Langiꞌ hai tampoꞌ motóiá PUEꞌ
148
Haleluia! Tatóiá PUEꞌ!Ee upu-upu to i surugáꞌ, nitóiá miꞌi PUEꞌ.
Motóiákou PUEꞌ indoreá.
2 Ee upu-upu malaꞌekaNa, nitóiá miꞌi PUEꞌ.
Ee upu-upu surudadoꞌNa, nitóiá miꞌi PUEꞌ.
3 Alo hai wulá, motóiákou PUEꞌ,
noꞌonoꞌ woꞌo upu-upu betue to mewangkaꞌ i langiꞌ.
4 Ee langiꞌ to i reá ntepuꞌu, nutóiá miꞌi PUEꞌ.
Ee uwai to i wongkona langiꞌ,a nutóiá miꞌi PUEꞌ.
5 Hampóáꞌworia upu-upu to ara ina motóiá PUEꞌ
láwiꞌ hinángkáꞌna to ara mewaliꞌ ánti párentáNa.
6 Ia mopakanótó iumbá katoroꞌáraꞌ haweꞌ i rue-ruena,
hai mopaꞌara párentá to tiꞌara peisá raliungi.
7 Ee upu-upu to i duniáꞌ, nitóiá miꞌi PUEꞌ Ala.
Naga to mahile hai tahiꞌ to kaladu,
8 api, udá to mowuaꞌ,
salju, namu hai wui to rumihi.
Upu-upuheꞌ iti mampeuláꞌi párentána PUEꞌ.
9 Noꞌonoꞌ woꞌo buluꞌ to mapángkáꞌ hai buluꞌ to rerembe,
kau to mowuaꞌ hai kau to mapángkáꞌ,
10 binataꞌ to maila hai binataꞌ to rapiaraꞌ,
binataꞌ to pendóló hai tádáhi to membara,
11 datu-datu to makuasaꞌ i duniáꞌ hai upu-upu tauna,
tadulako-tadulako hai upu-upu to mepárentá i duniáꞌ,
12 ánáꞌntomoane hai ánáꞌntawine,
tauna to matinuwuꞌ hai tauna to maleheꞌ mani.
13 Hampóáꞌworia upu-upuheꞌ iti ina motóiá PUEꞌ,
láwiꞌ mahile mani tueꞌNa hangko i hinángkáꞌna.
Ia makuasaꞌ ntepuꞌu
hangko i upu-upu to ara i langiꞌ hai i duniáꞌ.
14 Ia mopakaróhó miꞌi taunáNa,
haneꞌi upu-upu tauna to tetidaꞌ i Hiab metóiáheꞌ i Hia,
iamoheꞌ toSáráeliꞌ to Napokaꞌahiꞌ.
Haleluia! Tatóiá PUEꞌ!