Pekakaena hadua datu
144
Nanina Daudiꞌ.
Tetóiá miꞌi PUEꞌ, buluꞌ watu pengkatueꞌángkuꞌ.
Ia mopaturoꞌaꞌ rárána mombeala.
2 Ia miꞌi to mewaliꞌ pengkatueꞌángkuꞌ
hai pengkatiháláꞌángkuꞌ.
Ánti kamaꞌahiꞌNa, Ia mokámpáiaꞌ nodo bente kótá
hai mampelaeaꞌ nodo lábá.
Mengkatueꞌaꞌ i Hia.
Ia mampopengkoruꞌ tauna i tampoꞌ ntániꞌna i kuasaꞌkuꞌ.
3 Ó PUEꞌ, apa paꞌi tauna haneꞌiheꞌ Nukádipurá?
Apa paꞌi tauna haneꞌiheꞌ Nubiláꞌ?
4 Katueꞌna tauna i duniáꞌ deꞌe hampaiꞌ peá,
nodo peinao ba babaio to tiꞌara marue.
5 Ó PUEꞌ, kupembiáꞌ bona Nubungkáhi langiꞌ,
hai mendáuluKoꞌ mai i duniáꞌ.
MotóbóꞌKoꞌ buluꞌ-buluꞌ bona mesuwuꞌ mai rámbu.
6 Nupaꞌara kiláꞌMu, hai Nupopogááꞌ-gááꞌheꞌ ewali.
Nupanaꞌheꞌ bona mahawuꞌheꞌ.
7 Kupembiáꞌ bona Nutulungiaꞌ
hangko i katoroꞌáMu to i reá.
Nupelaeaꞌ hangko i kapári to nodo uwai to melábóꞌ,
hai Nukábáháꞌaꞌ hangko i kuasaꞌraꞌ tohandarena.
8 Ewálingkuꞌ iti mebagiuꞌ,
hai modándiheꞌ ina molaluita i katoꞌu-toꞌuána,
mole dongkoꞌraꞌ peá.
9 Ó Pueꞌ Ala, ina mamponaniaꞌ
nani to woꞌu i Hio, kuꞌuláꞌ gambusuꞌ.
10 Io to mampopenangiheꞌ daturaꞌ toSáráeliꞌ,
hai mampelae Daudiꞌ hawiꞌMu.
11 Kupembiáꞌ bona Nukábáháꞌaꞌ
hangko i tauna to ina mopapateꞌaꞌ,
hai Nupelaeaꞌ hangko i kuasaꞌraꞌ tohandarena
to raundeꞌ peá mebagiuꞌ hai modongkoꞌ.
12 Hampóáꞌworia ánáꞌtaꞌ tobaleilo
nodoheꞌ tudaꞌ-tudaꞌ to kalao-lao mahile,
hai ánáꞌtaꞌ towawine
nodoheꞌ áriꞌi to mopakaróhó támbina datu.
13 Hampóáꞌworia buhoꞌtaꞌ ina bukeꞌ
hai mampopengaa pandeꞌ hangko i wuaꞌna powiáꞌtaꞌ.
Mekakaeaꞌ bona dimbá hai bekeꞌtaꞌ i pádá
memuleꞌheꞌ duuꞌna i sábuna lábi kahandaꞌraꞌ,
14 hai handaꞌ ntepuꞌu woꞌo pemuleꞌáraꞌ gapiꞌtaꞌ,
tiꞌara ara to mengkaleaꞌ.
Hampóáꞌworia i lalu kótántaꞌ,
tiꞌara tehádi tauna monganga-nganga
ánti kamalááꞌraꞌ.
15 Morasiꞌ miꞌi tauna to molámbiꞌ to noꞌonoꞌ.
Morasiꞌ ntepuꞌu tauna to menómbá i PUEꞌ.
Ia miꞌi Pueꞌ Alaraꞌ.