Pekakae membiáꞌ pekámpáina PUEꞌ
140
I topoánti toponani. Nani to nakáráhi Daudiꞌ.
2 Ó PUEꞌ, kupembiáꞌ bona Nukábáháꞌaꞌ
hangko i tauna to kadake,
Nukámpáiaꞌ hangko i tauna to maseke.
3 Moliwoheꞌ mobábehi to kadake,
hai pakaheꞌ mampopohioro tauna.
4 Polaluitaraꞌ peisá mopakanawoꞌ tauna,
hai peisá woꞌo mopaꞌara kapate i tauna.a
5 Ó PUEꞌ, Nukámpáiaꞌ hangko i kuasaꞌraꞌ tauna to kadake,
Nukámpáiaꞌ hangko i tauna to maseke,
to moliwo mopakanawoꞌaꞌ.
6 Tauna to mampepemahile mantáꞌámoheꞌ heáꞌ ngkaniiꞌ-niiꞌ
láwiꞌ raundeꞌ mopakanawoꞌaꞌ,
hai iumbá-umbá kalaoángkuꞌ,
ionoꞌheꞌ moáwungáꞌaꞌ.
7 Molaluitaꞌaꞌ i PUEꞌ, kuꞌuliꞌ:
“Io miꞌi Pueꞌ Ala to kupenómbái.
Ó PUEꞌ, Nupehádingi wongkódóꞌá pembiáꞌkuꞌ.”
8 Ó Pueꞌ ALA, Pueꞌkuꞌ to makuasaꞌ mampelaeaꞌ,
Io miꞌi to mokámpáiaꞌ tempóngkuꞌ mombeala.
9 Ó PUEꞌ, ineeꞌ Nupatodáhi tauna to kadake molámbiꞌ tunggáiáraꞌ,
ineeꞌheꞌ Nupaliu mampopolumao poliworaꞌ to kadake.
10 Tauna to motolelingiaꞌ mampepemahileheꞌ.
Kuhárungá apa to rahuwárá
ina mewaliꞌ i wátáraꞌ haduduáraꞌ.
11 Hampóáꞌworia awaa to roreꞌ mendáulu i wuáꞌraꞌ,b
hai ina manawoꞌheꞌ i lalu pingke duniáꞌraꞌ tomate
haneꞌi tiꞌarapoheꞌ mearó.
12 Kuhárungá tauna to mopakadake hángká rángáraꞌ
tiꞌara ina marue tueꞌraꞌ i duniáꞌ,
hai tauna to maseke ina narampeheꞌ kapári.
13 Kuisá PUEꞌ ina mobábehi to manótó
i tauna to rapopeahiahiꞌ,
hai mamperuruꞌi tauna to i wóiꞌ tueꞌraꞌ.
14 Bateꞌna tauna to manótó ina motóiáKoꞌ,
tauna to manoroꞌ laluraꞌ ina toroꞌ hingkakani hai Io.