Pueꞌ peá to motulungikeꞌ
146
Haleluia!Ina motóiáꞌaꞌ PUEꞌ hangko i lalungkuꞌ ntepuꞌu!
2 Ina mampomahileaꞌ PUEꞌ
lántuꞌángkuꞌ mani tueꞌ.
Ina mamponaniaꞌ nani petóiá i Pueꞌ Ala to kupenómbái,
lántuꞌángkuꞌ ara mani i duniáꞌ.
3 Ineeꞌkou mehárungá i tauna to i reá tueꞌna,
ba i heáná peá, láwiꞌ tiꞌara rabuku tauna mampelaekou.
4 Ane upu inaoraꞌ, mewaliꞌheꞌ awu tampoꞌ.
Tempó iti woꞌo, tunggáiáraꞌ tiꞌara piꞌi mewaliꞌ.
5 Morasiꞌ miꞌi tauna to natulungi
Pueꞌ Ala to napenómbái Iako.
Morasiꞌ miꞌi tauna to mehárungá i Pueꞌ Ala, PUEꞌna.
6 Ia miꞌi to mampopewaliꞌ langiꞌ hai tampoꞌ,
tahiꞌ hai upu-upu óntóꞌna.
Ia tetidaꞌ oaꞌ haweꞌ i rue-ruena.
7 Ia mampeámpárái tauna to rapopeahiahiꞌ,
hai mampeweꞌi pandeꞌ i tauna to marimi.
PUEꞌ mampopesuwuꞌ tauna hangko i petarungkuá.
8 PUEꞌ mopamahingkaaꞌ mátána tauna to bilo,
Ia mopakaróhó tauna to upu róhóna.
PUEꞌ mampokaꞌahiꞌ tauna to manótó.
9 PUEꞌ mokámpái tohandarena,
Ia motulungi tobembaꞌ hai ánángkóiꞌ to ilu,
agáiáná Ia mosalempori poliworaꞌ tauna to kadake.
10 Ee to i Sio, Pueꞌ Ala to nipenómbái,
PUEꞌ Ia miꞌi Datu to mepárentá haweꞌ i rue-ruena.
Haleluia! Tatóiá miꞌi PUEꞌ!