Petóiá i Pueꞌ Ala ánti kamaroꞌaNa hai kamahilena tueꞌNa
145
Nani petóiá. Nanina Daudiꞌ.
Ó Pueꞌ Ala Datungkuꞌ, ina kupomahileKoꞌ
hai motóiáKoꞌ haweꞌ i rue-ruena.
2 Hangalo-hangalo ina kutóiáKoꞌ,
hai kuꞌundeꞌ mampomahileKoꞌ oaꞌ haweꞌ i rue-ruena.
3 MakuasaꞌKoꞌ PUEꞌ hai hintotoꞌ ntepuꞌuKoꞌ ratóiá,
kamahilena tueꞌMu tiꞌara tabuku tapekiri.
4 Tauna ina mobámbári haweꞌ i pemuleꞌáraꞌ
mokana i bábehiáMu to mahile.a
5 Ina rabámbári peraeꞌna peawaꞌMu,
hai ina kupepekiri oaꞌ upu-upu to Nubábehi
láwiꞌ maroꞌa ntepuꞌu.
6 Kamaróhóna tandaꞌ kuasaꞌ to Nubábehi to meriringkuꞌi ina rabámbári,
hai ina kupodarita kamahilena tueꞌMu.
7 Tauna ina mampodarita oaꞌ hinángkáꞌ kamaroꞌaMu,
hai ina monaniheꞌ mokana i kamanótóMu.
8 PUEꞌ maroꞌa laluNa hai bukeꞌ ahiꞌ.
Ia sabaraꞌ hai maꞌahiꞌ ntepuꞌu i kitaꞌ.
9 PUEꞌ mobábehi to maroꞌa i upu-upu tauna,
hai mahile ahiꞌNa i upu-upu to Napopewaliꞌ.
10 Upu-upu to Nupopewaliꞌ ina manguliꞌ
handaꞌ kamaroꞌana i Hio PUEꞌ,
hai tauna to tetidaꞌ i Hiob ina motóiáKoꞌ.
11 Ina rapahaweꞌ kamaróhóna popárentáMu,
hai ina mampodaritaheꞌ kamakuasaꞌMu,
12 bona raisá upu-upu tauna kamakuasaꞌMu
hai kamahilena peawaꞌna kadatuáMu.
13 KadatuáMu bateꞌna mantaha oaꞌ,
hai mepárentáKoꞌ haweꞌ i rue-ruena.
Upu-upu laluitana PUEꞌ peisá rapoinálái,
hai mopatongawaꞌ oaꞌ kamaꞌahiꞌNa moliu upu-upu to Nabábehi.
14 PUEꞌ motulungi upu-upu tauna to mapári,
hai Ia mopakaróhó tauna to upu róhóna.
15 Upu-upu to tueꞌ mehárungá i Hio,
bona ara pandeꞌraꞌ i tempóna raparaluu.
16 I kaNubungkáhiáraꞌ taeMu, mabuhuheꞌ,
láwiꞌ Nupeweꞌi pandeꞌ i upu-upu to tueꞌ.
17 PUEꞌ mobábehi oaꞌ to manótó,
hai mopatongawaꞌ oaꞌ kamaꞌahiꞌNa
moliu i upu-upu to Nabábehi.
18 PUEꞌ timama oaꞌ motulungi upu-upu tauna to meraruaꞌ i Hia,
to membiáꞌ tulungi i Hia hangko i laluraꞌ ntepuꞌu.
19 Ia mopabukeꞌi peundeꞌána upu-upu tauna to mengkoruꞌ i Hia.
Ia mampehádingi pembiáꞌraꞌ hai motulungiheꞌ.
20 PUEꞌ mokámpái upu-upu tauna to mepokaꞌahiꞌ i Hia,
agáiáná upu-upu tauna to kadake Napatunaheꞌ.
21 Ina kuhuwárá laluita to motóiá PUEꞌ.
Hampóáꞌworia upu-upu to tueꞌ
ina motóiá PUEꞌ to magasaꞌ haweꞌ i rue-ruena.