Pueꞌ Ala moisá upu-upuna
139
I topoánti toponani. Nanina Daudiꞌ.
Ó PUEꞌ, Nupáresáꞌ miꞌi lalungkuꞌ,
hai Nuisá ntepuꞌu kaheánángkuꞌ.
2 Nuisá upu-upuna to kubábehi,
impiráꞌaꞌ mehoda hai impiráꞌaꞌ meángkáꞌ,
hai kehapiꞌKoꞌ karaoꞌ,
Nuisá woꞌo upu-upu to i pekiringkuꞌ.
3 Nuitaꞌaꞌ maroꞌa tempóngkuꞌ molumao ba maturu,
upu-upu rárá katueꞌkuꞌ Nuisá aha.
4 Hangko tiꞌara maniaꞌ mohuwárá laluitangkuꞌ,
PUEꞌ, Nuisá miꞌi aha upu-upu
to ina mesuwuꞌ hangko i humengkuꞌ.
5 Io nodoKoꞌ bosoꞌ to motolelingiaꞌ,
Nukámpáiaꞌ hai kuasaꞌMu.
6 Kupohele ntepuꞌu to Nuisá mokana i kódóꞌ.
Tiꞌara kuisá noumbá haneꞌi Nuisá upu-upuna iti.
7 Iumbáꞌaꞌ paꞌi peisá lao bona karaoꞌaꞌ hangko i inaoMu?
Iumbáꞌaꞌ peisá melangka hangko i Hio?
8 Ane laoaꞌ i langiꞌ, araKoꞌ indoreá,
ane maturuaꞌ i duniáꞌraꞌ tomate, araKoꞌ woꞌo ionoꞌ.
9 Ane membaraꞌaꞌ lao i pesupaꞌána alo,
ba toroꞌaꞌ i hambalina tahiꞌ,
10 ionoꞌ woꞌo Nuteteꞌaꞌ,
hai Nutulungiaꞌ ánti kuasaꞌMu.
11 Ane kuꞌuliꞌ, “Hampóáꞌworia kamakáindi ina moháláꞌaꞌ,
hai mabaa ina mewaliꞌ makáindi,”
12 agáiáná kamakáindi iti tiꞌara ina mobunduꞌ
láwiꞌ kamakáindi hai mabaa hibali peá i Hio.
13 Io miꞌi to moteruaꞌ
i lalu taꞌina inángkuꞌ.
14 KutóiáKoꞌ Pueꞌ,
láwiꞌ kaNupopewaliꞌkuꞌ maroꞌa ntepuꞌu,
hai kuisá ntepuꞌu,
wátángkuꞌ to Nubábehi deꞌe mehelei.
15 Tempóna buꞌu-buꞌungkuꞌ Nupopewaliꞌ,
Nuisá aha apa to mewaliꞌ.
Nuteruaꞌ i lalu taꞌina inángkuꞌ,
tiꞌara ara to tewuniángi i Hio.
16 Hangko tiꞌara maniaꞌ mewaliꞌ tauna, Nuitamoꞌ,
hai hangko tiꞌara mani mantepuꞌu katueꞌkuꞌ,
Nupakanótó miꞌi hangapa kamaruena katueꞌkuꞌ,
hai Nuꞌukiꞌ miꞌi i lalu suraMu.
17 Ó Pueꞌ Ala, handaꞌ ntepuꞌu to Nupekiri mokana i kódóꞌ,
hai pekiriMu maꞌángkárá kakuisána.
18 Ane kekuimbaꞌi, melumbuꞌ mani kahandaꞌna hangko i wungi,
hai ane mawonggoꞌmoꞌ moimbaꞌ,a ara maniaꞌ i pekiriMu.
19 Ó Pueꞌ Ala, kupembiáꞌ bona Nupapate tauna to kadake,
haneꞌi tauna to mau mepapate, Nukaraohiheꞌ hangko i kódóꞌ.
20 Molaluitaheꞌ mokana i Hio, agáiáná tunggáiáraꞌ kadake.
EwáliMuheꞌ iti moewaꞌKoꞌ, agáiáná mbero-mbero peá.
21 Ó PUEꞌ, kukáhihiꞌ tauna to mokáhihiꞌKoꞌ,
tiꞌara mpiiꞌ kuꞌundeꞌ tauna to mampoewaliáKoꞌ.
22 Kukáhihiꞌ ntepuꞌuheꞌ,
hai kurekeꞌheꞌ ewálingkuꞌ.
23 Ó Pueꞌ Ala, kupembiáꞌ bona Nupampeitai poántingkuꞌ,
bona Nuisá apa to i lalungkuꞌ.
Nupáresáꞌaꞌ bona Nuisá upu-upu to i pekiringkuꞌ.
24 Nupeitaꞌaꞌ, babilaꞌ rárá katueꞌkuꞌ kadake.
Kuꞌundeꞌ bona Nuteteꞌaꞌ i ráráMu to tiꞌara mokahópóꞌá.b