Pekakae membiáꞌ tulungi
143
Nani to nakáráhi Daudiꞌ.
Ó PUEꞌ, kupembiáꞌ bona Nupehádingi pekakaengkuꞌ,
Nupailalu pembiáꞌkuꞌ hai Nuhánikiaꞌ,
ánti katetidaꞌMu hai kamanótóMu.
2 IneeꞌKoꞌ mohoda-hoda kara-karana hawiꞌMu deꞌe,
láwiꞌ tiꞌara ara haweꞌ hadua to manótó i peitáMu.
3 Ewálingkuꞌ modápáꞌaꞌ hai monangiaꞌ,
ia mokada-kadaꞌaꞌ.
Ia mopasuaꞌaꞌ i lalu kakáindiána,
nodoaꞌ to marue miꞌi mate.
4 Tiꞌara piꞌi ara pehárungángkuꞌ,
hai masusa ntepuꞌu lalungkuꞌ.
5 Kubuhinao apa to mewaliꞌ hangkoia.
Kupepekiri upu-upu to Nubábehi hai to Nupobágóꞌ.
6 Moángkáꞌaꞌ taengkuꞌ i Hio mekakae,
kuparaluuKoꞌ, nodo tampoꞌ to melágáꞌ moparaluu uwai.
7 PUEꞌ, kupembiáꞌ bona kawiáꞌmoꞌ Nuhániki,
láwiꞌ upu miꞌi pehárungángkuꞌ.
Ineeꞌaꞌ Nutaleuki, bona tiꞌaraꞌaꞌ mate.
8 Kupembiáꞌ bona Nupatongawaꞌ
kamaꞌahiꞌMu i kódóꞌ hampepulo-hampepulo,
láwiꞌ mehárungáꞌaꞌ i Hio.
Kupembiáꞌ bona Nupatongawaꞌ i kódóꞌ peundeꞌáMu,
láwiꞌ mekakaeaꞌ i Hio.
9 Ó PUEꞌ, Nupelaeaꞌ hangko i ewálingkuꞌheꞌ,
láwiꞌ mengkatueꞌaꞌ i Hio.
10 Nupaturoꞌaꞌ bona kuisá mobábehi apa peundeꞌáMu,
láwiꞌ Io miꞌi Pueꞌ Ala to kupenómbái.
Ánti kamaroꞌaMu, kupembiáꞌ InaoMu
moteteꞌaꞌ bona maroꞌa oaꞌ katueꞌkuꞌ.
11 Ó PUEꞌ, ánti kamahilena hangaꞌMu,
kupembiáꞌ bona Nukámpái katueꞌkuꞌ,
hai ánti kamanótóMu,
Nukábáháꞌaꞌ hangko i kapári.
12 Nupatunaheꞌ ewálingkuꞌ
ánti kamaꞌahiꞌMu i kódóꞌ,
hai Nuropuꞌheꞌ upu-upu tauna to mampopeahiahiꞌaꞌ,
láwiꞌ kódóꞌ deꞌe hawiꞌMu.