Petatangi i wiwi uwai Bábeli
137
Mehoda peangkaiꞌ i wiwi uwai i tampoꞌ Bábeli,ateriaꞌangkaiꞌ mambuhinao Sio to magero miꞌi.
2 Tiꞌarapongkaiꞌ mau mokáwiꞌ kasapi,
onoꞌ haneꞌi kihoda peá i tóáꞌ kau gandarusa.
3 ToBábeli to motawaniangkaiꞌ
membiáꞌ bona kinaniáheꞌ nani kagóeꞌ-góeꞌ.
Tauna to mampopeahiahiꞌangkaiꞌ iti manguliꞌ:
“Niponaniáꞌangkaiꞌ nani mokana i Sio!”
4 Noumbá kapeisántaꞌ monanika nani mokana i PUEꞌ,
tangaꞌtaꞌ i tampoꞌ ntániꞌna?
5 Ee Ierusale! Ane kukáláliꞌákoꞌ,
patodáhi miꞌi tae kuánángkuꞌ mokáláliꞌá woꞌo mokáwiꞌ kasapi.
6 Ane tiꞌarakoꞌ kubuhinao,
hai tiꞌara kupokagóeꞌ ntepuꞌukoꞌ Ierusale,
patodáhi miꞌi lilaꞌkuꞌ tiꞌara piꞌi peisá monani.
7 Ó PUEꞌ, kupembiáꞌ bona Nubuhinao
apa to rabábehi toEdo.b
I tempóna kótá Ierusale ranangi ewálina, rauliꞌ:
“Nigero miꞌi! Nigero kótá iti duuꞌna upu!”
8 Ee toBábeli, ina rapatunakou.
Góeꞌheꞌ tauna to moháwángikou
hintotoꞌ hai bábehiámi i kaiꞌ.
9 Góeꞌheꞌ tauna to mamperampaꞌi ánáꞌmi,
rahepenga i watu to mahile.