Upu-upuna mentóáꞌ hangko i Pueꞌ Ala
127
Nani petóiáraꞌ toSáráeliꞌ tempóraꞌ mempanaiꞌ lao i kótá Ierusale. Nanina Salomo.
Ane tiꞌarai PUEꞌ to moaró támbi,
mbero-mbero támbi iti raꞌaró topobágóꞌna.
Ane tiꞌarai PUEꞌ to mokámpái kótá,
mbero-mbero rakámpái tauna.
2 Tiꞌara mobunduꞌ mearókou mepulo-pulo
hai mobágóꞌ matimi duuꞌna marue wengi
bona ara pandeꞌmi,
láwiꞌ tangaꞌmi letaꞌ, PUEꞌ mopatimama miꞌi pandeꞌ
i tauna to Napokaꞌahiꞌ.
3 PUEꞌ mampoweꞌikeꞌ ánángkóiꞌ.
To raꞌánáka iti ia miꞌi pewátiꞌ hangko i PUEꞌ.
4 Ánángkóiꞌ to raꞌánáka i tempóna tosaeraꞌ maleheꞌ mani,
nodoheꞌ ánáꞌ panaꞌ to peisá mampeámpárái tosaeraꞌ hangko i ewali.
5 Morasiꞌ ntepuꞌu tauna to handaꞌ ánáꞌna.
Ia tiꞌara mahili ane mombelindoꞌ hai topeꞌewaꞌ
i lindoꞌna topebutusi to mehoda
mobutusi kara-karana i babaꞌá kótá.