handaꞌ pangisáraꞌ to ara i Bábeli raꞌántiheꞌ mai i kódóꞌ,
bona rapakanótóáꞌaꞌ lempóna paturungkuꞌ.
7 Hangko ionoꞌ,
upu-upu tauna to handaꞌ pangisáraꞌ,
topebao,
hai to moisá mampeita betue,
maiheꞌ i kódóꞌ,
haneꞌi kupodarita i hira paturungkuꞌ iti,
agáiáná tiꞌara rabuku molempónga paturungkuꞌ iti.
8 Kahópóꞌána,
Danieli to rahangaꞌ woꞌo Beletasaꞌ mouláꞌ hangaꞌ ánitungkuꞌ,
mai i kódóꞌ.
Ia nateteꞌ kuasaꞌ to magasaꞌ,
mewaliꞌ kupodarita mpuꞌu miꞌi paturungkuꞌ i hia.
9 Kuꞌuliꞌ node:
“Ee Beletasaꞌ,
tadulako tauna to handaꞌ pangisáraꞌ!
Kuisá io nateteꞌkoꞌ kuasaꞌ to magasaꞌ,
onoꞌ miꞌi haneꞌi upu-upu to tewuniángi tiꞌara nupomapári mopatongawaꞌ!
Mewaliꞌ ina kupolaluita i hio apa to kuita i lalu paturungkuꞌ,
hai nuhángáꞌáꞌáꞌaꞌ lempóna.
10 Tangaꞌkuꞌ letaꞌ,
mampaturuáꞌaꞌ node:
kuita i tangaꞌ-tangaꞌ duniáꞌ,
tueꞌ hampóꞌá kau to mapángkáꞌ ntepuꞌu.
11 Kau iti kamahile-hileá hai maróhó.
Kamapángkáꞌna haweꞌ i langiꞌ,
hai upu-upu tauna i duniáꞌ moita kau iti.
12 Taweꞌna mababe,
wuaꞌna handaꞌ hai peisá raꞌandeꞌ.
Kau iti rapebóungái upu-upu binataꞌ to ara i pádá,
hai dáꞌá-dáꞌána rapohárái tádáhi,
hai upu-upu to tueꞌ i duniáꞌ mandeꞌ wuaꞌna.
13 I lalu paturungkuꞌ iti,
kuita hadua malaꞌeka to mekámpái mendáulu mai hangko i surugáꞌ.
14 Ia molaluita napasimbuku,
nauliꞌ,
‘Tiwi kau iti!
Upu-upu dáꞌána nitátáꞌ.
Niránáꞌ upu-upu taweꞌna,
hai nihawuka wuaꞌna.
Upu-upu binataꞌ to mebóungá i wóiꞌna,
niwuraheꞌ,
noꞌonoꞌ woꞌo upu-upu tádáhi to mohárá i dáꞌána!
15 Agáiáná nipatodáhi miꞌi tóáꞌna i lalu tampoꞌ,
tetakaꞌ hai rante hangko i besiꞌ hai tambaga,
hai nipálehi i pádá.
Nipatodáhimode naloeꞌi namu to hangko i langiꞌ hingkakani hai binataꞌ,
hai rumpuꞌ to tueꞌ i pádá ina mewaliꞌ pandeꞌna.
16 Nipatodáhi miꞌi pekirina tebáliki mewaliꞌ nodo pekiri binataꞌ,
pitu parena kamaruena.
17 Hawaꞌ deꞌe kabotuꞌángkiꞌ sangkani,
kaiꞌ malaꞌeka to mekámpái.
Tunggáiángkiꞌ bona upu-upu tauna mopangákuꞌ kaPueꞌ Alana to i Surugáꞌ to mokuasaꞌi kadatuá tauna,
hai kadatuá iti peisá Napeweꞌi i heáná peá tauna to Napokana,
tepasuaꞌ i tauna to i wóiꞌ tueꞌna.’
18 Iti miꞌi to kuita i lalu paturungkuꞌ.
Mewaliꞌ deꞌe-deꞌe Beletasaꞌ,
kupembiáꞌ bona nuhángáꞌáꞌáꞌaꞌ lempóna.
Hangko i oloꞌraꞌ upu-upu to handaꞌ pangisáraꞌ to ara i lalu kadatuángkuꞌ deꞌe,
tiꞌara ara haweꞌ hadua to nabuku mopakanótó lempóna.
Ngkáliꞌna peá io to mobuku molempónga láwiꞌ nateteꞌkoꞌ kuasaꞌ to magasaꞌ.”
Danieli motótóráká lempóna paturuna datu
19 Kanahádina Danieli to rahangaꞌ woꞌo Beletasaꞌ mokana i paturuna datu,
napotingkáráꞌ haneꞌi mekanooꞌ láwiꞌ napokalááꞌ.
Mewaliꞌ Datu Nebukanesa molaluita i Beletasaꞌ,
nauliꞌ,
“Beletasaꞌ!
Ineeꞌ riꞌi paturungkuꞌ deꞌe hai lempóna ina mopamasusa lalumu.”
Mehániꞌ Beletasaꞌ,
nauliꞌ,
“Datu!
Maroꞌa ntepuꞌu ane upu-upu to mewaliꞌ i lalu paturumu mewaliꞌ i upu-upu ewálimu!
Ineeꞌ mewaliꞌ i hio,
datu.
20 Kau to naita datu,
mahile hai maróhó,
kamapángkáꞌna haweꞌ i langiꞌ,
hai raita upu-upu tauna i humalele duniáꞌ.
21 Upu-upu taweꞌna mababe,
hai wuaꞌna handaꞌ ntepuꞌu haneꞌi peisá raꞌandeꞌ upu-upu to tueꞌ i duniáꞌ.
Hinángkáꞌ binataꞌ to ara i pádá mebóungá i wóiꞌna,
hai dáꞌána rapohárái tádáhi.
22 Ó datu!
Kau iti ia miꞌi datu!
Kadatuámu mahile hai maróhó.
Kamakuasaꞌmu mantámbái haweꞌ i langiꞌ,
haweꞌ-haweꞌ i wuntu duniáꞌ.
23 To naita datu ia miꞌi hadua malaꞌeka topekámpái to mendáulu mai hangko i langiꞌ,
hai molaluita,
nauliꞌ node:
‘Tiwi kau deꞌe hai nitátáꞌ,
agáiáná nipatodáhi tóáꞌna i lalu tampoꞌ,
tetakaꞌ hai rante besiꞌ hai tambaga.
Nipálehi i pádá.
Nipatodáhi naloeꞌi namu to hangko i langiꞌ.
Katueꞌna ina hibali hai binataꞌ to i pádá.
Iti miꞌi to ina mewaliꞌ i hia pitu parena kamaruena.’
24 Deꞌe miꞌi lempóna datu,
hai deꞌe miꞌi popakanótóna Pueꞌ Ala to i Surugáꞌ mokana i datu:
25 Datu ina rawura hangko i oloꞌraꞌ tauna,
hai datu ina roo i oloꞌraꞌ binataꞌ i pádá.
Datu ina mandeꞌ rumpuꞌ nodo gapiꞌ,
hai ina maturu i pádá,
álána ina naloeꞌi namu to hangko i langiꞌ.
Iti ina mewaliꞌ pitu parena kamaruena,
duuꞌna datu mopangákuꞌ Pueꞌ Ala to i Surugáꞌ peá to makuasaꞌ i kadatuá tauna,
hai to mampeweꞌi kadatuá iti i tauna to Napileꞌi.
26 To nauliꞌ malaꞌeka,
‘Nipatodáhi tóáꞌna iti i lalu tampoꞌ,’
lempóna:
datu ina mewaliꞌ huleꞌ datu,
ane datu mopangákuꞌ Pueꞌ Ala peá to makuasaꞌ i humalele duniáꞌ.
27 Mewaliꞌ deꞌe-deꞌe datu,
kupembiáꞌ bona datu mampeuláꞌi paturoꞌkuꞌ deꞌe:
datu hangaa-ngaa mengkaroo mobábehi dósá,
ngkáliꞌna riꞌi to nabábehi datu ia miꞌi bábehiá to maroꞌa hai hintotoꞌ,
hai hangaa-ngaa maꞌahiꞌ i tauna to meahiahiꞌ tueꞌraꞌ.
Ane onoꞌ to nabábehi datu,
babilaꞌ ina maroꞌa katueꞌna datu.”
28 Upu-upu iti mewaliꞌ i wátána Datu Nebukanesa.
29 Hampuloꞌ hai rombulá hangko ionoꞌ,
i tempóna molulumao i atuꞌ to hirante to mewaliꞌ pengkarooá,
to ara i támbi kadatuána i Bábeli,
30 ia molaluita,
nauliꞌ node:
“Peita!
Meraeꞌ ntepuꞌu kótá Bábeli.
Kódóꞌ miꞌi to moaró haneꞌi mewaliꞌ pehodaꞌána popárentá kadatuángkuꞌ to mopatongawaꞌ kamakuasaꞌkuꞌ,
hai kamaróhóngkuꞌ,
hai kamahilena popárentángkuꞌ!”
31 Tiꞌara mani hópóꞌ polaluitana,
tehádi miꞌi wambaꞌ hangko i langiꞌ to manguliꞌ node:
“Datu Nebukanesa,
nupehádingi deꞌe:
kamakuasaꞌmu mewaliꞌ datu raꞌala miꞌi hangko i hio.
32 Io ina rawurakoꞌ hangko i oloꞌraꞌ tauna,
hai ina tueꞌkoꞌ hingkakani hai binataꞌ i pádá.
I lalu pitu parena kamaruena,
ina mandeꞌkoꞌ rumpuꞌ nodo gapiꞌ.
Iti miꞌi to ina mewaliꞌ i hio duuꞌmu mopangákuꞌ Pueꞌ Ala to i Surugáꞌ to makuasaꞌ i kadatuá tauna,
hai kadatuá iti peisá Napeweꞌi i heáná peá to Napileꞌi!”
33 I tempó iti woꞌo,
upu-upu laluita to nahádi hangko i langiꞌ tebukeki i Datu Nebukanesa.
Ia rawura hangko i oloꞌraꞌ tauna,
hai mandeꞌ rumpuꞌ nodo gapiꞌ.
Wátána naloeꞌi namu to hangko i langiꞌ,
weluáꞌna malóe nodo wulu tádáhi koꞌaaꞌ,
hai kánuna nodo kánu tádáhi.
34 Kaliuna peá tempó to tepakanótó,
ia miꞌi pitu parena,
kódóꞌ Nebukanesa mengoaꞌaꞌ i langiꞌ,
hai pekiringkuꞌ manótó miꞌi huleꞌ.
Hangko ionoꞌ,
kutóiá Pueꞌ Ala to i Surugáꞌ,
hai kupomahile hangaꞌna Ia to Tueꞌ Haweꞌ i Rue-ruena,
kuꞌuliꞌ:
Pueꞌ Ala to mewaliꞌ datu haweꞌ i rue-ruena.
KamakuasaꞌNa hai popárentáNa tiꞌara mokahópóꞌá.
35 Upu-upu tauna i duniáꞌ tiꞌara mobunduꞌ i peitáNa.
Pueꞌ Ala mokuasaꞌi malaꞌeka to i surugáꞌ
hai upu-upu tauna i duniáꞌ.
Tiꞌara ara to nabuku meꞌewaꞌ,
hai tiꞌara ara to pebáiꞌ mekuneꞌ
apa to Nabábehi.
36 I tempóna manótó miꞌi huleꞌ pekiringkuꞌ,
upu-upu peawaꞌna hai peraeꞌna kadatuángkuꞌ mesuleꞌ miꞌi huleꞌ i kódóꞌ.
Upu-upu topepatentengkuꞌ hai tauna to mapángkáꞌ lántiꞌraꞌ i kadatuángkuꞌ maiaꞌ modupaꞌ,
haneꞌi rapopasuleꞌaꞌ huleꞌ i lántiꞌkuꞌ hangkoia,
hai kapeawaꞌna kadatuángkuꞌ melumbuꞌ hangko i rungu-runguna.
37 Mewaliꞌ deꞌe-deꞌe kódóꞌ Nebukanesa,
kutóiá hai kupomahile hangaꞌna Pueꞌ Ala to mepárentá i surugáꞌ.
Upu-upu to Nabábehi manótó hai bukeꞌ timbá,
hai Nabuku mopaiwóiꞌ tauna to maꞌángkáꞌ.