Datu Nebukanesa mampopesuwuꞌ párentá bona upu-upu tauna menómbá i watu penómbáꞌá
3
Hangkani tempó,
Datu Nebukanesa mobábehi hambuaꞌ watu penómbáꞌá hangko i buláwá.
Kamapángkáꞌna rompuloꞌ hai pitu mete,
hai kamapepaꞌna wátána hungkuꞌ tálu mete.
Napopeángkáꞌ i lembo Duraa i poropensi Bábeli.
2 Hangko ionoꞌ,
Datu Nebukanesa mohuoꞌ tauna mokióꞌ upu-upu biti mágáuꞌ,
upu-upu tadulako hamboloꞌ-hamboloꞌ roboꞌ,
tauna to mopatente upu-upu tadulako to motibaaꞌ tampoꞌ,
upu-upu topotibaaꞌ dóiꞌ,
hóndó ádá,
topebutusi,
hai upu-upu topohawaꞌ i hamboloꞌ-hamboloꞌ roboꞌ.
Nakióꞌheꞌ bona laoheꞌ mamposusai watu penómbáꞌá to hangko wali.
3 I kahaweꞌraꞌ tauna iti,
meángkáꞌheꞌ i lindoꞌna watu penómbáꞌá to nabábehi datu.
4 Molaluita miꞌi opasina datu napasimbuku,
nauliꞌ,
“Halalu-halalu hangko i upu-upu kaꞌaraꞌá hai upu-upu roboꞌ,
hai hangko i upu-upu básá!
Nipehádingi miꞌi hawaꞌna datu to manguliꞌ node:
5 Ane nihádi miꞌi pokániꞌna tamburuꞌ,
tulali,
kasapi,
reba,
gambusi,
sereda hai muni musi to ntániꞌna,
kómu upu-upu hangaa-ngaa molingkudukou menómbá i watu penómbáꞌá to hangko i buláwá to nabábehi Datu Nebukanesa.
6 Heáná peá to tiꞌara mampeuláꞌi hawaꞌ deꞌe,
ina kásáliu ratibe i lalu walombo api to mahile.”
7 I karahádina peá párewá musi rapopokániꞌ,
upu-upu tauna hangko i kaꞌaraꞌá,
hangko i upu-upu roboꞌ,
hai upu-upu pueꞌ básá,
molingkuduheꞌ menómbá i watu penómbáꞌá to hangko i buláwá iti.
Táluheꞌ rángána Danieli tiꞌara mampeuláꞌi párentána datu
8 Tempó iti,
araheꞌ bahangapa tauna to handaꞌ pangisáraꞌb mampehángáꞌáheꞌ toIahudiꞌ i Datu Nebukanesa.
9 Mewaliꞌ molaluitamoheꞌ i datu,
rauliꞌ,
“Ee datu!
Hampóáꞌworia maroꞌa tueꞌmu haweꞌ i rue-ruena!
10 Datu mampopesuwuꞌ miꞌi hawaꞌ,
bona heáná tauna to mohádi pokániꞌna tamburuꞌ,
tulali,
kasapi,
reba,
gambusi,
sereda,
hai muni musi to ntániꞌna,
hangaa-ngaa molingkuduheꞌ menómbá i watu buláwá iti.
11 Hai heáná to tiꞌara mau molingkudu menómbá,
hangaa-ngaa ratibe i lalu walombo api to mahile.
12 Agáiáná araheꞌ bahangapa toIahudiꞌ to napoinálái datu mampopolumao hawaꞌ i poropensi Bábeli deꞌe,
iamoheꞌ Sadara,
Mesaꞌ hai Abeꞌnego.
Taunaheꞌ deꞌe tiꞌara mampeuláꞌi hawaꞌna datu.
Tiꞌaraheꞌ woꞌo mau motóiá ánituna datu,
hai tiꞌaraheꞌ menómbá i watu buláwá to napopeángkáꞌ datu.”
13 Kanahádina peá datu,
kásáliu mabukoꞌ ntepuꞌu hai liliu napehawaꞌá bona tauna to tálu iti raꞌántiheꞌ lao i hia.
14 Mewaliꞌ molaluita Datu Nebukanesa,
napekuneꞌ i hira,
“Sadara,
Mesaꞌ hai Abeꞌnego!
Kuhádi tiꞌarakou mau menómbá i ánitungkuꞌ hai tiꞌarakou mau molingkudu menómbá i lindoꞌna watu penómbáꞌá to hangko i buláwá to kupopeángkáꞌ iti.
Toꞌu ba tiꞌara laluita iti?
15 Noumbá deꞌe-deꞌe ane nihádi miꞌi musi mokániꞌ,
maukou menómbá ba tiꞌara?
Ane tiꞌarakou mau,
ina ratibekou i lalu walombo api to mahile.
Ánitu apa paꞌi to nabuku mokábáhákou hangko i tae kamakuasaꞌkuꞌ?”
16 Mehániꞌheꞌ Sadara,
Mesaꞌ hai Abeꞌnego i datu,
rauliꞌ,
“Tiꞌara ara bunduꞌna kihániki apa to nukuneꞌangkaiꞌ deꞌe.
17 Ane Pueꞌ Ala to kipenómbái Nabuku mokábáháꞌangkaiꞌ hangko i api to roreꞌ iti hai hangko i tae kamakuasaꞌmu,
kaiꞌ hangaa-ngaa ina Nakábáháꞌangkaiꞌ.
18 Agáiáná ane rápáꞌna tiꞌara,
bona naisá datu,
tiꞌaraꞌangkaiꞌ ina menómbá i ánituna datu,
hai tiꞌaraꞌangkaiꞌ woꞌo ina menómbá i watu penómbáꞌá to hangko i buláwá to napopeángkáꞌ datu iti.”
Sadara, Mesaꞌ hai Abeꞌnego ratibe i lalu api to lolaaꞌ ntepuꞌu
19 Kanahádina peá polaluitaraꞌ,
kásáliu mangkálei lindoꞌna datu láwiꞌ mabukoꞌ ntepuꞌu i Sadara,
Mesaꞌ hai Abeꞌnego,
haneꞌi napehawaꞌiá bona api iti ratámbái kamaꞌámuꞌna pitu kánina hangko i kamaꞌámuꞌna to rungu-runguna.
20 Napohawaꞌámoheꞌ tauna to maróhó ntepuꞌu hangko i oloꞌraꞌ surudadoꞌna bona motimpukuheꞌ Sadara,
Mesaꞌ hai Abeꞌnego,
hai laoheꞌ ratibe i lalu api to tangaꞌna lolaaꞌ.
21 Ratimpuku mpuꞌumoheꞌ tauna to tálu iti hante kumbá,
puruká,
sóngkó hai waruꞌ to ntániꞌna,
haneꞌiheꞌ ratibe i lalu api to lolaaꞌ iti.
22 Ánti kanapehawaꞌiána ntepuꞌu datu bona api iti rapalolaaꞌ ntepuꞌu,
mogalo riꞌi tauna to moángkáꞌheꞌ Sadara,
Mesaꞌ hai Abeꞌnego,
mateheꞌ nahandóreki api.
23 Agáiáná tauna to tálu iti,
ia miꞌi Sadara,
Mesaꞌ hai Abeꞌnego,
manawoꞌmoheꞌ i tangaꞌ api to tangaꞌna lolaaꞌ,
bateꞌ-bateꞌ karatimpukuraꞌmonto.
24 Hangkaꞌ-hangkaꞌ tingkáráꞌ Datu Nebukanesa.
Hawiáꞌ-wiáꞌ meángkáꞌ molaluita i topepatentenaheꞌ,c
nauliꞌ,
“Tiꞌara paꞌi tálu peheꞌ tauna to tatibe i lalu api?”
Rahániki i datu,
“Toꞌu ntepuꞌu datu.”
25 Nauliꞌ datu,
“Agáiáná moapa riꞌi haneꞌi ibaraheꞌ tauna kuita tekábáhá hai molulumao i tangaꞌ api,
hai tiꞌaraheꞌ moapa-apa?
Tiꞌaraheꞌ naꞌandeꞌ api,
hai rángáraꞌ to hadua iti lenggeꞌna nodo ánitu.”
To táluheꞌ rakábáhá hai rapopengkaheꞌ lántiꞌraꞌ
26 Hangko ionoꞌ,
Datu Nebukanesa mohungkuki babaꞌ walombo iti haneꞌi mekióꞌ,
nauliꞌ,
“Sadara,
Mesaꞌ hai Abeꞌnego,
huoꞌána Pueꞌ Ala to i Surugáꞌ!
Mesuwuꞌmokou hangko i lalu api,
hai maimokou.”
Mewaliꞌ mesuwuꞌ mpuꞌumoheꞌ hangko i lalu api.
27 Upu-upu biti mágáuꞌ,
tadulako-tadulako hai topepatentena,
laoheꞌ motolelingi tauna to tálu iti.
Rapeita riꞌi,
tauna to tálu iti tiꞌarantoheꞌ haweꞌ naꞌandeꞌ api,
mogalo riꞌi weluáꞌraꞌ tiꞌaranto nahandóreki api,
noꞌonoꞌ woꞌo kumbáraꞌ,
hai tiꞌarantoheꞌ memau rámbu.
28 Mewaliꞌ nauliꞌ Datu Nebukanesa,
“Tetóiá mpuꞌu Pueꞌ Ala to rapenómbái Sadara,
Mesaꞌ hai Abeꞌnego.
Ia mohuoꞌ miꞌi mai malaꞌekaNa bona mopelae hawiꞌNa to mepoinálái i Hia.
Hira moliungimoheꞌ hawaꞌkuꞌ,
láwiꞌ mouláꞌ pekiriraꞌ,
rángiraꞌ miꞌi mate haneꞌi menómbá i ánitu,
hai bateꞌ-bateꞌna Pueꞌ Alaraꞌ peá to rapenómbái.
29 Onoꞌ miꞌi haneꞌi kupaꞌara hawaꞌ bona heáná peá hangko i upu-upu kaꞌaraꞌá,
hai upu-upu roboꞌ,
ba upu-upu básá,
to mopakadake hangaꞌna Pueꞌ Ala to rapenómbái Sadara,
Mesaꞌ hai Abeꞌnego,
ina rabóhóꞌ-bóhóꞌ duuꞌraꞌ mate,
hai támbina ina ragero duuꞌna maropuꞌ,
láwiꞌ tiꞌara ara ala to ntániꞌna to nabuku mobábehi apa to Nabábehi i Sadara,
Mesaꞌ hai Abeꞌnego.”
30 Hangko ionoꞌ,
datu mampopengkaheꞌ wopiꞌi lántiꞌraꞌ Sadara,
Mesaꞌ hai Abeꞌnego mewaliꞌ to mapángkáꞌ lántiꞌraꞌ i poropensi Bábeli.