Pekakae membiáꞌ tulungi
142
Nani pepaturoꞌ to nakáráhi Daudiꞌ tempóna i lalu balamba.a
2 Meraruaꞌaꞌ i PUEꞌ kupasimbuku,
mekakaeaꞌ membiáꞌ tulungi.
3 Mopahaweꞌaꞌ peraruaꞌkuꞌ i lindoꞌNa,
mampodaritaꞌaꞌ kamapáringkuꞌ i Hia.
4 Tempóna tiꞌara piꞌi ara pehárungángkuꞌ,
Io miꞌi to mokámpái katueꞌkuꞌ.
Nuitaheꞌ ewálingkuꞌ nodo to motáꞌá heáꞌ ngkaniiꞌ-niiꞌ
i rárá to kupoliui, bona rapakanawoꞌaꞌ.
5 Kupembiáꞌ bona Nupeita i kuánángkuꞌ,
tiꞌara ara haweꞌ hadua to motulungiaꞌ,
tiꞌara piꞌi ara pengkatueꞌángkuꞌ,
hai tiꞌara woꞌo ara haweꞌ hadua to mampembálilingiaꞌ.
6 Ó PUEꞌ, meraruaꞌaꞌ i Hio, kuꞌuliꞌ:
“Io miꞌi pengkatueꞌángkuꞌ.
Io peá to kuhárungá i duniáꞌ deꞌe.”
7 Kupembiáꞌ bona Nupehádingi peraruaꞌkuꞌ,
láwiꞌ tiꞌara mpuꞌu ara pehárungángkuꞌ.
Nupelaeaꞌ hangko i tauna to modápáꞌaꞌ,
láwiꞌ maróhó maniheꞌ hangko i kódóꞌ.
8 Nukábáháꞌaꞌ hangko i petarungkuá,
bona peisáꞌaꞌ motóiáKoꞌ.
Tauna to manótó ina hirámpuheꞌ motolelingiaꞌ,
ánti kamaroꞌaMu i kódóꞌ.