Petóiá i Pueꞌ Ala to makuasaꞌ
147
Haleluia! Tatóiá PUEꞌ!Maroꞌa ntepuꞌu mamponanikeꞌ nani petóiá i Hia.
Hintotoꞌkeꞌ mampomahile Pueꞌ Ala.
2 PUEꞌ moaró huleꞌ kótá Ierusale,
hai Ia mampopesuleꞌ toSáráeliꞌ to ratawaniheꞌ i tampoꞌ ntániꞌna.a
3 PUEꞌ mopakauriꞌ tauna to tiꞌara piꞌi ara pehárungána,
hai mopákupui tomaháina.
4 Ia mopakanótó kahandaꞌna betue i langiꞌ,
hai mohangaꞌheꞌ hambuaꞌ-hambuaꞌ.
5 Makuasaꞌ ntepuꞌu Pueꞌtaꞌ,
kamapándeNa tiꞌara ara támpáꞌna.
6 PUEꞌ mopakaróhó tauna to rapamapári,
agáiáná tauna to kadake Nakada-kada haweꞌ i tampoꞌ.
7 Mamponanimokou nani petóiá i PUEꞌ,
motóiákou Pueꞌ Alantaꞌ, niuláꞌ hai kasapi.
8 Ia mopaꞌara gawu to makápá i langiꞌ,
Ia mampopendáulu udá i duniáꞌ,
hai mopatueꞌ rumpuꞌ i buluꞌ-buluꞌna.
9 Ia to mopatimama pandeꞌraꞌ binataꞌ,
hai ánáꞌ tádáhi kaaꞌ to menganga-nganga mampeliꞌ pandeꞌraꞌ.
10 Tiꞌara Napogóeꞌ ane tauna mehárungá
i kamaróhóna dárá pombeala,
ba surudadoꞌ to maróhó.
11 Ngkáliꞌna riꞌi góeꞌ ntepuꞌu PUEꞌ i tauna to mengkoruꞌ i Hia,
hai mehárungá i kamaꞌahiꞌNa to tiꞌara madepuꞌ-depuꞌ.
12 Ee to toroꞌ i Ierusale, nipomahile miꞌi PUEꞌ,
hai to ara i buluꞌ Sio, nitóiá Pueꞌ Ala to nipenómbái,
13 láwiꞌ Ia mopamaróhó pehola babaꞌá i kótámi,
hai mowátiꞌheꞌ taunámi.
14 Ia mopaꞌara podame i tampoꞌmi,
hai mampoweꞌikou pandeꞌ to maroꞌa ntepuꞌu
bona mabuhukou.
15 Ia mopahaweꞌ párentáNa i duniáꞌ,
hai ngkóráꞌNa poloꞌ molámbiꞌ tunggáiáNa.
16 Ia mampopendáulu salju to mekómóki
nodo wulu dimbá,
hai mopaꞌara namu to boku i tampoꞌ
nodo awu to nakámburá wui.
17 Ia mampopendáulu udá to mowuaꞌ
nodo watu to marámbóꞌ.
Heáná paꞌi to nabuku mantaha
ane Pueꞌ mopaꞌara lengiꞌ.
18 Ia mopahaweꞌ párentáNa,
haneꞌi uwai to boku iti magonuꞌ.
Ia mopaꞌara wui,
haneꞌi uwai iti moili.
19 Ia mopahaweꞌ miꞌi ngkóráꞌNa, párentáNa hai áturáNa
i toSáráeliꞌ, pemuleꞌánaheꞌ Iako.
20 Tiꞌara Nabábehi noꞌonoꞌ i tauna i tampoꞌ ntániꞌna,
mewaliꞌ tiꞌaraheꞌ moisá áturáNa.
Haleluia! Tatóiá PUEꞌ!