Pekakae membiáꞌ pekámpái
141
Nani to nakáráhi Daudiꞌ.
Ó PUEꞌ, meraruaꞌaꞌ i Hio.
Kupembiáꞌ bona Nugagu mai motulungiaꞌ.
Nupehádingi pembiáꞌkuꞌ
tempóngkuꞌ mekióꞌ i Hio.
2 Hampóáꞌworia pembiáꞌkuꞌ haweꞌ i Hio
nodo máuna dupaꞌ to raintu,
hai taengkuꞌ to kuángkáꞌ tempóngkuꞌ mekakae
mewaliꞌ nodo popenómbá kalumbaꞌ to rahuhuꞌ i Hio.a
3 PUEꞌ, kupembiáꞌ bona Nukámpái humengkuꞌ,
ineeꞌaꞌ Nupatodáhi mohuwárá laluita to kadake.
4 Ineeꞌaꞌ Nupatodáhi mampogóeꞌ apa to kadake,
haneꞌi kuꞌuláꞌ mobábehi bábehiá to tiꞌara maroꞌa
hingkakani hai tauna to mobábehi to kadake.
Hai ineeꞌaꞌ Nupatodáhi meuláꞌ i posusáraꞌ
mandeꞌ hingkakani hai hira.b
5 Ane tauna to manótó mopaháiaꞌ hai mokámbáróáꞌaꞌ,
lempóna ia mopatongawaꞌ kamaꞌahiꞌna i kódóꞌ.
Iti tandaꞌna peádáina i kódóꞌ. Ina kutarima.c
Mekakaeaꞌ oaꞌ moewaꞌ bábehiáraꞌ tauna to kadake.
6 Ane rahuhuꞌheꞌ i topebutusi,
ia miꞌi Pueꞌ Ala buluꞌ watuntaꞌ,
ina mohádiheꞌ kamaroꞌana polaluitangkuꞌ.d
7 Nodo watu to marupuꞌ i wongko tampoꞌ,
noꞌonoꞌ woꞌo buꞌuraꞌ tekámburá i duniáꞌraꞌ tomate.
8 Ó Pueꞌ ALA, Pueꞌkuꞌ, bateꞌkuꞌ mehárungá oaꞌ
hai mengkatueꞌ i Hio.
Ineeꞌaꞌ Nupatodáhi rapahurewuꞌ.
9 Nukámpáiaꞌ hangko i heáꞌ
to rapatakaꞌ tauna to kadake
to mampoinao mopakanawoꞌaꞌ.
10 Hampóáꞌworia tauna to kadake ina manawoꞌheꞌ
i heáꞌraꞌ haduduáraꞌ,
agáiáná kódóꞌ, tueꞌaꞌ i kamaroꞌa-roꞌa.