Nani kagóeꞌ ánti petulungina Pueꞌ Ala
138
Nanina Daudiꞌ.
Ó PUEꞌ, hangko i lalungkuꞌ ntepuꞌu
kuꞌundeꞌ manguliꞌ handaꞌ kamaroꞌana i Hio.
I lindoꞌraꞌ pueꞌ to rapenómbái tauna ntániꞌna,
ina monaniaꞌ motóiáKoꞌ.
2 Ina molingkuduaꞌ melindoꞌ i támbiMu to magasaꞌ,
motóiáKoꞌ ánti kamaꞌahiꞌMu hai katetidaꞌMu,
láwiꞌ Nupatongawaꞌ kaꞌIona hai dándiMu
melumbuꞌ hangko i hinángkáꞌ to ara.
3 Tempóngkuꞌ meraruaꞌ i Hio, Nuhániki pekakaengkuꞌ,
hai Nupakaróhó lalungkuꞌ.
4 Ó PUEꞌ, upu-upu datu i duniáꞌ ina motóiáKoꞌ
láwiꞌ mohádimoheꞌ kana i dándiMu.
5 Ina rananika mokana i apa to Nubábehi,
láwiꞌ mahile peawaꞌMu.
6 Kehapiꞌ makuasaꞌ ntepuꞌuKoꞌ,
Nupailaluheꞌ tauna to i wóiꞌ tueꞌraꞌ,
hai hangko karaoꞌ,
Nuisá apa to rabábehi tauna to maꞌángkáꞌ.
7 Ane narampeaꞌ handaꞌ kapári,
Nukádipurá katueꞌkuꞌ.
Nuewaꞌheꞌ ewálingkuꞌ to mabukoꞌ i kódóꞌ,
hai Nupelaeaꞌ ánti kamakuasaꞌMu.
8 PUEꞌ, ina Nubukeki dándiMu i kódóꞌ.
KamaꞌahiꞌMu tiꞌara mokahópóꞌá.
IneeꞌKoꞌ mopálehi taunáMu to Nupopewaliꞌ.